ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄໍາມ່ວນ ຊຸດທີ ll ໄຂຂຶ້ນຢ່າງເປັນທາງການໃນຕອນເຊົ້າຂອງວັນຄານວັນທີ 23 ສິງຫາ 2022 ທີ່ສະໂມສອນຂອງແຂວງ ໂດຍການເປັນທານຂອງ ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ; ເປັນກຽດເຂົ້າຮ່ວມມີ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເລືອກຕັ້ງທີ 12 ແຂວງຄໍາມ່ວນ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ອະດິດການນຳຂັ້ນສູງຂອງແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ ທີ 12 ແລະ ສະມາຊິກສະພາປະຊາຊົນແຂວງ, ເຈົ້າເມືອງ 10 ເມືອງ, ຫົວໜ້າ-ຮອງຫົວໜ້າພະແນກການ ແລະ ແຂກຖືກເຊີນເຂົ້າຮ່ວມທັງໝົດ 299 ທ່ານ.

       ທ່ານ ບຸນມີ ພິມມະສອນ ໄດ້ກ່າວໄຂກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້: ຈະໄດ້ພິຈາລະນາ ແລະ ຮັບຮອງບັນດາເນື້ອໃນທີ່ສໍາຄັນຄື : ບົດລາຍງານໂດຍສັງເຂບຂອງ ທ່ານ ເຈົ້າແຂວງ ກ່ຽວກັບບັນຫາພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2022 ຂອງແຂວງ ຄໍາມ່ວນ; ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ບົດລາຍງານ ຂອງຄະນະປະຈໍາສະພາປະຊາຊົນແຂວງຄໍາມ່ວນ ກ່ຽວກັບການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ແລະ ແຜນການເຄື່ອນໄຫວວຽກງານ ຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄຳມ່ວນ ຊຸດທີ II; ບົດລາຍງານຂອງຄະນະປະຈໍາສະພາປະຊາຊົນແຂວງຄໍາມ່ວນ ກ່ຽວກັບການຕິດຕາມກວດກາການຈັດຕັ້ງຜັນຂະຫຍາຍວາລະແຫ່ງຊາດ ຢູ່ພາຍໃນແຂວງ ໃນໄລຍະຜ່ານມາ ແລະ ແຜນການຕິດຕາມກວດກາຂອງສະພາປະຊາຊົນຂັ້ນແຂວງ ກ່ຽວກັບການປະຕິບັດວາລະແຫ່ງຊາດ ໃນຕໍ່ໜ້າ; ບົດຊີ້ແຈງຕິດພັນກັບ ການລາຍງານ ຂອງອົງການປົກຄອງແຂວງມີ: ພະແນກແຜນການ ແລະ ການລົງທຶນແຂວງ, ພະແນກການເງິນແຂວງ. ນອກຈາກຊີ້ແຈງບັນຫາລວມແລ້ວ ຍັງລົງເລິກຕື່ມການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ບົດຊີ້ແຈງຕິດພັນກັບບົດລາຍງານ ຂອງອົງການປົກຄອງແຂວງມີ: ພະແນກກະສິກຳ ແລະປ່າໄມ້ແຂວງ, ພະແນກອຸດສະຫະກຳ ແລະ ການຄ້າແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກໂຍທາທິການ ແລະ ຂົນສົ່ງ, ພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ, ພະແນກສຶກສາທິການ ແລະ ກິລາແຂວງ, ພະແນກສາທາລະນະສຸກແຂວງ, ອົງການໄອຍະການປະຊາຊົນແຂວງ ແລະ ບົດຊີ້ແຈງ ຂອງກອງບັນຊາການ ປກສ ແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ບົດຊີ້ແຈງ ຂອງທະນາຄານແຫ່ງ ສປປລາວ ປະຈຳພາກກາງ (ແຂວງສະຫວັນນະເຂດ).ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີໄປຍັງສາຍດ່ວນຂອງກອງປະຊຸມ:ໝາຍເລກໂທລະສັບ 051 156 ໂດຍບໍ່ເສຍຄ່າ, ຕິດຕາມການຖ່າຍທອດສົດສຽງຜ່ານລະບົບ FM 95.5 mhz ຂອງແຂວງ (ກອງປະຊຸມສະໄຫມສາມັນເທື່ອທີ3 ຂອງ ສພຂ ຊຸດທີ II, ເຊິ່ງກອງປະຊຸມຄັ້ງນີ້ຈະໄດ້ດຳເນີນໄປເປັນເວລາ 2 ວັນ, ວັນທີ 23 – 24 ສິງຫາ 2022 ຈິ່ງຈະສໍາເລັດ.

ໂດຍ: ເອື້ອ ມະໂນສິງ.