ໃນຕອນເຊົ້າຂອງວັນທີ 17 ມັງກອນ ນີ້, ທ່ານ ດຣ ສະເຫຼີມສັກ ແກ້ວຈັນທະລາ ສະມາຊິກສະພາແຫ່ງຊາດ ຄວບສະມາຊິກສະພາປະຊາຊົນຂັ້ນແຂວງ, ຄະນະປະຈໍາສະພາປະຊາຊົນຂັ້ນແຂວງ, ເລຂາທິການສະພາປະຊາຊົນແຂວງຄຳມ່ວນ, ຫົວໜ້າກອງເລຂາ ກອງປະຊຸມ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄຳມ່ວນ ຊຸດທີ II ເຊິ່ງທ່ານໃຫ້ຮູ້ວ່າ: ບັນດາຄະນະກໍາມະການ, ຄະນະເລຂາທິການ ແລະ ກົງຈັກທີ່ຄະນະປະຈໍາສະພາປະຊາຊົນຂັ້ນແຂວງສ້າງຕັ້ງ ໄດ້ຈັດຕັ້ງປະຕິບັດສິດ ໜ້າທີ່ ຂອງຕົນ ແລະ ປະສານສົມທົບ ກັບ ອົງການລັດຂັ້ນແຂວງ ເພື່ອຮ່ວມກັນກະກຽມບັນດາເນື້ອໃນຮອບດ້ານ ທີ່ຈະນໍາເຂົ້າພິຈາລະນາ ແລະ ຮັບຮອງໃນກອງປະຊຸມຄັ້ງນີ້; ມາເຖິງປັດຈຸບັນ ເຫັນວ່າການກະກຽມແມ່ນໄດ້ມີຄວາມຮັບ ປະກັນຮອບດ້ານ, ຄົບຖ້ວນ, ສອດຄ່ອງກັບກົດໝາຍ ແລະ ນິຕິກຳໃຕ້ກົດໝາຍແລ້ວ.
ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງຄໍາມ່ວນ ຊຸດທີ II ຈະໄດ້ໄຂຂຶ້ນໃນຕອນເຊົ້າຂອງວັນ ອັງຄານ ວັນທີ 21 ແລະ ຈະດໍາເນີນໄປເຖິງວັນທີ 24 ມັງກອນ 2025 ເປັນເວລາ 4 ວັນເຕັມ ຢູ່ທີ່ສະໂມສອນໃຫຍ່ 21 ມີນາ ຂອງແຂວງ ແລະ ຈະໄດ້ພິຈາລະນາ ຮັບຮອງເອົາ ບັນຫາສຳຄັນພື້ນຖານ ຂອງແຂວງ ດັ່ງນີ້:
ວຽກງານ ອົງການປົກຄອງແຂວງ ຄໍາມ່ວນ
1 ບົດລາຍງານ ຂອງເຈົ້າແຂວງ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ຄາດໝາຍພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງປະຈຳປີ 2024 ແລະ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ຄາດໝາຍພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງ ປະຈໍາປີ 2025.
ວຽກງານ ອົງການກວດສອບ ປະຈໍາພາກກາງ 2 ແລະ ອົງການກວດກາລັດແຂວງຄໍາມ່ວນ
1 ບົດລາຍງານ ການກວດສອບຄືນ ການສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງ ປະຈໍາປີ 2023, ແຜນການກວດສອບຄືນບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງ ປະຈໍາປີ 2024 ແລະ ການຈັດຕັ້ງປະຕິບັດວຽກງານ ປະຈໍາປີ 2024, ແຜນການເຄື່ອນໄຫວວຽກງານປະຈໍາປີ 2025 ຂອງອົງການກວດສອບ ປະຈໍາພາກກາງ 2.
2 ບົດລາຍງານຜົນການກວດກາ ຕາມຜົນການກວດສອບ ປະຈໍາປີ 2022, ແຜນການກວດກາຕາມຜົນການກວດສອບ ປະຈໍາປີ 2023 ແລະ ການຈັດຕັ້ງປະຕິບັດວຽກງານ ປະຈໍາປີ 2024, ແຜນການ ປະຈໍາປີ 2025 ຂອງອົງການກວດກາລັດແຂວງ.
ວຽກງານ ອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ຄໍາມ່ວນ
1 ບົດລາຍງານ ຂອງອົງການໄອຍະການປະຊາຊົນແຂວງຄໍາມ່ວນ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນການເຄື່ອນໄຫວວຽກງານ ປະຈໍາປີ 2025.
