ໃນວັນທີ 23 ກໍລະກົດ 2024 ທີ່ສະໂມສອນ 21 ມີນາ ແຂວງຄໍາມ່ວນ ຄະນະກຳມະການລະດັບຊາດ ປັບປຸງລັດຖະທຳມະນູນ ແຫ່ງ ສປປ ລາວ ໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບ ປີ 2015 ໂດຍການເປັນປະທານ ຂອງທ່ານ ຄໍາໃບ ດຳລັດ ຮອງປະທານສະພາແຫ່ງຊາດ, ເຂົ້າຮ່ວມມີ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ; ມີບັນດາທ່ານ ຄະນະປະຈໍາພັກແຂວງ, ຄະນະປະຈໍາສະພາປະຊາຊົນຂັ້ນແຂວງ, ຄະນະຮັບຜິດຊອບປັບປຸງລັດຖະທຳມະນູນ ຈາກສະພາແຫ່ງຊາດ, ບັນດາທ່ານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12, ຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ບັນດາທ່ານເຈົ້າເມືອງ, ຫົວໜ້າ/ຮອງຫົວໜ້າພະແນກການ, ອົງການທຽບເທົ່າພະແນກ, ອະດີດການນຳຂອງແຂວງ ແລະ ຕະຫລອດຮອດແຂກຖືກເຊີນເຂົ້າຮ່ວມ.

 

   

      ໃນພິທີເປີດ, ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ໄດ້ກ່າວວ່າ: ລັດຖະທໍາມະນູນ ສະບັບທໍາອິດຂອງ ສປປ ລາວ ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການ ໃນປີ 1991, ຜ່ານການຈັດຕັ້ງປະຕິບັດມາຮອດປັດຈຸບັນ ມາເປັນເວລາ 33 ປີ, ໃນໄລຍະຜ່ານມາ ກໍໄດ້ມີການປັບປຸງ 2 ຄັ້ງ ຄື: ການປັບປຸງປີ 2003 ແລະ ປີ 2015. ການຈັດຕັ້ງປະຕິບັດ ລັດຖະທໍາມະນູນ ສະບັບປີ 2015 ມາຮອດປັດຈຸບັນ ເປັນເວລາ 9 ປີ ຊຶ່ງໄດ້ເປັນກົດໝາຍພື້ນຖານສໍາຄັນຂອງປະເທດຊາດ, ເປັນບ່ອນອີງໃຫ້ແກ່ການສ້າງ ແລະ ປັບປຸງບັນດາກົດໝາຍ ເພື່ອເປັນເຄື່ອງມືຂອງລັດ ໃນການຄຸ້ມຄອງລັດ, ຄຸ້ມຄອງເສດຖະກິດ – ສັງຄົມ ດ້ວຍກົດໝາຍ. ເພື່ອຕອບສະໜອງຄວາມຮຽກຮ້ອງຕ້ອງການ ໃນການຈັດຕັ້ງປະຕິບັດແນວທາງປ່ຽນແປງໃໝ່ຢ່າງຮອບດ້ານ ມີຫລັກການຂອງພັກເຮົາໃນຕໍ່ໜ້າ, ຄະນະບໍລິຫານງານສູນກາງພັກ ສະໄໝທີ XI ໄດ້ອອກມະຕິ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ເຂົ້າສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ, ຕໍ່ມາກົມການເມືອງສູນກາງພັກ ໄດ້ອອກມະຕິ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່. ທັງສອງມະຕິດັ່ງກ່າວນີ້, ໄດ້ຮຽກຮ້ອງໃຫ້ລັດເຮົາ ຕ້ອງໄດ້ປັບປຸງລັດຖະທໍາມະນູນ ແຫ່ງ ສປປ ລາວ ສະບັບປີ 2015 ໃຫ້ສອດຄ່ອງກັບໜ້າທີ່ການເມືອງ ຂອງພັກ ແລະ ລັດເຮົາ ໃນໄລຍະໃໝ່, ເພື່ອຄົ້ນຄວ້າ, ປັບປຸງ ລັດຖະທຳມະນູນໃຫ້ທັນເວລາ, ກົມການເມືອງສູນກາງພັກໄດ້ອອກມະຕິ ວ່າດ້ວຍການແຕ່ງຕັ້ງຄະນະກໍາມະການລະດັບຊາດ ປັບປຸງລັດຖະທໍາມະນູນ ແລະ ເພື່ອເຮັດໃຫ້ ການປະເມີນຜົນການຈັດຕັ້ງປະຕິບັດລັດຖະທຳມະນູນຢູ່ແຂວງຄໍາມ່ວນ ໄດ້ຮັບໝາກຮັບຜົນ ແລະ ແທດເໝາະກັບສະພາບການຕົວຈິງ, ຂໍສະເໜີໃຫ້ບັນດາທ່ານຈົ່ງລົງເລິກຕີລາຄາການຈັດຕັ້ງປະຕິບັດລັດຖະທຳມະນູນ ໂດຍຕິດພັນກັບການປະຕິບັດກົດໝາຍ ແລະ ນິຕິກໍາໃຕ້ກົດໝາຍ ຂອງບັນດາຂະແໜງການ, ອົງການຂັ້ນແຂວງ, ຂັ້ນເມືອງ ແລະ ຂັ້ນຮາກຖານ ທົ່ວແຂວງ ເປັນຕົ້ນການສ້າງຄວາມຮັບຮູ້, ເຂົ້າໃຈທີ່ຖືກຕ້ອງຕໍ່ລັດຖະທຳມະນູນ ແລະ ກົດໝາຍ ຕິດພັນກັບການສ້າງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ ໃນຖັນແຖວພະນັກ ງານ-ລັດຖະກອນ, ສະມາຊິກພັກ, ນັກຮຽນຮູ້ປັນຍາຊົນ, ນັກທຸລະກິດ ແລະ ປະຊາຊົນບັນດາເຜົ່າ. ພ້ອມກັນນີ້, ກໍໃຫ້ສະເໜີຄໍາຄິດຄໍາເຫັນຕໍ່ການປັບປຸງເນື້ອໃນຂອງລັດຖະທຳມະນູນ ໂດຍສະເພາະການປັບປຸງໝວດວ່າດ້ວຍສະພາປະຊາຊົນຂັ້ນແຂວງ, ໝວດວ່າດ້ວຍອົງການປົກຄອງທ້ອງຖິ່ນ; ການປະຕິບັດສິດ ແລະ ພັນທະຂອງພົນລະເມືອງລາວ, ຊາວຕ່າງດ້າວ ແລະ ຜູ້ບໍ່ມີສັນຊາດ ຢູ່ແຂວງຄໍາມ່ວນ.

