ໃນຕອນເຊົ້າຂອງວັນທີ 26 ທັນວາ 2023 ສະພາປະຊາຊົນແຂວງວຽງຈັນ ໄດ້ໄຂກອງປະຊຸມສະໄໜສາມັນເທື່ອທີ 6 ຂອງສະພາປະຊາຊົນແຂວງວຽງຈັນ ຊຸດທີ II ຂື້ນ ທີ່ສະໂມສອນໃຫ່ຍຫ້ອງວ່າການແຂວງວຽງຈັນ ໂດຍການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ ເປັນກຽດເຂົ້າຮ່ວມມີ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ – ເຈົ້າແຂວງ ແຂວງວຽງຈັນ, ມີບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ສະມາຊິກສະພາປະຊາຊົນແຂວງວຽງຈັນ ຊຸດທີ II, ເຈົ້າເມືອງ, ຫົວໜ້າ-ຮອງຫົວໜ້າພະແນກການ, ອົງການ, ກົມກອງ ແລະ ພະນັກງານວິຊາການທີຮັບຜິດຊອບກອງປະຊຸມ ເຂົ້າຮ່ວມຢ່າງພ້ອມພຽງ.
ພາຍຫຼັງກອງປະຊຸມໄດ້ໄຂຂຶ້ນປະທານກອງປະຊຸມກໍ່ໄດ້ກ່າວເປີດກອງປະຊຸມສະໄໜສາມັນ ເທື່ອ 6 ຂອງສະພາປະຊາຊົນແຂວງວຽງຈັນ ຊຸດທີ II ຢ່າງເປັນທາງການ ກອງປະຊຸມໃນຄັ້ງນີ້ແມ່ນໄດ້ຂຶ້ນໃນທາ່ມກາງບັນຍາກາດທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວບັນດາເຜົ່າພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VI ຂອງຄະນະບໍລິຫານງານພັກແຂວງ, ມະຕິກອງປະຊຸມສະໄໝສາມັນເທື່ອທີ 5 ຂອງສະພາແຫ່ງ ຊຸດທີ XI ແລະ ສະພາປະຊາຊົນແຂວງ ຊຸດທີ II ກໍ່ຄືແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 5 ປີ ຂອງແຂວງ ທີຕິດພັນກັບການຈັດຕັ້ງປະຕິບັດສອງວາລະແຫ່ງຊາດ; ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II ຄັ້ງນີ້ຈະໄດ້ຮັບຟັງການລາຍງານບັນດາເນື້ອໃນທີ່ສຳຄັນ ແລະ ພົ້ນເດັ່ນດັ່ງນີ້:
- ຮັບຟັງການລາຍງານຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງປະຈໍາປີ2023 ແລະ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ປະຈໍາປີ 202
- ບົດລາຍງານຂອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈໍາປີ 2023 ແລະ ທິດທາງແຜນການປະຈໍາປີ
- ບົດລາຍງານຂອງແຂວງກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2023 ແລະ ທິດທາງແຜນການປະຈໍາປີ
- ບົດລາຍງານການຈັດຕັ້ງປະຕິບັດການແກ້ໄຂຄວາມຫຍຸ້ງຍາກທາງດ້ານເສດຖະກິດ- ການເງິນ.
- ບົດລາຍງານການຈັດຕັ້ງປະຕິບັດການແກ້ໄຂບັນຫາຢາເສບຕິດ.
- ບົດລາຍງານຂອງອົງການກວດສອບປະຈໍາພາກກາງກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານກາງສະໄໝ 5 ປີ (2021-2025) ແລະ ທິດທາງແຜນການທ້າຍສະໄໝຮອດປີ 2025; ການຈັດຕັ້ງປະຕິບັດວຽກງານປະຈໍາປີ 2023 ແລະ ທິດທາງແຜນການປະຈໍາປີ 2024, ລາຍງານຜົນການກວດສອບປະຈຳປີ 2022;
- ບົດລາຍງານຂອງອົງການກວດກາລັດແຂວງວຽງຈັນກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານກາງສະໄໝ 5 ປີ (2021-2025), ທິດທາງແຜນການທ້າຍສະໄໝຮອດປີ 2025; ການຈັດຕັ້ງປະຕິບັດແຜນການປະຈໍາປີ 2023 ແລະ ທິດທາງແຜນການປະຈໍາປີ 2024, ລາຍງານບັນຫາການແກ້ໄຂຜົນການກວດກາ ປະຈຳປີ 2021 ແລະ ປະຈຳປີ 2022;
- ບົດລາຍງານຂອງອົງການໄອຍະການປະຊາຊົນແຂວງກ່ຽວກັບການຈັດຕັ້ງປະຕິບັດວຽກງານປະຈໍາປີ 2023 ແລະ ທິດທາງແຜນການປະຈໍາປີ 2024.
- ບົດລາຍງານຂອງສານປະຊາຊົນແຂວງກ່ຽວກັບການຈັດຕັ້ງປະຕິບັດວຽກງານປະຈໍາປີ 2023 ແລະ ທິດທາງແຜນການປະຈໍາປີ 2024.
- ບົດລາຍງານຂອງສະພາປະຊາຊົນແຂວງກ່ຽວກັບການເຄື່ອນໄຫວວຽກງານປະຈໍາປີ 2023 ແລະ ທິດທາງແຜນການປະຈໍາປີ 2024.
ກອງປະຊຸມສະໄໜສາມັນເທື່ອທີ 6 ຂອງສະພາປະຊາຊົນແຂວງວຽງຈັນ ຊຸດທີ II ໃນຄັ້ງນີ້ຈະໄດ້ດໍາເນີນເປັນເວລາ 4 ວັນເຕັມ ສະມາຊິກສະພາປະຊາຊົນແຂວງ ຊຸດທີ II ຈະໄດ້ນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບຂອງຕົນໃນການຄົ້ນຄວ້າ,ປະກອບຄໍາເຫັນຢ່າງຖີ້ຖ້ວນ ຢ່າງພາວະວິໃສ ແລະ ເລິກເຊິ່ງບົນພື້ນຖານແນວທາງນະໂຍບາຍລະບຽບກົດໝາຍ ແລະ ສະພາບຄວາມເປັນຈິງທາງດ້ານເສດຖະກິດ – ສັງຄົມຂອງແຂວງວຽງຈັນໃນປະຈຸບັນ ເພື່ອເຮັດໃຫ້ເນື້ອໃນທີ່ຈະນໍາມາພິຈາລະນາ, ຮັບຮ້ອງໃນຄັ້ງນີ້ ມີຄວາມສົມບູນ ແລະ ໜັ້ກແໜ້ນຈື່ງຂໍເຊີນຊວນປະຊາຊົນບັນດາເຜົ່າ ພາຍໃນແຂວງວຽງຈັນ ຈົ່ງຕິດຕາມກອງປະຊຸມສະໄໜສາມັນເທື່ອ 6 ຂອງສະພາປະຊາຊົນແຂວງຊຸດທີ ll ຄັ້ງນີ້ ຈົນສໍາເລັດ ພ້ອມທັງເປີດກວ້າງໃຫ້ຜູ້ມີສິດເລືອກຕັ້ງ ມີຄໍາຄິດຄໍາເຫັນ ແລະ ສະເໜີຜ່ານໂທລະສັບສາຍດ່ວນ 023 156 ໃນໄລຍະດໍາເນີນກອງປະຊຸມນີ້ຕື່ມອີກ.
ພາບ-ຂ່າວ ນາງ ບູລາຕີ ,ທ້າວ ຄໍາພັນ