2 ບົດລາຍງານ ຂອງສານປະຊາຊົນແຂວງຄໍາມ່ວນ ກ່ຽວກັບການຈັດຕັ້ງປະຕິບັດແຜນ ການເຄື່ອນໄຫວວຽກງານ ປະຈໍາປີ 2024 ແລະ ແຜນການເຄື່ອນໄຫວວຽກງານ ປະຈໍາປີ 2025.
ວຽກງານ ສະພາປະຊາຊົນແຂວງຄໍາມ່ວນ
1 ບົດລາຍງານ ຂອງສະພາປະຊາຊົນແຂວງຄໍາມ່ວນ ຊຸດທີ II ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2025.
2 ບົດປະເມີນຜົນ ຕໍ່ຄວາມຮັບຜິດຊອບ ຂອງບຸກຄະລາກອນ ທີ່ມາລາຍງານ, ຊີ້ແຈງ ແລະ ຕອບຄໍາຊັກຖາມ ຢູ່ກອງປະຊຸມສະພາປະຊາຊົນຂັ້ນແຂວງ.
3 ບົດປະເມີນຜົນຄວາມໄວ້ວາງໃຈ ຕໍ່ບຸກຄະລາກອນດໍາລົງຕໍາແໜ່ງ ທີ່ສະພາປະຊາຊົນຂັ້ນແຂວງ ເລືອກຕັ້ງ ແລະ ຮັບຮອງການແຕ່ງຕັ້ງ.
ວຽກງານ ແນວລາວສ້າງຊາດ ແຂວງຄຳມ່ວນ
1 ບົດປະກອບຄໍາເຫັນ ຂອງແນວລາວສ້າງຊາດຂັ້ນແຂວງ ກ່ຽວກັບການປະຕິບັດໜ້າທີ່ ຂອງສະພາປະຊາຊົນຂັ້ນແຂວງໄລຍະໜຶ່ງປິຜ່ານມາ.
ກອງປະຊຸມສະພາປະຊາຊົນຂັ້ນແຂວງໃນເທື່ອຈະໄດ້ ຄົ້ນຄວ້າ-ພິຈາລະນາ ແລະ ຈະຮັບຮອງເອົາ ມະຕິກອງປະຊຸມ ຈໍານວນ 12 ສະບັບໃນນີ້, ມະຕິຮັບຮອງເອົາວຽກງານອົງການປົກຄອງແຂວງ 3 ສະບັບ, ມະຕິຮັບຮອງເອົາວຽກງານອົງການ ກວດສອບ ປະຈໍາພາກກາງ 2 ແລະ ອົງການກວດກາລັດແຂວງຄໍາມ່ວນ 2 ສະບັບ, ວຽກງານ ອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ຄໍາມ່ວນ 2 ສະບັບ, ມະຕິຮັບຮອງເອົາວຽກງານສະພາປະຊາຊົນແຂວງຄຳມ່ວນ 2 ສະບັບ ແລະ ມະຕິຮັບຮອງເອົາບັນດານິຕິກຳໃຕ້ກົດໝາຍ 3 ສະບັບ.
ທ່ານ ສະເຫຼີມສັກ ແກ້ວຈັນທະລາ ໃນນາມຫົວໜ້າກອງເລຂາກອງປະຊຸມສະໄໝສາມັນເທື່ອທີ 8, ຕາງໜ້າຄະນະປະຈຳສະພາປະຊາຊົນແຂວງຄຳມ່ວນ ໄດ້ເຊີນຊວນບັນດາທ່ານ ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ກະສິກອນ-ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າ, ທຸກຊັ້ນຄົນໃນທົ່ວແຂວງ ຈົ່ງຕິດຕາມກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້, ໃນໄລຍະດຳເນີນກອງປະຊຸມ, ຄະນະເລຂາທິການສະພາປະຊາຊົນຂັ້ນແຂວງ ໄດ້ຈັດຕັ້ງຄະນະຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ, ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີໄປຍັງສາຍດ່ວນຂອງກອງປະຊຸມ ໝາຍເລກໂທລະສັບ 051 156 (ໃນໂມງລັດຖະການ) ໂດຍບໍ່ເສຍຄ່າ.
ໂດຍ: ເອື້ອ ມະໂນສິງ