ໃນວັນທີ 13 ຕຸລາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມປະເມີນພະນັກງານ-ລັດຖະກອນ ​ແລະ ປະ​ເມີນ​ການ​ແຂ່ງຂັນ-​ຍໍ​ຍ້ອງ ປະ​ຈໍາປີ 2022 ຂອງສະພາປະຊາຊົນແຂວງ ຂຶ້ນໂດຍການເປັນປະທານ ຂອງທ່ານ ວຽງ​​​ໄຊ ສີວິ​ໄລ ກໍາມະການ​ພັກ​ແຂວງ ຮອງປະທານສະພາປະຊາຊົນແຂວງ ໃຫ້ກຽດເຂົ້າຮ່ວມມີຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ແລະ ພະນັກງານສະພາປະຊາຊົນ​ແຂວງເຂົ້າຮ່ວມ.

​        ຈຸດປະສົງ​ໃນ​ການ​ດໍາ​ເນີນ​ກອງ​ປະຊຸມ​ໃນ​ຄັ້ງ​ນີ້  ​ເພື່ອ​ເປັນ​ການສະຫຼຸບຕີ​ລາຄາ​ການຈັດ​ຕັ້ງ​ປະຕິບັດ​ວຽກງານ ຂ​ອງ​ພະນັກງານ​ສະພາ​ປະຊາຊົນ​ແຂວງ ​ໃນ​ການ​ປະ​ເມີນ​ຄັ້ງ​ນີ້​ໄດ້​ປະ​ເມີນ​ການ​ແຂ່ງຂັນ​-ຍ້​ອງຍໍ ປະ​ຈໍາປີ 2022 ຕາມ 6 ​ຂໍ້​ແຂ່ງ​ຂອງ​ສະພາ​ປະຊາຊົນ​ແຂວງ​ຄື: ໜັກ​ແໜ້ນທາງ​ດ້ານວຽກງານ​ການ​ເມືອງ​ແນວ​ຄິດ ​ແລະ ດ້ານ​ຄຸນສົມບັດ​ສິນ​ທໍາ​ປະຕິບັດ, ມີ​ແບບ​ແຜນ​ວິທີ​ເຮັດ​ວຽກທີ່​ດີ, ມີ​ຫົວຄິດ​ປະດິດ​ສ້າງ​ໃນໜ້າທີ່​ວຽກງານ, ມີ​ຄວາມ​ກະ​ຕືລື​ລົ້ນ, ສຸມ​ຈິດ​ໃຈ​ຕໍ່ໜ້າທີ່​ວຽກງານ, ມີ​ຄວາມ​​​​ໂປ່​ງ​ໃສ, ຍຸຕິ​ທໍາ, ຮັບຜິດຊອບລ້ອນໜ້າທີ່​ຕາມ​ການ​ມອບໝາຍ, ມີ​ຄວາມ​ສາມັກຄີ-​ມີ​ຄວາມ​ເປັນ​ເອກະ​ພາບ​ໃນ​ວຽກງານ​ຕ່າງໆ

ຕາມ​ມະຕິ​ຂອງ​ພັກ, ອົງການ​ຈັດ​ຕັ້ງ​ມະຫາຊົນ ​ແລະ ສະພາ​ປະຊາຊົນ​ແຂວງ, ຕັ້ງໜ້າ​ເຝຶກ​ຝົນຫຼໍ່ຫຼອມຕົນ​ເອງໃນ​ການ​ຊອກ​ຮູ້​ຮໍ່າຮຽນ​ໃນ​ດ້ານ​ຕ່າງໆ ​ເພື່ອ​ຍົກ​ສູງ​ຄວາມ​ຮູ້, ຄວາມ​ສາມາດ​ຂອງ​ຕົນ​ຢ່າງ​ບໍ່​ຢຸດ​ຢັ້ງ ​ແລະ ​ເຂົ້າ​ຮ່ວມ​ຂະ​ບວນການ​ຕ່າງໆຢ່າງ​ເຂັ້ມ​ແຂງ, ຟົດ​ຟື້ນ, ຊື່ສັດ​ບໍລິສຸດ ​ແລະ ຈິງ​ໃຈ​ຮັບ​ເອົາ​ການ​ຕໍາ​ນິສົ່ງ​ຂ່າວ​ຈາກ​ການຈັດ​ຕັ້ງ ​ແລະ ​ເພື່ອ​ຮ່ວມ​ງານ. ໃນ​ໂອກາດ​ດັ່ງກ່າວ ທ່ານ ວຽງ​​​ໄຊ ສີວິ​ໄລ ໄດ້ມີຄໍາເຫັນໂອ້ລົມຕໍ່ພະນັກງານສະພາປະຊາຊົນແຂວງ ​ຈົ່ງສືບຕໍ່ປະຕິບັດໜ້າທີ່ວຽກງານຂອງສະພາປະຊາຊາຊົນແຂວງໃຫ້ມີຜົນສໍາເລັດດີຂຶ້ນ, ຮັກສາຄວາມສາມັກຄີພາຍໃນໃຫ້ດີຂຶ້ນກວ່າເກົ່າ ແລະ ການໃຫ້ຄະແນນໃນການປະເມີນບໍ່ໃຫ້ມີແນວຄິດອະຄະຕິຕໍ່​ຜູ​້ຖືກ​ປະ​ເມີນ, ການ​ປະ​ເມີນ​ຕ້ອງ​ມີຄວາມໂປ່ງໃສສາມາດກວດສອບໄດ້.

ສະພາ​ປະຊາຊົນ​ແຂວງ​ຊຽງຂວາງ

ຂ່າວ​​ໂດຍ: ນາງ ສຸກ​ສະຫວັນ ​ອິນທະ​ແສງ