(ສພຊ) – ກອງປະຊຸມສໍາມະນາກ່ຽວກັບການສົ່ງເສີມບົດບາດແມ່ຍິງໃນເວທີການເມືອງ ໃຫ້ແກ່ສະມາຊິກສະພາແຫ່ງຊາດ (ສສຊ) ເພດຍິງ ໄດ້ຈັດຂຶ້ນໃນວັນທີ 13-15 ທັນ ວາ 2024 ທີ່ເມືອງວັງວຽງ ແຂວງວຽງຈັນ ໂດຍການເປັນປະ ທານຂອງທ່ານ ນາງ ທຸມມາລີ ວົງພະຈັນ ກໍາມະການຄະນະປະຈໍາ, ປະທານກຳມາທິການຍຸຕິທໍາ, ປະທານຄະ ນະສະມາຊິກສະພາແຫ່ງຊາດເພດຍິງ, ມີ ສສຊ ເພດຍິງ ໃນຂອບເຂດທົ່ວປະເທດ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ໄດ້ຮັບຟັງການເຜີຍແຜ່ແນວທາງນະໂຍບາຍ, ລັດຖະທໍາມະນູນ, ກົດໝາຍ ແລະ ສົນທິສັນ ຍາສາ ກົນ ກ່ຽວກັບການສົ່ງເສີມຄວາມສະເໝີພາບຍິງ- ຊາຍ; ຜົນການວິເຄາະດ້ານບົດບາດຍິງ-ຊາຍໃນສະພາແຫ່ງ ຊາດ (ສພຊ) ແລະ ສະພາປະຊາຊົນຂັ້ນແຂວງ (ສພຂ) ຈາກຊ່ຽວຊານໂຄງການສະເຕັບສ໌ (STEPS); ປຶກສາຫາລື ແລະ ປະກອບຄໍາເຫັນຕໍ່ບົດສະຫຼຸບການເຄື່ອນໄຫວປະຈໍາປີ 2024 ແລະ ແຜນການວຽກງານຈຸດສຸມປະຈໍາປີ 2025 ຂອງຄະນະສະມາຊິກສະພາແຫ່ງຊາດເພດຍິງ; ເຜີຍແຜ່ຜົນສໍາເລັດການຈັດກອງປະຊຸມສະມາຊິກລັດຖະສະພາເພດຍິງໄອປາ ຫຼື ໄວປາ (WAIPA) ຄັ້ງທີ 45.
ກອງປະຊຸມຍັງໄດ້ຮັບຟັງການໂອ້ລົມຈາກທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ພົ້ນເດັ່ນຂອງຄະນະ ສສຊ ເພດຍິງ ຍາດມາໄດ້ໃນໜຶ່ງປີຜ່ານມາ ເປັນຕົ້ນແມ່ນການເປັນເຈົ້າພາບຈັດກອງປະຊຸມເວທີຜູ້ນຳທາງການເມືອງຂອງເພດຍິງ, ກອງປະຊຸມໄວປາ ຄັ້ງທີ 45, ການຈັດຕັ້ງປະຕິບັດວຽກງານຈຸດສຸມປະຈຳປີ 2024 ຈໍານວນ 13 ວຽກຈຸດສຸມ, ສາມາດເຮັດສຳເລັດ 11 ວຽກຢ່າງຈົບງາມ ອັນເປັນການປະກອບສ່ວນສຳຄັນເວົ້າໃນຜົນງານລວມຂອງ ສພຊ, ເຮັດໃຫ້ບົດ ບາດຂອງສະພາແຫ່ງຊາດ ກໍຄື ສສຊ ເພດຍິງ ສູງເດັ່ນຂຶ້ນໃນເວທີພາກພື້ນ ແລະ ສາກົນ. ພ້ອມນັ້ນ, ທ່ານຍັງໄດ້ໃຫ້ທິດຊີ້ນຳແກ່ຄະນະ ສສຊ ເພດຍິງ ສືບຕໍ່ຄົ້ນຄວ້າ, ປັບປຸງມະຕິວ່າດ້ວຍການຈັດຕັ້ງ ແລະ ເຄື່ອນໄຫວຂອງຄະນະສະມາຊິກສະພາແຫ່ງຊາດເພດຍິງ ຊຸດທີ IX ແລະ ການປັບປຸງກອງເລຂາຊ່ວຍວຽກໃນທ້າຍສະໄໝ ໃຫ້ມີຄວາມສອດຄ່ອງກັບເງື່ອນໄຂຕົວຈິງໃນປັດຈຸບັນ; ຄົ້ນຄວ້າ ແລະ ຊຸກຍູ້ສົ່ງເສີມເພດຍິງທີ່ມີມາດຕະຖານເງື່ອນໄຂ ເພື່ອລົງສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ (ສສຂ) ໃຫ້ມີຈໍານວນເພີ່ມຂຶ້ນ ທັງຮັບປະກັນຄຸນນະພາບດ້ວຍວິທີການຕ່າງໆ, ລວມທັງການສ້າງຄວາມເຂັ້ມແຂງໃຫ້ ສສຊ ເພດຍິງ ແລະ ເປົ້າໝາຍໃໝ່ ເພື່ອເຮັດໃຫ້ເຂົາເຈົ້າລົງສະໝັກຮັບເລືອກຕັ້ງເຂົ້າເປັນພະນັກງານນຳພາຄຸ້ມຄອງແຕ່ລະຂັ້ນ ໂດຍສົມທົບກັບຄະນະພັກ, ອົງການປົກຄອງ ແລະ ສພຂ ກໍຄືພາກສ່ວນທີ່ກ່ຽວຂ້ອງຕ່າງໆ; ເອົາໃຈໃສ່ຈັດຕັ້ງຜັນຂະ ຫຍາຍທິດທາງແຜນການປີ 2025 ຂອງຄະນະ ສສຊ ເພດຍິງ ໃຫ້ເປັນແຜນວຽກລະອຽດ ຂອງຄະນະ ສສຊ ເພດຍິງປະຈຳແຕ່ລະເຂດເລືອກຕັ້ງ ພ້ອມທັງຊອກວິທີ ການ, ມາດຕະການຈັດຕັ້ງປະຕິບັດໃຫ້ປາກົດຜົນເປັນຈິງ; ເພີ່ມທະວີການຂໍທິດຊີ້ນໍາຈາກຄະນະປະຈຳສະພາແຫ່ງຊາດ, ສະພາປະຊາຊົນຂັ້ນແຂວງ, ຄະນະພັກອົງການປົກຄອງແຂວງ, ຄະນະ ສສຊ ເພດຍິງ ໃຫ້ເປັນປົກກະຕິ ເພື່ອເຮັດໃຫ້ການປະຕິບັດແຜນວຽກຂອງ ສສຊ ເພດຍິງ ສາມາດບັນ ລຸຕາມແຜນທີ່ວາງໄວ້. ນອກນັ້ນ, ທ່ານຍັງໄດ້ເຂົ້າຮ່ວມ ແລະ ມີຄຳເຫັນແລກປ່ຽນບົດຮຽນຂອງສາກົນໃນການສົ່ງເສີມບົດບາດເພດຍິງໃນເວທີການເມືອງ ຈາກທ່ານ ນາງ ມາຕິນ ແທເຣີ ຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປລາວ ແລະ ທີມງານໂຄງການ STEPS ທີ່ໄດ້ນຳສະເໜີຜົນການວິເຄາະບົດບາດຍິງ-ຊາຍໃນສະພາແຫ່ງຊາດ ແລະສະພາປະຊາຊົນຂັ້ນແຂວງ.
ຜ່ານການດໍາເນີນກອງປະຊຸມເຫັນວ່າ ບັນດາທ່ານສະ ມາຊິກສະພາແຫ່ງຊາດເພດຍິງ ສາມາດຮັບຮູ້ ແລະ ເຂົ້າໃຈຢ່າງເລິກເຊິ່ງຕື່ມອີກກ່ຽວກັບການສົ່ງເສີມບົດບາດຂອງແມ່ຍິງໃນເວທີການເມືອງ; ຄະນະ ສສຊ ເພດຍິງ ຍາມໃດກໍຖືສຳຄັນໃນການປະສານງານ ແລະ ເຮັດວຽກຮ່ວມກັບບັນ ດາຂະແໜງການທີ່ກ່ຽວຂ້ອງ ແນໃສ່ປະຕິບັດພາລະບົດ ບາດໃນການເຄື່ອນໄຫວວຽກງານຂອງ ສສຊ ເພດຍິງ ເພື່ອສາມາດເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ ໃນການປະຕິບັດ 3 ພາລະບົດບາດຂອງ ສພຊ ໃນຂົງເຂດວຽກງານຂອງລັດຖະສະພາເພດຍິງ.