ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ໄຂຂຶ້ນຢ່າງເປັນທາງການໃນຕອນເຊົ້າວັນອັງຄານ ວັນທີ 22 ສິງຫາ 2023 ນີ້ ທີ່ສະໂມສອນ ສະພາປະຊາຊົນແຂວງ ເຊກອງ, ໂດຍການເປັນປະທານກ່າວເປີດຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມໂດຍທ່ານ ເຫລັກໄຫລ ສີວິໄລ ເລຂາພັກແຂວງ, ເຈົ້າແຂວງ ເຊກອງ, ມີບັນດາການນຳພັກ-ລັດ ຂັ້ນແຂວງ, ອະດີດການນຳຂອງແຂວງ, ຄະນະສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ນັກທຸລະກິດ ແລະ ແຂກຖືກເຊີນເຂົ້າຮ່ວມ 100 ກວ່າທ່ານ.
ໃນວາລະດຳເນີນກອງປະຊຸມທ່ານ ດົງເພັດ ພະຍົນ ປະທານສະພາປະຊາຊົນແຂວງ ເຊກອງ ໄດ້ກ່າວສູນທອນພົດເປີດກອງປະຊຸມຢ່າງເປັນທາງການວ່າ: ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ຈະດໍາເນີນໄປຈົນເຖິງ ວັນພະຫັດ ວັນທີ 24 ສິງຫາ 2023 ເປັນເວລາ 03 ວັນຈິ່ງຈະສໍາເລັດ, ກອງປະຊຸມຄັ້ງນີ້ແມ່ນຈະໄດ້ຮັບຟັງ ແລະ ພິຈາລະນາຮັບຮອງເອົາຫຼາຍເນື້ອໃນທີ່ສໍາຄັນຂອງທ້ອງຖິ່ນ ເພື່ອສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງແຂວງ ໃຫ້ເປັນອັນສະເພາະໃນແຕ່ລະຂົງເຂດວຽກງານ, ເປັນການຕອບສະໜອງຄວາມຮຽກຮ້ອງຕ້ອງການແຫ່ງການຄຸ້ມຄອງລັດຄຸ້ມຄອງເສດຖະກິດ-ສັງຄົມໃນໄລຍະໃໝ່ ເປັນຕົ້ນ: ບົດລາຍງານສັງເຂບຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງແຂວງ; ບົດລາຍງານຂອງພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງແຂວງ; ບົດລາຍງານຂອງພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງແຂວງ; ບົດລາຍງານຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023; ບົດລາຍງານຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023; ພິຈາລະນາ ແລະ ຮັບຮອງເອົາຮ່າງນິຕິກໍາໃຕ້ກົດໝາຍ ຈໍານວນ 2 ສະບັບຄື: ຮ່າງຂໍ້ຕົກລົງວ່າດ້ວຍການຄຸ້ມຄອງງົບປະມານການປະກອບສ່ວນຈາກຊຸມຊົນເຂົ້າໃນວຽກງານສຶກສາ; ຮ່າງຂໍ້ຕົກລົງວ່າດ້ວຍການທົດແທນຄ່າເສຍຫາຍທີ່ຖືກຜົນກະທົບຈາກໂຄງການພັດທະນາພາຍໃນແຂວງເຊກອງ; ບົດລາຍງານ ກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໝຂອງ ແຜນການ 5 ປີ (2021-2025), ທິດທາງແຜນການທ້າຍສະໄໝ ແລະ ການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023 ຂອງສະພາປະຊາຊົນແຂວງ.
ນອກນັ້ນ, ຍັງຈະໄດ້ຮັບຟັງບົດລາຍງານຂອງພະແນກກະສີກໍາ ແລະ ປ່າໄມ້ແຂວງ ກ່ຽວກັບການແກ້ໄຂບັນຫາການບຸກລຸກປ່າ ແລະ ໄຟໃໝ້ລາມປ່າ ແລະ ບົດລາຍງານຂອງພະແນກພາຍໃນແຂວງ ກ່ຽວກັບແຜນການສ້າງຕັ້ງເມືອງໃໝ່ (ເມືອງທີ 5 ຂອງແຂວງ ເຊກອງ); ຮັບຟັງການປະກອບຄໍາເຫັນ ຂອງຄະນະປະຈໍາສະພາປະຊາຊົນແຂວງ ຕໍ່ບົດລາຍງານຂອງອົງການປົກຄອງແຂວງ ແລະ ຮັບຟັງ ອົງການປົກຄອງແຂວງ, ພະແນກການທີ່ກ່ຽວຂ້ອງ ຊີ້ແຈງຕາມຄໍາຖາມເຈາະຈີ້ມຂອງຄະນະປະຈໍາສະພາປະຊາຊົນແຂວງ, ການປະກອບຄໍາເຫັນ, ຄໍາຊັກຖາມຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ. ທ່ານ ປະທານສະພາປະຊາຊົນແຂວງ ໄດ້ກ່າວຕື່ມອີກວ່າ: ບັນດາເນື້ອໃນທີ່ນໍາມາຄົ້ນຄວ້າ, ພິຈາລະນາ ແລະ ຮັບຮອງໃນຄັ້ງນີ້ ລ້ວນແຕ່ເປັນບັນຫາທີ່ສໍາຄັນ ເຊິ່ງກວມເອົາຫຼາຍວຽກງານ ແຕ່ໄລຍະການດໍາເນີນກອງປະຊຸມແມ່ນມີຂີດຈໍາກັດ. ສະນັ້ນບົນຈິດໃຈເສີມສ້າງຄວາມສາມັກຄີ ດ້ວຍຄວາມຮັບຜິດຊອບສູງ ຂໍຮຽກຮ້ອງມາຍັງບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງເຊກອງ ແລະ ສະມາຊິກສະພາປະຊາຊົນຂັ້ນແຂວງທຸກສະຫາຍ ຈົ່ງໄດ້ຍົກສູງຄວາມຮັບຜິດຊອບການເມືອງຂອງຕົນເຂົ້າໃນການຄົ້ນຄວ້າ, ພິຈາລະນາ ແລະ ປະກອບຄໍາຄິດເຫັນຢ່າງມີປະຊາທິປະໄຕ, ເລິກເຊິ່ງ, ມີຈຸດສຸມ ແລະ ຮັບປະກັນໄດ້ຄວາມຖືກຕ້ອງສອດຄ່ອງຕາມລະບຽບກົດໝາຍ ເພື່ອເຮັດໃຫ້ເນື້ອໃນທີ່ນໍາມາພິຈາລະນາ ແລະ ຮັບຮອງໃນກອງປະຊຸມຄັ້ງນີ້ມີຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາ.
#ໂດຍ: ນາລີວັນ