 

     ກອງປະຊຸມຄັ້ງນີ້, ໄດ້ຮັບຟັງການສະເໜີບົດປະເມີນຜົນການຈັດຕັ້ງປະຕິບັດ ລັດຖະທຳມະນູນ ສະບັບປີ 2015 ແລະ ຮັບຟັງບົດຄົ້ນຄວ້າປະກອບຄໍາເຫັນຈາກຕາງໜ້າແຕ່ລະຂົງເຂດຄື: ແນວລາວສ້າງຊາດແຂວງ, ສະພາປະຊາຊົນຂັ້ນແຂວງ, ອົງການປົກຄອງແຂວງ, ອົງການໄອຍະການປະຊາຊົນແຂວງ, ກອງບັນຊາການ ປກສ ແຂວງ, ສະພາການຄ້າ ແລະ ອຸດສາຫະກຳແຂວງ, ເມືອງ ແລະ

 

   ການປະກອບຄໍາຄິດຄໍາເຫັນ, ຂໍ້ສະເໜີຂອງບັນດາທ່ານຜູ້ເຂົ້າຮ່ວມກອງປະຊຸມຕໍ່ເນື້ອໃນລັດຖະທຳມະນູນ ແຫ່ງ ສປປ ລາວ ສະບັບປີ 2015 ເພື່ອເປັນຂໍ້ມູນໃນການຄົ້ນຄວ້າ, ປັບປຸງເນື້ອໃນໃຫ້ແກ່ ຄະນະກຳມະການລະດັບຊາດ ປັບປຸງລັດຖະທຳມະນູນ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ ແລະ ລັດເຮົາ ໃນໄລຍະ ໃໝ່.

ໂດຍ: ເອື້ອ ມະໂນສິງ