ວັນທີ 22-24 ພຶດສະພາ 2024 ນີ້້, ສະພາປະຊາຊົນແຂວງແຂວງຜົ້ງສາລີ ໄດ້ຈັດກອງປະຊຸມພົບປະແລກປ່ຽນບົດຮຽນການເປັນເສນາທິການວຽກງານຮອບດ້ານ ຂອງຄະນະເລຂາທິການສະພາປະຊາຊົນແຂວງ 6 ແຂວງພາກເໜືອ ຄື: (ຜົ້ງສາລີ, ຫຼວງນໍ້າທາ, ອຸດົມໄຊ, ບໍ່ແກ້ວ, ຫົວພັນ ແລະ ຊຽງຂວາງ) ຂື້ນທີ່ເທດສະພາບແຂວງເມືອງຜົ້ງສາລີ, ແຂວງຜົ້ງສາລີ ໂດຍພາຍໃຕ້ການເປັນປະທານຮ່ວມຂອງທ່ານ ທອງສີ ເສົາສຸລພົມ ຮອງເລຂາພັກແຂວງ, ປະທານຄະນະປະຈຳສະພາປະຊາຊົນແຂວງ, ບັນດາທ່ານ ປະທານ, ຮອງປະທານຄະນະປະຈໍາສະພາປະຊາຊົນແຂວງ 6 ແຂວງ, ເຂົ້າຮ່ວມມີຮອງປະທານຄະນະປະຈໍາ, ບັນດາທ່ານເລຂາທິການ, ຮອງເລຂາທິການ ແລະ ພະນັກງານ-ວິຊາການ ພາຍໃນຄະນະເລຂາທິການສະພາປະຊາຊົນແຂວງ ຈາກ 6 ແຂວງ ເຂົ້າຮ່ວມ.
ເພື່ອເຮັດໃຫ້ການຈັດຕັ້ງປະຕິບັດພາລະບົດບາດ ຂອງສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າ, ການຄົ້ນຄວ້າ ພິຈາລະນາ ຮັບຮອງເອົານິຕິກຳ, ການຕົກລົງບັນຫາສໍາຄັນພື້ນຖານຂອງທ້ອງຖິ່ນ ແລະ ຕິດຕາມກວດກາການເຄົາລົບ, ການປະຕິບັດລັດຖະທໍາມະນູນ ແລະ ກົດ ໝາຍ ຂອງບັນດາອົງການລັດຂັ້ນທ້ອງຖິ່ນ ໃຫ້ມີຄວາມຖືກຕ້ອງ ສອດຄ່ອງກັບລະບຽບກົດໝາຍ; ເພື່ອແລກປ່ຽນບົດຮຽນວຽກງານຮອບດ້ານຂອງຄະນະເລຂາທິການສະພາປະຊາຊົນແຂວງໃນການຈັດຕັ້ງປະຕິບັດ ພາລະບົດບາດ, ສິດ ແລະ ໜ້າທີ່ ໃຫ້ມີຄວາມເຂັ້ມແຂງ ແລະ ມີປະສິດທິຜົນສູງກວ່າເກົ່າ;
ໃນກອງປະຊຸມຄັ້ງນີ້ ຄະນະເລຂາທິການສະພາປະຊາຊົນແຂວງ 6 ແຂວງ ໄດ້ຜັດປ່ຽນກັນຂຶ້ນສະເໜີ ບົດຮຽນກ່ຽວກັບການເປັນເສນາທິການວຽກງານຂອງຕົນ ເຊິ່ງມີ 6 ເນື້ອໃນຄື: ຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງຜົ້ງສາລີ ຂຶ້ນສະເໜີ ບົດຮຽນກ່ຽວກັບການເປັນເສນາທິການວຽກງານຮອບດ້ານ ໃຫ້ແກ່ຄະນະປະຈໍາສະພາປະຊາຊົນແຂວງ ໂດຍສະເພາະ ວຽກງານຄົ້ນຄວ້າ-ສັງລວມເນື້ອໃນ, ການຄຸ້ມຄອງວຽກງານບໍລິຫານ ແຜນການ-ການເງິນ, ການຄຸ້ມຄອງວຽກງານຈັດຕັ້ງ-ພະນັກງານ ແລະ ການພົວພັນປະສານງານ; ຮັບຟັງທ່ານ ມີໄຊ ມີວິໄລ ເລຂາທິການສະພາປະຊາຊົນແຂວງຫຼວງນໍ້າທາ ຂຶ້ນສະເໜີ ບົດຮຽນ ກ່ຽວກັບການກະກຽມ ຮ່າງບົດສະຫຼຸບການຈັດຕັ້ງປະຕິບັດແຜນການເຄື່ອນໄຫວວຽກງານ ຂອງຄະນະປະຈໍາສະພາປະຊາຊົນແຂວງ; ຮັບຟັງທ່ານ ນາງ ວັນສີ ພວງມະໄລ ເລຂາທິການສະພາປະຊາຊົນແຂວງອຸດົມໄຊ ຂຶ້ນສະເໜີ ບົດຮຽນ ກ່ຽວກັບການກະກຽມຮ່າງບົດສະຫຼຸບການຈັດຕັ້ງປະຕິບັດແຜນການການເຄື່ອນໄຫວວຽກງານຂອງຄະນະເລຂາທິການສະພາປະຊາຊົນແຂວງ; ຮັບຟັງທ່ານ ບຸນເພັດ ສີສົມບັດ ເລຂາທິການສະພາປະຊາຊົນແຂວງບໍ່ແກ້ວ ຂຶ້ນສະເໜີ ບົດຮຽນ ກ່ຽວກັບການກະກຽມ ສ້າງແຜນການ, ໜັງສືເຊີນ ແລະ ການສັງລວມບັນດາເນື້ອໃນ ໃຫ້ແກ່ກອງປະຊຸມປະທານ-ຮອງປະທານ ແລະ ກອງປະຊຸມຄະນະປະຈໍາສະພາປະຊາຊົນແຂວງ; ຮັບຟັງທ່ານ ສຸກມີໄຊ ສິງບຸນເຮືອງ ຮອງເລຂາທິການສະພາປະຊາຊົນແຂວງຫົວພັນ ຂຶ້ນສະເໜີບົດຮຽນ ກ່ຽວກັບການພົວພັນປະສານງານກັບບັນດາກົງຈັກການຈັດຕັ້ງພາຍໃນສະພາປະຊາຊົນແຂວງ, ອົງການປົກຄອງແຂວງ, ພາກສ່ວນທີ່ກ່ຽວຂ້ອງ ໃນການກະກຽມ ແລະ ສະໜອງຂໍ້ມູນໃຫ້ແກ່ການດໍາເນີນກອງປະຊຸມສະພາປະຊາຊົນແຂວງ; ຮັບຟັງທ່ານ ຄໍາຫຼ້າ ແສງຄໍາຢອງ ຮອງເລຂາທິການສະພາປະຊາຊົນແຂວງຊຽງຂວາງ ຂຶ້ນ ສະເໜີບົດຮຽນ ກ່ຽວກັບການກະກຽມ ຮ່າງບົດສະຫຼຸບການຈັດຕັ້ງປະຕິບັດແຜນການເຄື່ອນໄຫວວຽກງານຂອງສະພາປະຊາຊົນແຂວງ. ຫຼັງຈາກຂຶ້ນສະເໜີແຕ່ລະຫົວຂໍ້ແລ້ວ, ຜູ້ແທນກອງປະຊຸມກໍໄດ້ປະກອບຄໍາຄິດຄໍາເຫັນຕໍ່ກັບບັນດາເນື້ອໃນ ດ້ວຍຄວາມຮັບຜິດຊອບສູງ, ກົງໄປກົງມາ ແລະ ດ້ວຍບັນຍາກາດຟົດຟື້ນ ເພື່ອແລກປ່ຽນບົດຮຽນເຊິ່ງກັນ ແລະ ກັນ ພ້ອມທັງເປັນເອກະພາບຕໍ່ກັບບັນດາເນື້ອໃນ, ຫົວຂໍ້ ແລະ ແຕ່ລະບັນຫາທີ່ໄດ້ຍົກຂຶ້ນມາຄົ້ນຄວ້າປຶກສາຫາຂອງແຕ່ລະເນື້ອໃນ, ສ້າງບົດບັນທຶກຮ່ວມ ກ່ຽວກັບການຖອດບົດຮຽນ ແລະ ແລກປ່ຽນຂໍ້ມູນວຽກງານຕ່າງໆ ເພື່ອແນໃສ່ເຮັດໃຫ້ການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງຄະນະເລຂາທິການສະພາປະຊາຊົນໃນແຂວງ 6 ແຂວງພາກເໜືອ ໄດ້ປະສິດທິຜົນ ແລະ ມີຜົນສໍາເລັດດີຂື້ນເທື່ອລະກ້າວ.
