ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II ໄດ້ອັດລົງດ້ວຍຜົນສໍາເລັດອັນສະຫງ່າງາມ ໃນຕອນບ່າຍຂອງວັນທີ 15 ກຸມພາ 2023 ພາຍຫຼັງດໍາເນີນມາແຕ່ວັນທີ 12 ກຸມພາ 2023 ໂດຍການເປັນປະທານຂອງທ່ານ ບຸນມີ ພິມມະສອນ ຮອງເລຂາພັກແຂວງ , ປະທານສະພາປະຊາຊົນແຂວງຄໍາມ່ວນ , ເຂົ້າຮ່ວມມີທ່ານ ຄໍາໃບ ດຳລັດ ກຳມະການສູນກາງພັກ, ຮອງປະທານສະພາແຫ່ງຊາດ; ທ່ານ ວັນໄຊ ພອງສະຫັວນ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆຄໍາມ່ວນ, ມີບັນດາທ່ານ ການນໍາຂອງແຂວງ, ອະດີດການນໍາ; ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນຂັ້ນແຂວງ ພ້ອມດ້ວຍແຂກຖືກເຊີນ.
ໃນວາລະພິທີປິດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II ທ່ານ ບຸນມີ ພິມມະສອນ ໄດ້ກ່າວສູນທອນພົດປິດກອງປະຊຸມຢ່າງເປັນທາງການວ່າ: ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II ໄດ້ດໍາເນີນມາແຕ່ວັນທີ 12 ກຸມພາ 2023 ຫາ ວັນທີ 15 ກຸມພາ 2023 ເຊິ່ງລວມເປັນເວລາ 4 ວັນເຕັມ, ມາຮອດມື້ນີ້ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II ໄດ້ບັນລຸຜົນສໍາເລັດ ຕາມຈຸດປະສົງລະດັບຄາດໝາຍທີ່ວາງໄວ້.
ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈຳປີ 2022 ແລະ ທິດທາງປີ 2023, ບົດສະຫຼຸບຂາດຕົວ ແຜນງົບປະມານປະຈຳປີ 2021, ການຈັດຕັ້ງປະຕິບັດແຜນງົບປະມານ ປີ 2022 ແລະ ທິດທາງ ປະຈຳປີ 2023, ຮັບຮອງເອົາບົດລາຍງານຂອງອົງການກວດສອບປະຈຳພາກກາງ ກ່ຽວກັບການເຄື່ອນໄຫວ ວຽກງານປະຈຳປີ 2022 ແລະ ແຜນການເຄື່ອນໄຫວວຽກງານ ປີ 2023 ແລະ ລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງຄຳມ່ວນ ປະຈຳປີ 2021, ບົດລາຍງານຂອງອົງການກວດກາລັດແຂວງ ກ່ຽວກັບການເຄື່ອນໄຫວປະຈຳປີ 2022 ແລະ ທິດທາງປີ 2023 ແລະ ລາຍງານຜົນການກວດກາ ຕາມຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງຄຳມ່ວນ ປະຈຳປີ 2020, ຮັບຮອງເອົາບົດລາຍງານການເຄື່ອນໄຫວປະຈຳປີ 2022 ແລະ ທິດທາງປີ 2023 ຂອງອົງການໄອຍະການປະຊາຊົນ, ສານປະຊາຊົນແຂວງ ແລະ ສະພາປະຊາຊົນ ແຂວງຄຳມ່ວນ ຊຸດທີ II, ພິຈາລະນາ ແລະ ຮັບຮອງເອົາຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ການພັດທະນາທີ່ດິນປ່າໄມ້ ແລະ ຮ່າງຂໍ້ຕົກລົງວ່າດ້ວຍການກຳນົດເຂດ ປະເມີນລາຄາທີ່ດິນ ທົ່ວແຂວງຄຳມ່ວນ, ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ນໍາໃຊ້ກອງທຶນໄພພິບັດຂອງແຂວງ, ຮ່າງຂໍ້ຕົກລົງວ່າດ້ວຍກອງທຶນສົງເຄາະ, ພິຈາລະນາ ແລະ ຮັບຮອງເອົາ ຮ່າງມະຕິວ່າດ້ວຍການຈັດຕັ້ງປະເມີນຜົນບຸກຄະລາກອນທີ່ສະພາປະຊາຊົນ ແລະ ຄະນະປະຈຳສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາ.
ຜົນສໍາເລັດຂອງກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄຳມ່ວນ ຊຸດທີ II ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄໍາມ່ວນ ເຂົ້າສູ່ຊີວິດຕົວຈິງ, ແມ່ນໝາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງ ຂອງບັນດາທ່ານສະມາຊິກສະພາປະຊາຊົນຂັ້ນແຂວງ, ຄວາມຕັດສິນໃຈ ຂອງອົງການປົກຄອງແຂວງ, ອົງການທີ່ກ່ຽວຂ້ອງ ທີ່ຈະສືບຕໍ່ພັດທະນາແຂວງຄຳມ່ວນ ໃນສະພາບມີຄວາມຫຍຸ້ງຍາກທາງດ້ານເສດຖະກິດ – ການເງິນໃຫ້ບັນລຸຕາມຄາດໝາຍທີ່ວາງໄວ້.
ໃນການດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II ມີພໍ່ແມ່ປະຊາຊົນ ສົ່ງຄໍາຄິດຄໍາເຫັນ (ໂດຍຜ່ານສາຍດ່ວນ 051 156 ) ລວມທັງໝົດມີ 35 ເລື່ອງ, ໃນນັ້ນໄດ້ສະເໜີຜ່ານ ສະມາຊິກສະພາປະຊາຊົນແຂວງ 9 ເລື່ອງ, ຕໍ່ກັບບັນຫາທີ່ສົ່ງມາທາງໂທລະສັບດັ່ງກ່າວກອງເລຂາກອງປະຊຸມຈະໄດ້ສັງລວມມອບໃຫ້ຄະນະກໍາມະການທີ່ກ່ຽວຂ້ອງປະສານສົມທົບພາກສ່ວນຕ່າງໆ ຂອງອົງການປົກຄອງແຂວງ ຄົ້ນຄວ້າແກ້ໄຂ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.
ໂດຍ: ເອື້ອ ມະໂນສິງ ( ອາລີ )