ຕອນເຊົ້າຂອງຈັນວັນທີ 25 ເມສາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມຄະນະປະຈໍາສະພາປະຊາຊົນແຂວງອຸດົມໄຊ ປະຈໍາເດືອນ ເມສາ 2022, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງອຸດົມໄຊ, ມີບັນດາທ່ານໃນຄະນະປະຈໍາສະພາປະຊາຊົນແຂວງ ເຂົ້າຮ່ວມ.

ກອງປະຊຸມພາຍຫຼັງປະທານໄດ້ສະເໜີຈຸດປະສົງແລ້ວ ໄດ້ຮັບຟັງການຜ່ານຮ່າງບົດສະຫລຸບການເຄື່ອນໄຫວວຽກງານປະຈໍາເດືອນ ເມສາ ແລະ ວາງທິດທາງແຜນການປະຈໍາເດືອນ ພຶດສະພາ ປີ 2022 ຂອງຄະນະປະຈໍາສະພາປະຊາຊົນແຂວງອຸດົມໄຊ ສະເໜີໂດຍທ່ານ ນາງ ວັນສີ ພວງມະໄລ ກຳມະການປະຈໍາ ສພຂ, ເລຂາທິການ ສພຂ ຫຼັງຈາກນັ້ນ, ກອງປະຊຸມໄດ້ປະກອບຄໍາຄິດຄໍາເຫັນໃສ່ຮ່າງບົດສະຫລຸບການເຄື່ອນໄຫວວຽກງານປະຈໍາເດືອນດັ່ງກ່າວຢ່າງກົງໄປກົງມາ.

ພ້ອມດຽວກັນນັ້ນກອງປະຊຸມຄັ້ງນີ້ ຍັງໄດ້ຜ່ານຮ່າງບົດຄົ້ນຄວ້າການສ້າງຕັ້ງ ແລະ ບົດບັນທຶກຊ່ວຍຈໍາ ການຮ່ວມມືໄມຕີຈິດມິດຕະພາບ ລະຫວ່າງ ສະພາປະຊາຊົນແຂວງອຸດົມໄຊ ແຫ່ງ ສປປ ລາວ ກັບ ສະພາຜູ້ແທນປະຊາຊົນແຂວງຢູນນານ ແຫ່ງ ສປ ຈີນ, ຈຸດປະສົງຂອງຮ່າງບົດຄົ້ນຄວ້າການສ້າງຕັ້ງ ແລະ ບົດບັນທຶກຊ່ວຍຈໍາດັ່ງກ່າວແມ່ນເພື່ອຮັດແໜ້ນ ແລະ ພັດທະນາສາຍພົວພັນມິດຕະພາບອັນເປັນມູນເຊື້ອລະຫວ່າງ ສປປ ລາວ ແລະ ສປ ຈີນ ໃຫ້ກ້າວຂຶ້ນອີກບາດກ້າວໜຶ່ງ, ຊຸກຍູ້ການແລກປ່ຽນການຮ່ວມມື ລະຫວ່າງ ອົງການນິຕິບັນຍັດທ້ອງຖິ່ນຂອງສອງຝ່າຍ, ຈັດຕັ້ງປະຕິບັນແຜນແມ່ບົດວ່າດ້ວຍການສ້າງຄູຮ່ວມຊະຕາກໍາລາວ-ຈີນ, ໂດຍສະເພາະແມ່ນສະພາປະຊາຊົນແຂວງອຸດົມໄຊ ແຫ່ງ ສປປລາວ ແລະ ສະພາຜູ້ແທນປະຊາຊົນແຂວງ ຢູນນານ ແຫ່ງ ສປ ຈີນ. ຜ່ານການຄົ້ນຄວ້າ ແລະ ປຶກສາຫາລືກັນຂອງບັນດາທ່ານຄະນະປະຈໍາສະພາປະຊາຊົນແຂວງ ໄດ້ຕົກລົງເປັນເອກະພາບກັນຈະໄດ້ຈັດກອງປະຊຸມຮ່ວມໃນມໍ່ໆນີ້ ກັບ ພະແນກການຕ່າງປະເທດ, ຫ້ອງວ່າການແຂວງ ແລະ ຄະນະປະຈໍາສະພາປະຊາຊົນແຂວງ ເພື່ອປຶກສາຫາລືກັນ ແລະ ປັບປຸງເນື້ອໃນບົດດັ່ງກ່າວເປັນຄັ້ງສຸດທ້າຍ ເມື່ອເຫັນດີເປັນເອກະພາບແລ້ວແມ່ນຈະສົ່ງໃຫ້ຝ່າຍ ສປ ຈີນ ຄົ້ນຄວ້າ ແລະ ເຫັນດີລົງນາມກັນໃນຂັ້ນຕອນຕໍ່ໄປ.