​ໃນວັນທີ 20-21 ພະຈິກ 2024 ທີ່ຫ້ອງປະຊຸມໃຫຍ່ສະພາປະຊາຊົນແຂວງຫຼວງພະບາງ ໄດ້ຈັດກອງປະຊຸມຝຶກອົບຮົມການເສີມສ້າງຂີດຄວາມສາມາດໃນການຕິດຕາມ, ກວດກາການເກັບກໍາ-ສັງລວມຂໍ້ມູນກ່ຽວກັບວຽກງານການປົກປ້ອງສິດຜົນປະໂຫຍດຂອງແມ່ຍິງ-ເດັກນ້ອຍ ແລະ ການຕ້ານການຄ້າມະນຸດ ໂດຍການເປັນປະທານຮ່ວມ ທ່ານ ສິງຕັນ ໄຊລືຊົ່ງ ຮອງປະທານສະພາປະຊາຊົນແຂວງຫຼວງພະບາງ ແລະ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງ ຄໍາມ່ວນ ມີຜູ້ເຂົ້່າຮ່ວມມາຈາກສະພາແຫ່ງຊາດ, ສະພາປະຊາຊົນແຂວງຄໍາມ່ວນ, ສະມາຊິກສະພາປະຊາຊົນແຂວງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ, ສະຫະພັນແມ່ຍິງແຂວງ ແລະ ສະຫະພັນແມ່ຍິງເມືອງເຂົ້າຮ່ວມ ທັງໝົດ 64ທ່ານ, ຍິງ 39 ທ່ານ .

ກອງປະຊຸມຝຶກອົບຮົມການເສີມສ້າງຂີດຄວາມສາມາດໃນການຕິດຕາມ, ກວດກາການເກັບກໍາ-ສັງ ລວມຂໍ້ມູນກ່ຽວກັບວຽກງານປົກປ້ອງສິດຜົນປະໂຫຍດຂອງແມ່ຍິງ-ເດັກ ແລະ ການຕ້ານການຄ້າມະນຸດໄດ້ດຳເນີນມາເປັນເວລາ 2 ວັນເຕັມ, ຕາມຈຸດປະສົງລະດັບຄາດໝາຍທີ່ວາງໄວ້, ກອງປະຊຸມໄດ້ນໍາເອົາ 4 ຫົວຂໍ້ວຽກງານທີ່ສໍາຄັນມາຄົ້ນຄວ້າແລກປ່ຽນບົດຮຽນມີດັງນີ້: 1). ສິດທິມະນຸດ, ສິດພົນລະເມືອງ; 2). ສະພາບການໃຊ້ຄວາມຮຸນແຮງ ແລະ ມາດຕະຖານດໍາເນີນງານການປົກປ້ອງ ແລະ ຊ່ວຍເຫຼືອອັນຈຳເປັນທາງດ້ານສັງຄົມ ແກ່ຜູ້ຖືກເຄາະຮ້າຍຈາກຄວາມຮຸນແຮງ; 3). ສະພາບການຄ້າມະນຸດ, ການປົກປ້ອງ, ຊ່ວຍເຫຼືອ ແລະ ສົ່ງຕໍ່ຜູ້ຖືກເຄາະຮ້າຍຈາກການຄ້າມະນຸດ; 4).ແລກປ່ຽນການຈັດຕັ້ງຜັນຂະຫຍາຍ ແຜນດໍາເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງ ຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 5 ປີ ຄັ້ງທີ II (2021-2025) ໂດຍອົງການຈັດຕັ້ງທາງສັງຄົມ.

​

ເພື່ອສືບຕໍ່ຜັນຂະຫຍາຍຜົນສຳເລັດກອງປະຊຸມຝຶກອົບຮົມໃນຄັ້ງນີ້, ກອງປະຊຸມຮຽກຮ້ອງມາຍັງ ນັກສໍາມະນາກອນ ຈົ່ງນໍາເອົາບົດຮຽນໃນການຝຶກອົບຮົມຄັ້ງນີ້ ໄປຈັດຕັ້ງຜັນຂະຫຍາຍ ແລະ ປະຕິບັດໃຫ້ປະກົດຜົນເປັນຈິງ, ເພື່ອປະກອບສ່ວນເຂົ້າໃນການປະຕິບັດພາລະກິດປົກປັກຮັກສາ ແລະ ສ້າງສາພັດທະນາແຂວງ, ເມືອງ ຂອງຕົນໃຫ້ມີຄວາມຈະເລີນຮຸ່ງເຮືອງຕະຫຼອດໄປ ແລະ ແກ້ໄຂບັນຫາການປົກປ້ອງຜົນປະໂຫຍດຂອງແມ່ຍິງ ແລະ ເດັກ ກໍ່ຄືການຕ້ານການຄ້າມະນຸດ ໃຫ້ໄດ້ຮັບຜົນດີກວ່າເກົ່າ.

ໃນຕອນທ້າຍນີ້ ປະທານກອງປະຊຸມຍັງໄດ້ເນັ້ນກ່ຽວກັບບັນຫາສໍາຄັນໃຫ້ນໍາໄປຈັດຕັ້ງປະຕິບັດຕໍ່ກັບ ສະພາບການໃຊ້ຄວາມຮຸນແຮງ ແລະ ມາດຕະຖານດໍາເນີນງານການປົກປ້ອງ ແລະ ຊ່ວຍເຫຼືອອັນຈຳເປັນທາງດ້ານສັງຄົມໃຫ້ດີຂຶ້ນ.

​​​​​​ຂ່າວແລະພາບ ຄໍາຫຼ້າ ພອນພິລາ