ເພື່ອຮັບປະກັນໃຫ້ແກ່ການຈັດຕັ້ງປະຕິບັດພາລະບົດບາດໃນການເຄື່ອນໄຫວວຽກງານຊົນເຜົ່າ – ສາສະໜາໃຫ້ສອດຄ່ອງ,ຖຶກຕ້ອງ,ຕາມລັດຖະທຳມະນູນ ແລະ ກົດໝາຍ ໃນວັນທີ 9 ພຶດສະພາ 2024 ສະພາປະຊາຊົນແຂວງຫລວງນ້ຳທາ ໄດ້ຈັດກອງປະຊຸມຝຶກອົບຮົມກ່ຽວກັບຄວາມຮູ້ ແລະ ຄວາມເຂົ້າໃຈຕໍ່ແນວທາງນະໂຍບາຍຂອງລັດຕໍ່ວຽກງານເຜົ່າ- ສາສະໜາ ຂື້ນຢູ່ທີ່ຫ້ອງປະຊຸມຊັ້ນ2ຂອງເມືອງສິງ ແຂວງຫລວງນ້ຳທາ ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ,  ເຂົ້າຮ່ວມມີທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການວັດທະນາທໍາ-ສັງຄົມ ແລະ ບັນດາເຜົ່າ,  ສະມາຊິກສະພາປະຊາຊົນແຂວງປະຈຳເຂດເລືອກຕັ້ງ 5 ເມືອງ, ແນວລາວສ້າງຊາດແຂວງ,  ເມືອງ, ພະແນກພາຍໃນແຂວງ, ເມືອງ ພ້ອມດ້ວຍແຂກຖຶກເຊີນ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ 30 ກວ່າທ່ານ.

ໃນວາລະກອງປະຊຸມ ທ່ານ ຄໍາຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ກ່າວເປີດກອງປະຊຸມຝຶກອົບຮົມຢ່າງເປັນທາງການ ກ່ອນອື່ນທ່ານໃຫ້ຮູ້ເຖີງຄວາມໝາຍ, ຄວາມສຳຄັນຂອງວຽກງານຊົນເຜົ່າ ແລະ ສາສະໜາ ພ້ອມທັງ ຮຽກຮ້ອງ ໃຫ້ນັກສໍາມະນາກອນ ຈົ່ງພ້ອມກັນສຸ່ມໃສ່ເຊື່ອມຊຶມ, ແລກປ່ຽນບົດຮຽນຊຶ່ງກັນ ແລະ ກັນ ກ່ຽວກັບວຽກງານເຜົ່າ-ສາສະໜາ, ແລະ ການປະຕິບັດພາລະບົດບາດ, ໜ້າທີ່ຂອງສະພາປະຊາຊົນແຂວງ, ແນວລາວສ້າງຊາດແຂວງ, ພະແນກພາຍໃນແຂວງ ຕໍ່ວຽກງານເຜົ່າ-ສາສະໜາ  ເພື່ອຍົກສູງຮັບປະກັນໃຫ້ການຈັດຕັ້ງປະຕິບັດວຽກງານເຜົ່າ-ສາສະໜາ ຢູ່ບັນດາເມືອງພາຍໃນແຂວງ ໃຫ້ຖຶກຕ້ອງສອດຄ່ອງຕາມກົດໝາຍ ແລະ ມີຄຸນນະພາບຂຶ້ນກວ່າເກົ່າ, ພ້ອມດຽວກັນ ນັກວິທະຍາກອນມາຈາກສະພາປະຊາຊົນແຂວງ, ແນວລາວສ້າງຊາດແຂວງ ແລະ ພະແນກພາຍໃນແຂວງ ໄດ້ຜັດປ່ຽນກັນຂຶ້ນບັນລະຍາຍເອກະສານ ເປັນຕົ້ນໃນຫົວຂໍ້; ແນວທາງຂອງພັກ-ນະໂຍບາຍຂອງລັດຕໍ່ວຽກງານຊົນເຜົ່າ ແລະ ສາສະໜາ; ການປະຕິບັດພາລະບົດບາດ ແລະ ໜ້າທີ່ຂອງແນວລາວສ້າງຊາດແຂວງຕໍ່ວຽກງານຊົນເຜົ່າ ແລະສາສະໜາ; ການຈັດຕັ້ງປະຕິບັດພາລະບົດບາດ ແລະ ໜ້າທີ່ຂອງພະແນກພາຍໃນແຂວງຕໍ່ກັບການຄຸ້ມຄອງວຽກງານຊົນເຜົ່າ ແລະ ສາສະໜາ; ການຕິດຕາມການຈັດຕັ້ງປະຕິບັດວຽກງານຊົນເຜົ່າ ແລະ ສາສະໜາ; ນອກນັ້ນ ນັກສຳມະນາກອນ ຍັງໄດ້ແລກປ່ຽນປະກອບຄຳຄິດເຫັນຢ່າງມີຈຸດສຸມຕໍ່ບັນດາເອກະສານ ໃນວຽກງານຊົນເຜົ່າ,ສາສະໜາ ທັງນີ້ ເພື່ອເຮັດໃຫ້ການຈັດຕັ້ງປະຕິບັດ ແລະ ການຄຸ້ມຄອງວຽກເຜົ່າ, ສາສະໜາ ພາຍໃນແຂວງ, ເມືອງ ໃຫ້ດີຂື້ນເທື່ອລະກ້າວ ແລະ ກອງປະຊຸມຝຶກອົບຮົມຈະໄດ້ດຳເນີນໄປເປັນເວລາ 2 ວັນເຕັມ.

ການຝຶກອົບຮົມຄັ້ງນີ້ແມ່ນທຶນຊ່ວຍເຫລືອລ້າຈາກໂຄງການສະເຕັບ (STEPS)