(ສພຊ) – ເພື່ອຟັງການແນະນໍາກ່ຽວກັບການເຂົ້າຮ່ວມກອງປະຊຸມ ໂດຍສະເພາະລາຍລະອຽດດ້ານບໍລິຫານ, ພິທີການ, ພາຫະນະ, ຄວາມປອດໄພ, ສິ່ງອໍານວຍຄວາມສະດວກ ແລະ ອື່ນໆ; ວັນທີ 18 ຕຸລານີ້ ທີ່ຫໍປະຊຸມແຫ່ງຊາດ ໄດ້ມີກອງປະຊຸມພົບປະກັບກອງເລຂາແຫ່ງຊາດຂອງລັດຖະສະພາສັງເກດການໄອປາ ແລະ ລັດຖະສະພາສະມາຊິກໄອປາ ໂດຍການເປັນປະທານຂອງທ່ານ ປອ. ອາຄົມ ປຣະເສີດ ຮອງເລຂາທິການສະພາແຫ່ງຊາດ; ເຂົ້າຮ່ວມມີທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ (Siti Rozaimeriyanty Haji Abdul Rahman) ເລຂາທິການໃຫຍ່ໄອປາ, ບັນດາເລຂາຄະນະຜູ້ແທນລັດຖະສະພາສະມາຊິກໄອປາ ແລະ ເລຂາຄະນະຜູ້ແທນລັດຖະສະພາສັງເກດການໄອປາ ພ້ອມດ້ວຍແຂກຖືກເຊີນ.

ໃນກອງປະຊຸມ ໄດ້ມີການແນະນໍາ ແລະ ແຈ້ງຂໍ້ມູນກ່ຽວກັບວັນ, ເວລາ ແລະ ສະຖານທີ່ຈັດກອງປະຊຸມ, ສະຖານທີ່ພັກເຊົາ, ການສະໜອງພາຫະນະ ແລະ ພະນັກງານປະສານງານ, ພາສາທາງການ ແລະ ຕູ້ແປພາສາ ທີ່ນໍາໃຊ້ໃນກອງປະຊຸມ, ການກໍານົດເວລາສໍາລັບການປະກອບຄໍາເຫັນ, ຕາຕະລາງດຳເນີນກອງປະຊຸມ ແລະ ບັນດາວຽກງານປິ່ນອ້ອມຕ່າງໆ; ຈາກນັ້ນ, ກໍມີການປະກອບຄໍາເຫັນ, ປຶກສາຫາລືແລກປ່ຽນກັນ.

(ນາງ ອາລິນ ສຸພິມມະປະດິດ)