​ ເພື່ອເຮັດໃຫ້ເນື້ອໃນຄໍາຂວັນ ແລະ ຂໍ້ແຂ່ງຂັນ 4 ບຸກຂອງໜ່ວຍຮາກຖານຊາວໜຸ່ມສະພາປະຊາຊົນແຂວງໄດ້ຮັບການ ຈັດຕັ້ງຜັນ ຂະຫຍາຍຕິດພັນກັບຂະບວນການຮັກຊາດ ແລະ ພັດທະນາ, ສະນັ້ນ, ມາໃນ​ວັນ​ທີ 6  ຕຸລາ 2023 ນີ້, ຢູ່ທີ່​ສະພາ​ປະຊາຊົນ​ແຂວງ​ ໜ່ວຍຮາກຖານຊາວໜຸ່ມສະພາປະຊາຊົນ​ ແຂວງຊຽງ​ຂວາງ ໄດ້ເປີດກອງປະຊຸມເມີນຂໍ້​ແຂ່ງ​ຂັນ 4 ບຸກປະ​ຈຳ​ປີ 2023 ຂຶ້ນ ​ໂດຍ​ການ​ເປັນ​ປະທານ ຂອງ​ສະຫາຍ ວຽງໄຊ ສີວິໄລ ກໍາມະການພັກແຂວງ ​ຮອງປະທານ​ສະພາ​ປະຊາຊົນ​ແຂວງ, ມີຄະນະໜ່ວຍພັກສະພາປະຊາຊົນແຂວງ, ​ເລຂາໜ່ວຍຊາວໜຸ່ມ, ຕ່າງໜ້າອົງການຈັດຕັ້ງມະຫາຊົນຂອງສະພາປະຊາຊົນແຂວງ ​ແລະ ບັນດາສະ​ມາ​ຊິກຊາວໜຸ່ມ​ສະພາ​ປະຊາຊົນ​ແຂວງ ​ເຂົ້າ​ຮ່ວມ​.

​            ໃນ​ກອງ​ປະຊຸມ​ໄດ້​ຮັບ​ຟັງຮ່າງ​ບົດ​ສະຫຼຸບປະ​ເມີນ​ຜົນການ​ຈັດ​ຕັ້ງ​ປະ​ຕິ​ບັດ ຂໍ້​ແຂ່ງ​ຂັນ 4 ບຸກປະ​ຈຳ​ປີ 2023 ແລະ ທິດ​ທາງ​ແຜນ​ການປີ 2024 ຂອງໜ່ວຍຮາກຖານ​ຊາວ​ໜຸ່ມສະພາປະຊາຊົນແຂວງ ໄດ້ເອົາໃຈໃສ່ສຶກສາອົບຮົມການ​ເມືອງ-​ແນວ​ຄິດ ໃຫ້ສະມາຊິກ​ໃຫ້ເຊື່ອໝັ້ນຕໍ່ການນຳພາຂອງພັກມີຄວາມສາມັກຄີພາຍໃນ, ເອົາໃຈໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເອກະສານທີ່ສຳຄັນຂອງອົງການຈັດຕັ້ງຕ່າງໆ, ​ສາ​ມາດ​ຍົກ​ລະ​ດັບ​ຄວາມ​ຮູ້​ຄວາມ​ສາ​ມາດ​ດ້ານ​ຕ່າງໆໂດຍເຫັນໄດ້ຈາກສະມາຊິກຊາວໜຸ່ມພວກເຮົາ ໄດ້ຮັບການຍົກລະດັບຄວາມຮູ້, ຄວາມສາມາດດ້ານຕ່າງໆ, ເອົາໃຈໃສ່ປັບປຸງການຈັດຕັ້ງ ໂດຍສະເພາະແມ່ນໄດ້ປະສານສົມທົບກັບຄະນະບໍລິຫານງານຊາວໜຸ່ມແຂວງ ໃຫ້ມີຄວາມເຂັ້ມແຂງທາງດ້ານການຈັດຕັ້ງ, ດ້ານແບບແຜນການຊີ້ນຳ-ນຳພາ, ແບບແຜນວິທີເຮັດວຽກ, ປະຕິບັດຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ແບ່ງຄວາມຮັບຜິດຊອບໃຫ້ບຸກຄົນລະອຽດຈະແຈ້ງ, ມີການຕິດຕາມກວດກາ, ສະຫຼຸບສ່ອງແສງລາຍງານເປັນປົກກະຕິ, ແນ່ໃສ່ເພື່ອເຮັດໃຫ້ການເຄື່ອນໄຫວວຽກງານມີຜົນສຳເລັດເຄື່ອນໄຫວຕາມພາລະບົດບາດ, ໄດ້ພ້ອມກັນສຸມໃສ່ເຂົ້າຮ່ວມການສ້າງຂະບວນກິລາ, ຂະບວນການອອກແຮງງານຕ່າງໆ ຢູ່ພາຍໃນ ແລະ ຮ່ວມກັບພະແນກການອອ້ມຂ້າງແຂວງຕ້ອນຮັບວັນສຳຄັນຕ່າງໆ ​ແລະ ທິດ​ທາງ​ແຜນ​ການປີ 2024 ຂອງໜ່ວຍຮາກຖານ​ຊາວ​ໜຸ່ມສະພາປະຊາຊົນແຂວງ ຈະ​ສືບຕໍ່ສຶກສາ​ອົບຮົມ​ດ້ານ​ການ​ເມືອງ-​ແນວ​ຄິດໃຫ້​ສະມາຊິກ​, ​ສືບຕໍ່ປັບປຸງສະມາຊິກພາຍໃນໃຫ້​ເຂັ້ມ​ແຂງ​ ເພື່ອ​ກຽມພ້ອມ​ຮັບ​ໃຊ້​ໜ້າ​ທີ່​ການ​ເມືອງທີ່​ພັກ-ລັດມອບໝາຍໃຫ້, ພ້ອມກັນຈັດຕັ້ງປະຕິບັດປຸກລະດົມກຳລັງແຮງ ຂອງຊາວໜຸ່ມຈັດຕັ້ງຜັນຂະຫຍາຍຂະບວນການແຂ່ງຂັນຮັກຊາດ ແລະ ພັດທະນາ, ວຽກງານ 3 ສ້າງຂອງພັກໃນໄລຍະໃໝ່ດ້ວຍຂະບວນການ 4 ບຸກຂອງຊາວໜຸ່ມວາງອອກໃຫ້ໄດ້ດີຂຶ້ນກວ່າເກົ່າ. ເອົາໃຈໃສ່ຝຶກຝົນຫລໍ່ຫຼອມສະມາຊິກຊາວໜຸ່ມ, ສົ່ງເສີມສະມາຊິກຊາວໜຸ່ມທຸກສະຫາຍ ໃຫ້ນຳໃຊ້ຄວາມຮູ້ຄວາມສາມາດ, ລະດັບວິຊາສະເພາະ, ເຕັກນິກວິທະຍາສາດທີ່ໄດ້ຮຽນມາ, ​ໃນໂອກາດດັ່ງກ່າວ ໄດ້ມອບ-ຮັບໃບຍ້ອງຍໍຊາວໜຸ່ມ 4 ບຸກຂອງສະພາປະຊາຊົນແຂວງ ປະຈໍາປີ 2022 ໃຫ້ໜ່ວຍຮາກຖານຊາວໜຸ່ມສະພາປະຊາຊົນແຂວງ ແລະ ສະມາຊິກຮາກຖານຊາວໜຸ່ມສະພາປະຊາຊົນແຂວງ ປະເພດແຂວງ ຈໍານວນ28 ສະຫາຍ, ຍິງ 15 ສະຫາຍ.

