ໃນວັນທີ 7 ກຸມພາ 2023 ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງອັດຕະປື ຊຸດທີ II ຢ່າງເປັນທາງການ ໂດຍການເປັນປະທານຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານສະພາປະຊາຊົນແຂວງອັດຕະປື; ເຂົ້າຮ່ວມມີ: ທ່ານ ເລັດ ໄຊຍະພອນ ກຳມະການສູນກາງພັກ,ເລຂາພັກແຂວງ ເຈົ້າແຂວງອັດຕະປື ມີການນຳພັກ-ລັດຂັ້ນສູງຂອງແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ17, ບັນດາສະມາຊິກສະພາປະຊາຊົນແຂວງ,ບັນດາທ່ານເຈົ້າເມືອງ, ອາດີດການນໍາພັກ-ລັດແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ກ່າວສູນທອນພົດເປີດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງອັດຕະປືຊຸດທີII. ຢ່າງເປັນທາງການ ວ່າ: ປະຕິບັດຕາມກົດໝາຍວ່າດ້ວຍສະພາປະຊາຊົນຂັ້ນແຂວງ ສະບັບປັບປຸງ ປີ 2020, ເລກທີ82/ສພຊ, ລົງວັນທີ 30 ມີຖຸນາ 2020 59 ກ່ຽວກັບກອງປະຊຸມສະໄໝສາມັນປະຈໍາປີ ຂອງສະພາປະຊາຊົນຂັ້ນແຂວງ, ມື້ນີ້ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II ໄດ້ໄຂຂື້ນຢ່າງເປັນທາງການ ໃນທ່າມກາງບັນຍາກາດທີ່ທົ່ວພັກ-ລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ກໍ່ຄືແຜນພັດທະນາເສດຖະກິດ-ສັງຄົມ 5 ປີ ຂອງແຂວງ, ໂດຍສະເພາະ ສອງວາລະແຫ່ງຊາດ ພວມໄດ້ຮັບການຈັດຕັ້ງປະຕິບັດຢ່າງເປັນຂະບວນຟົດຟື້ນ, ແຂງແຮງ ແລະ ເປັນຮູບປະທຳຫຼາຍຂື້ນ.
ໃນໂອກາດທີ່ມີຄວາມໝາຍສຳຄັນນີ້, ກອງປະຊຸມມີຄວາມພາກພູມໃຈ ແລະ ມີຄວາມປິຕິຍິນດີເປັນຢ່າງຍິ່ງ ທີ່ໄດ້ຕ້ອນຮັບທ່ານ ເລັດ ໄຊຍະພອນ ກຳມະການສູນກາງພັກ ເລຂາພັກແຂວງ ເຈົ້າແຂວງ ອັດຕະປື ທີ່ໄດ້ໃຫ້ກຽດເຂົ້າຮ່ວມກອງປະຊຸມທີ່ມີຄວາມສຳຄັນຄັ້ງນີ້, ຂໍສະແດງຄວາມຂ່ຳນັບຊົມເຊີຍຢ່າງສຸດໃຈ.
ກອງປະຊຸມຂໍສະແດງຄວາມຂໍ່ານັບຊົມເຊີຍ ບັນດາທ່ານການນຳພັກ-ລັດ, ບັນດາທ່ານສະມາຊິກສະພາແຫ່ງຊາດຊຸດທີ IX ປະຈຳເຂດເລືອກຕັ້ງ, ບັນດາທ່ານສະມາຊິກສະພາປະຊາຊົນແຂວງຊຸດທີ II, ຜູ້ຕາງໜ້າອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ຜູ້ຊົງຄຸນວຸດທິ, ສະຖາບັນການສືກສາ, ຫົວໜ່ວຍທຸລະກິດ, ອາດີດສະມາຊິກສະພາແຫ່ງຊາດ ແລະ ອາດີດສະມາຊິກສະພາປະຊາຊົນແຂວງ ທີ່ໄດ້ໃຫ້ກຽດເຂົ້າຮ່ວມກອງປະຊຸມຄັ້ງນີ້ຢ່າງສຸດໃຈ
ການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ໃນໄລຍະປີ 2022 ແມ່ນຢູ່ໃນສະພາບການຜັນແປຢ່າງສະຫຼັບສັບຊ້ອນ, ເຄັ່ງຮ້ອນ ແລະ ມີຄວາມຫຼໍ່ແຫຼມຫຼາຍດ້ານ ທີ່ຄາດຄະເນໄດ້ຍາກ ເຊີ່ງໄດ້ສົ່ງຜົນກະທົບໂດຍກົງຕໍ່ປະເທດ ຂອງພວກເຮົາ ໂດຍສະເພາະຢ່າງຍິ່ງ ມີຜົນກະທົບຕໍ່ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງີນ ພາຍໃນແຂວງຂອງພວກເຮົາ, ການຄຸ້ມຄອງລັດຕໍ່ເສດຖະກິດ-ສັງຄົມ ພົບຫຼາຍສິ່ງທ້າທາຍໃໝ່ ເປັນຕົ້ນ, ອັດຕາແລກປ່ຽນເງີນຕາໜີງຕີງແຮງ, ລາຄານໍ້າມັນເຊື້ອໄຟ ແລະ ສີນຄ້າເພີ່ມສຸງຂື້ນ, ຊີວິດການເປັນຢູ່ຂອງປະຊາຊົນມີການຝືດເຄືອງ, ແຕ່ດ້ວຍຄວາມເອົາໃຈໃສ່ນຳພາ-ຊີ້ນຳ, ການປະສານສົມທົບ, ການປືກສາຫາລືຮ່ວມກັນຢ່າງໃກ້ຊິດ ລະຫວ່າງ ຄະນະປະຈຳສະພາປະຊາຊົນແຂວງ ແລະ ຄະນະປະຈຳພັກແຂວງ, ຄວາມເຂົ້າໃຈ ແລະ ຄວາມເປັນເອກະພາບ ນຳພັກ-ລັດ ຂອງພະນັກງານ-ລັດຖະກອນ, ທະຫານ, ຕໍາຫຼວດ ກໍ່ຄືປະຊາຊົນບັນດາເຜົ່າ ເຮັດໃຫ້ບັນຫາຄວາມຫຍຸ້ງຍາກທາງດ້ານເສດຖະກິດ-ການເງີນ ຢູ່ໃນແຂວງຂອງພວກເຮົາ ໄດ້ັຮັບການແກ້ໄຂເປັນກ້າວໆ; ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ ມີຄາດໝາຍຈໍານວນໜື່ງບັນລຸໄດ້ຕາມແຜນການ ແລະ ລື່ນຄາດໝາຍ, ການຈັດຕັ້ງແຜນງົບປະມານແຫ່ງລັດ ໝົດປີສາມາດບັນລຸໄດ້ເກີນແຜນກໍານົດຈໍານວນໜື່ງ, ເຮັດໃຫ້ແຂວງອັດຕະປື ຂອງພວກເຮົາ ຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ.
ປະຕິບັດຕາມກົດໝາຍວ່າດ້ວຍສະພາປະຊາຊົນຂັ້ນແຂວງ, ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II ຄັ້ງນີ້ ຈະໄດ້ນໍາເອົາບັນດາເນື້ອໃນທີ່ສໍາຄັນເຂົ້າພິຈາລະນາ ຮັບຮອງດັ່ງນີ້:
ບົດລາຍງານ ຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2022 ແລະ ແຜນການປະຈຳປີ 2023;
ບົດລາຍງານ ຂອງພະແນກແຜນການ ແລະ ການລົງທືນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ ແລະ ແລະ ທິດທາງປີ 2023;
ບົດລາຍງານ ຂອງພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂັ້ນແຂວງປະຈຳປີ 2022 ແລະ ທິທາງແຜນການ ປະຈຳປີ 2023;
ບົດລາຍງານ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແລະ ການແກ້ໄຂບັນຫາຢາເສບຕິດ ປະຈຳປີ 2022 ແລະ ທິດທາງ ປີ 2023;
ບົດລາຍງານການຈັດຕັ້ງປະຕິບັດ ການແກ້ໄຂໄພພິບັດ ຈາກເຂື່ອນເຊປຽນ-ເຊນໍ້ານ້ອຍພັງ ຢູ່ເມືອງສະໜາມໄຊ;
ບົດລາຍງານ ການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການ ປີ 2023 ຂອງອົງການກວດສອບປະຈຳພາກໃຕ້; ບົດລາຍງານ ການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2021;
ບົດລາຍງານ ຂອງອົງການກວດກາລັດແຂວງ ກ່ຽວກັບການຈັດຕັ້ງປະຕິບັດວຽກງານ ປະຈໍປີ 2022 ແລະ ທິດທາງແຜນການ ປີ 2023; ບົດລາຍງານ ຜົນການກວດກາ ຕາມຜົນການກວດສອບ ປະຈໍາປີ 2020;
ບົດລາຍງານ ຂອງອົງການໄອຍະການປະຊາຊົນແຂວງກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2022 ແລະ ທິດທາງປີ 2023;
ບົດລາຍງານ ຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈຳປີ 2023 ,
ພິຈາລະນາ ແລະ ຮັບຮອງເອົາການສ້າງນິຕິກໍາໃຕ້ກົດໝາຍຈໍານວນ3ສະບັບຄື:1ຂໍ້ຕົກຂອງທ່ານເຈົ້າແຂວງວ່າດ້ວຍການສ້າງຕັ້ງແລະການຄຸ້ມຄອງກິດຈະການຟາມລ້ຽງສັດພາຍໃນແຂວງ,2ຂໍ້ຕົກລົງຂອງທ່ານເຈົ້າແຂວງວ່າດ້ວຍການຄຸ້ມຄອງແລະການນໍາໃຊ້ຢາປາບສັດຕູພືດພາຍໃນແຂວງ,3ຂໍ້ຕົກລົງຂອງທ່ານເຈົ້າແຂວງວ່າດ້ວຍສັນຍາແຮງງານ
ບົດລາຍງານ ຂອງສະພາປະຊາຊົນຂັ້ນແຂວງ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023.