ໃນກອງປະຊຸມຄັ້ງນີ້ ທ່ານ ທອງສີ ເສົາສຸລິພົມ ຮອງເລຂາພັກແຂວງ, ປະທານຄະນະປະຈຳສະພາປະຊາຊົນແຂວງຜົ້ງສາລີ ໄດ້ມີທິດຊີ້ນໍາໃຫ້ ຄະນະເລຂາທີິການສະພາປະຊາຊົນແຂວງໃນ 6 ແຂວງພາກເໜືອ ເປັນເຈົ້າການຈັດຕັ້ງຜັນຂະຫຍາຍເນື້ອໃນ,ບົດຮຽນທີ່ໄດ້ຄົ້ນຄວ້າແລກປ່ຽນບົດຮຽນຄັ້ງນີ້ ໃຫ້ເຂົ້າສູ່ວຽກງານຕົວຈິ່ງ ແລະ ເອົາໃຈໃສເປັນໃຈກາງໃນການພົວພັນປະສານງານວຽກງານ ດັ່ງນີ້:
- ຄະນະເລຂາທິການສະພາປະຊາຊົນແຂວງ ຕ້ອງຮັບຜິດຊອບຊີ້ນໍາໂດຍກົງ ຕໍ່ກັບໃນການປະສານງານ, ກະກຽມ ແລະ ດຳເນີນບັນດາເນື້ອໃນຮອບດ້ານທີ່ຈະນໍາເຂົ້າພິຈາລະນາໃນກອງປະຊຸມ ແຕ່ລະສະໄໝສາມັນ ຂອງສະພາປະຊາຊົນແຂວງ II ທີ່ຢູ່ໃນຄວາມຮັບຊອບຂອງຄະນະເລຂາທິການສະພາປະຊາຊົນແຂວງ ແລະ ຄົ້ນຄວ້າແບ່ງຄວາມຮັບຜິດຊອບໃຫ້ພະນັກງານພາຍໃນບັນດາຄະນະກຳມະການ ຕາມແຕ່ລະເນື້ອໃນ ເພື່ອຮັບປະກັນໄດ້ຄວາມສຳເລັດ ເປັນຕົ້ນ: 1.) ຄວາມຮັບຊອບດ້ານເນື້ອໃນ; 2.)ຄວາມຮັບຜິດຊອບວຽກງານບໍລິຫານ-ພິທີການ; 3.) ວຽກງານການເງິນ ແລະ)ວຽກງານສື່ມວນຊົນ.