​ໃນ​ໂອກາດດັ່ງກ່າວສະຫາຍ ວຽງໄຊ ສີວິໄລ  ໄດ້​ຍ້ອງຍໍ​ຊົມ​ເຊີຍ​ຕໍ່​ກັບ​ຜົນງານ​ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ ​ໂດຍ​ສະ​ເພາະ​ແມ່ນ​ດ້ານ​ການ​ເມືອງ​​ແນວ​ຄິດ, ດ້ານ​ຄວາມ​ສາມັກຄີ​ພາຍ​ໃນ, ດ້ານ​ການ​ປະຕິບັດ​ໜ້າ​ທີ່ວຽກ​ງານ ​ແລະ ​ຄວາມ​ຕັ້ງໜ້າຫ້າວຫັນ​ໃນ​ການ​ປະກອບສ່ວນ​ເຂົ້າ​ໃນ​ວຽກ​ງານ​ຂອງ ໜ່ວຍຊາວໜຸ່ມກໍ່​ຄື​ການ​ເຮັດ​ວຽກ​ງານ​ຢູ່​ໃນ​ສະພາ​ປະຊາຊົນ​ແຂວງ ​ແລະ ທ່ານ​ຍັງ​ໄດ້​ເນັ້ນ​ຕື່ມ​ອີກ​ວ່າ​ໃຫ້​ສຶບຕໍ່​ ​ເຊື່ອມ​ຊຶມ​ບັນດາ​ມະຕິ​, ຄໍາ​ສັ່ງ, ລັດຖະທໍາ​ມະນູນ ​ແລະ ​ກົດໝາຍ​ຕ່າງໆ, ​ເພີ່​ມທະວີ​ເອົາ​ໃຈ​ໃສ່​ໃນ​ການ​ເຮັດວຽກ​ເປັນ​ໝູ່​ຄະນະ, ຮັກສາ​ມູນ​ເຊື້ອຄວາມ​ສາມັກຄີ​ພາຍ​ໃນ ​ແລະ ​ພາຍນອກໃຫ້ກວ້າງຂວາງ.

ສະພາ​ປະຊາຊົນ ​ແຂວງ​ຊຽງ​ຂວາງ

ຂ່າວ​ໂດຍ: ນາງ ສຸກ​ສະຫວັນ ອິນທະ​ແສງ