ການສະເໜີແຕ່ງຕັ້ງ ບຸກຄະລາກອນ ຂອງອົງການປົກຄອງແຂວງ;
ນອກນັ້ນ, ກອງປະຊຸມຈະໄດ້ຮັບຟັງການຊີ້ແຈງຈາກພະແນກ ແຮງງານ ແລະ ສະຫວັດດີການ-ສັງຄົມແຂວງ, ພະແນກກະສິກຳ ແລະ ປ່າໄມ້ແຂວງ, ພະແນກພະລັງງານ ແລະ ບໍ່ແຮ່ແຂວງ.
ເພື່ອພິຈາລະນາຮັບຮອງເອົາ ບັນຫາສຳຄັນພື້ນຖານຂອງແຂວງ ທີ່ມີຈໍານວນຫຼາຍຄືດັ່ງກ່າວນີ້ ໃຫ້ມີຄຸນນະພາບ, ປະສິດທິຜົນ ແລະ ບັນລຸຜົນຕາມແຜນການທີ່ວາງໄວ້, ໃນນາມປະທານກອງປະຊຸມ, ຂ້າພະເຈົ້າ ຂໍຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງ ຈົ່ງສືບຕໍ່ໃຫ້ການຮ່ວມມື ແລະ ສະໜອງຂໍ້ມູນຕໍ່ບັນດາເນື້ອໃນ ທີ່ຈະນຳເຂົ້າພິຈາລະນາ ແລະ ຮັບຮອງໃນກອງປະຊຸມຄັ້ງນີ້, ຮຽກຮ້ອງມາຍັງບັນດາທ່ານສະມາຊິກສະພາປະຊາຊົນແຂວງ ຈົ່ງໄດ້ນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ໃນການຄົ້ນຄວ້າ, ປະກອບຄໍາເຫັນຕໍ່ທຸກບັນຫາຢ່າງຖີ່ນຖ້ວນ, ພາວະວິໃສ, ເລິກເຊີ່ງ ບົນພື້ນຖານແນວທາງນະໂຍບາຍຂອງພັກ, ກົດໝາຍຂອງລັດ ແລະ ສະພາບຄວາມເປັນຈີງທາງດ້ານເສດຖະກິດ-ສັງຄົມ ຂອງແຂວງເຮົາໃນປັດຈຸບັນ, ເພື່ອເຮັດໃຫ້ເນື້ອໃນທີ່ນໍາມາພິຈາລະນາ, ຮັບຮອງຄັ້ງນີ້ ມີຄຸນນະພາບ ແລະ ສາມາດນຳໄປຈັດຕັ້ງປະຕິບັດ ຢ່າງເປັນຮູບປະທຳ.
ໃນໂອກາດສະຫງ່າລາສີນີ້ ໃນນາມປະທານກອງປະຊຸມ ຂ້າພະເຈົ້າ ຂໍປະກາດໄຂ ກອງປະຊຸມສະໄໝສາມັນເທື່ອ 4 ຂອງສະພາປະຊາຊົນແຂວງ ຊຸດທີ II ຢ່າງເປັນທາງການ ນັບແຕ່ເວລານີ້ເປັນຕົ້ນໄປ.
(ພາບ-ຂ່າວ:ສພຂ ອັດຕະປື)