- ໃຫ້ເພີ່ມທະວີຄວາມເອົາໃຈໃສ່ໃນການສ້າງ, ບຳລຸງ ແລະ ຝຶກອົບຮົມວຽກງານວິຊາສະເພາະອັນຈຳເປັນໃຫ້ແກ່ພະນັກງານຂອງຄະນະເລຂາທິການສະພາປະຊາຊົນແຂວງ. ພ້ອມກັນນັ້ນສ້າງໃຫ້ເຂົາເຈົ້າມິຈິດໃຈຮັກຊາດ, ຮັກລະບອບໃໝ່, ຮັກວິຊາອາຊີບຂອງຕົນເອງຢ່າງບໍ່ຮູ້ອິດຮູ້ເມື່ອຍ. ຕ້ອງເປັນເຈົ້າການປະສານສົມທົບ ແລະ ມີກົນໄກ ການພົວພັນແລກປ່ຽນດ້ານຂໍ້ມູນຂ່າວສານລະຫວ່າງແຂວງຕໍ່ແຂວງເປັນ ຕົ້ນແມ່ນ:ການຈັດຕັ້ງພາລະບົດບາດການເປັນເສນາທິການວຽກງານຮອບດ້ານຂອງຄະນະເລຂາທິການ ໃນໃຫ້ແກ່ຄະນະປະຈຳສະພາປະຊາຊົນແຂວງ ໃນວຽກງານຄົ້ນຄວ້າ-ສັງລວມເນື້ອໃນ, ການຄຸ້ມຄອງວຽກງານບໍລິຫານ, ແຜນການ ແລະ ການເງິນ, ການຄຸ້ມຄອງວຽກງານຈັດຕັ້ງ-ພະນັກງານ ແລະ ການພົວພັນປະສານງານ.
- ເອົາໃຈໃສ່ເພີ່ມທະວີ ການນໍາພາຂອງຄະນະນໍາຂອງຄະນະເລຂາທິການສະພາປະຊາຊົນແຂວງ ແລະ ຄວາມຮັບຜິດຊອບດ້ວຍການຫັນລົງສູ່ລວງເລີກເທື່ອລະກ້າວເຊັ່ນ: ຕ້ອງແໜ້ນຄວາມຮັບຜິດຊອບກ່ຽວກັບການ ນຳພາ- ຊີ້ນຳ, ຕິດຕາມກວດກາ ແລະ ຊຸກຍູ້ວຽກງານຢ່າງຮອບດ້ານ ຕາມແຜນການທີ່ກຳນົດໄວ້ ໃນນັ້ນ ບັນດາ ຂະແໜງການ ທີ່ຂຶ້ນກັບຄະນະເລຂາທິກາສນະພາປະຊາຊົນແຂວງຕ້ອງເປັນເຈົ້າການສ້າງແຜນດຳເນີນງານຂອງຕົນຢ່າງລະອຽດ (ແຜນວຽກ, ແຜນງົບປະມານ, ແຜນຄົນ)ນອກຈາກເຮັດວຽກງານການເມືອງແນວຄິດແລ້ວຕ້ອງໄດ້ແໜ້ນຄວາມຮັບຜິດຊອບທາງດ້ານການບໍລິຫານຮັບໃຊ້ແກ່ຄະນະນໍາຂອງສະພາປະຊາຊົນແຂວງ ໂດຍການປັບປຸງຄຸນນະພາບຂອງການບໍລິຫານຮັບໃຊ້ ດ້ວຍວິທະຍາ ສາດເຕັກນີກທີ່ທັນສະໄໝເປັນທີ່ຍອມຮັບຂອງຄະນະນໍາສະພາປະຊາຊົນແຂວງ ຢາກເຮັດໄດ້ແນວນັ້ນກ່ອນອື່ນໝົດ. ປັບປຸງແບບແຜນນຳພາ, ວິທີເຮັດວຽກ ບັນຫາຕັດສິນແມ່ນຄົນ, ຄົນນັ້ນຕ້ອງແມ່ນຜູ້ມີຄວາມຮູ້ຮັກອາຊີບຂອງຕົນ ແລະ ກ້າວປິດກອງປະຊຸມ ດ້ວຍຜົນສຳເລັດຕາມລະດັບຄາດໝາຍວາງໄວ້.
ກອງປະຊຸມ ແມ່ນໄດ້ຮັບການສະໜັບສະໜູນຈາກ ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPs).
ພາບ-ຂ່າວ: ສູນທອງ