ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ (ສພຂ) ອັດຕະປື ຊຸດທີ II ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 15 ສິງຫາ 2022 ທີ່ຫ້ອງປະຊຸມ ສພຂ, ໂດຍການເປັນປະທານຂອງທ່ານ ນາງ ມີນາພອນ ໄຊສົມພູ ປະທານ ສພຂ ອັຕະປື, ໃຫ້ກຽດເຂົ້າຮ່ວມຂອງທ່ານ ເລັດ ໄຊຍະພອນ ເຈົ້າແຂວງໆອັດຕະປື ມີບັນດາທ່ານຮອງເຈົ້າແຂວງ, ຄະນະປະຈໍາພັກແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ 17, ສະມາຊິກສະພາປະຊາຊົນແຂວງ, ເຈົ້າເມືອງ, ຫົວໜ້າພະແນກການ, ຕາງໜ້າອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ ແລະ ແຂກຖືກເຊີນເຂົ້າຮ່ວມ.ກອງປະຊຸມ, ຈະໄດ້ຄົ້ນຄວ້າ ແລະ ພິຈາລະນາຮັບຮອງບັນດາເນື້ອໃນທີ່ສໍາຄັນຂອງທ້ອງຖີ່ນ ດັ່ງນີ້:

1. ຮັບຟັງການລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບສະພາບພົ້ນເດັ່ນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງ 6 ເດືອນຕົ້ນປີ 2022 ແລະ ທິດທາງແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງ 6 ເດືອນທ້າຍປີ 2022; ການສະເໜີດັດ ແກ້ແຜນງົບປະມານປະຈໍາປີ 2022;
2. ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;
3. ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດຂັ້ນແຂວງ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;
4. ພວກເຮົາຈະໄດ້ຮັບຟັງການລາຍງານເຕີ່ມ ຂອງພະແນກສຶກສາທິການ ແລະ ກິລາ ກ່ຽວກັບການຈັດຕັ້ງປະຕິບັດບັນດາຄາດໝາຍ ໃນຂົງເຂດການສືກສາທິການ ແລະ ກິລາ, ການປັບປຸງຄຸນນະພາບລະບົບການຮຽນ-ການສອນທຸກຊັ້ນ-ທຸກສາຍໃນໄລຍະໃໝ່ ແລະ ການຄຸ້ມຄອງກິລາ-ກາຍະກຳ. ການລາຍງານ ຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ຢູ່ແຂວງອັດຕະປື;
5. ບົກລາຍງານ ກ່ຽວກັບຄວາມຄືບໜ້າ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມທຸກຍາກທາງດ້ານເສດຖະກິດ-ການເງິນ ຢູ່ແຂວງອັດຕະປື ແລະ ການລາຍງານຂອງບັນດາພາກສ່ວນກ່ຽວຂ້ອງ ໃນການຈັດຕັ້ງປະຕິບັດ 2 ​ວາລະແຫ່ງຊາດ ເປັນຕົ້ນ: ພະແນກແຜນການ ແລະ ການລົງທຶນ, ພະແນກການເງິນ, ກະແນກກະສິກຳ ແລະ ປ່າໄມ້, ກອງບັນຊາການ ປກສ ແຂວງ ແລະ ອົງການໄອຍະການປະຊາຊົນແຂວງ ໃນການ ຈັດຕັ້ງປະຕິບັດ 7 ມາມາດຕະການສະກັດກັ້ນ ຂອງອົງການສືບສວນ-ສອບສວນ.
6. ຮັບຟັງການລາຍງານ ຂອງອົງການກວດກາລັດແຂວງ ກ່ຽວກັບຄວາມຄືບໜ້າ ໃນການຊຸກຍູ້ແກ້ໄຂຜົນການກວດ ກາ ຕາມຜົນການກວດສອບໃນ 17 ເປົ້າໝາຍ, ຕາມມະຕິກອງປະຊຸມສະໄໝສາມັນເທື່ອທີ 2 ຂອງສະພາປະຊາ ຊົນແຂວງ ຊຸດທີ II;
7. ບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄມສາມັນເທື່ອທີ 3 ແລະ ແຜນຮອດກອງປະຊຸມສະໄໝສາ ມັນເທື່ອທີ 4 ຂອງສະພາປະຊາຊົນແຂວງ ຊຸດທີ II;
8. ພິຈາລະນາ ແລະ ຮັບຮອງການແຕ່ງຕັ້ງບຸກຄະລາກອນຂອງແຂວງ ຕາມການສະເໜີຂອງທ່ານເຈົ້າແຂວງ ແລະ ພິ ຈາລະນາ ແລະ ຮັບຮອງການແຕ່ງຕັ້ງຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ຕາມການສະເໜີຂອງຄະນະປະຈໍາສະພາປະຊາຊົນແຂວງ;

ນອກນັ້ນ, ຍັງຈະໄດ້ຮັບຟັງການຊີ້ແຈງເພີ່ມເຕີມ ຈາກບັນດາພະແນກການທີ່ກ່ຽວຂ້ອງ ຕໍ່ຄໍາຊັກຖາມ ຂອງບັນດາທ່ານສະມາຊິກສະພາປະຊາຊົນແຂວງ ແລະ ຮັບຟັງລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບຜົນການເລືອກຕັ້ງແທນ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17; ການແຕ່ງຕັ້ງ ແລະ ຍົກຍ້າຍສັບຊ້ອນຄືນໃໝ່ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງພູວົງ ແລະ ເມືອງສາມັກຄີໄຊ, ເພື່ອຮັບປະກັນໃຫ້ເຄື່ອນໄຫວວຽກງານໃນໄລຍະໃໝ່ ໃຫ້ທ່ວງທັນກັບສະພາບເງື່ອນໄຂຕົວຈິງ ແລະ ມີຄວາມຖືກຕ້ອງ, ສອດຄ່ອງຕາມມາດຕາ ຂອງກົດໝາຍທີ່ກໍານົດໄວ້.

(ວິນັດ)