ວັນທີ 28 ມັງກອນ 2025 ທີ່ສະພາປະຊາຊົນແຂວງຄຳມ່ວນ ໄດ້ເປີດກອງປະຊຸມ ປະຈໍາປີ 2024 ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ (ຄສຊຂ.12) ໂດຍການເປັນປະທານຂອງທ່ານ ບຸນມີ ພິມມະສອນ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ເປັນກຽດເຂົ້າຮ່ວມ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ, ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12; ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາທ່ານຄະນະປະຈໍາພັກແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ຄະນະປະຈໍາສະພາປະຊາຊົນຂັ້ນແຂວງ, ສະມາຊິກສະພາປະຊາຊົນຂັ້ນແຂວງ, ບັນດາພະແນກການອ້ອມຂ້າງແຂວງ, ອົງການທຽບເທົ່າ ແລະ ແຂກຖືກເຊີນເຂົ້າຮ່ວມ.
ທ່ານ ບຸນມີ ພິມມະສອນ ໄດ້ກ່າວເປີດກອງປະຊຸມວ່າ: ກອງປະຊຸມໃນຄັ້ງນີ້ກໍ່ເພື່ອສະຫລຸບຕີລາຄາຄືນໃນການຈັດຕັ້ງປະຕິບັດການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນການປະຈໍາປີ 2025 ຂອງ ( ຄສຊຂ.12 ) ໃນການເຄື່ອນໄຫວວຽກງານຕາມ 3 ພາລະບົດບາດຄື: ພາລະບົດບາດດ້ານນິຕິບັນຍັດ, ດ້ານຕົກລົງບັນຫາສຳຄັນພື້ນຖານຂອງປະເທດຊາດ-ຂອງທ້ອງຖິ່ນ ແລະ ດ້ານຕິດຕາມກວດກາ ການເຄົາລົບ ແລະ ປະຕິບັດ ລັດຖະທຳມະນູນ, ກົດໝາຍ ຂອງບັນດາອົງການລັດ ທີ່ໄດ້ກຳນົດໄວ້ໃນກົດໝາຍ ແລະ ບັນດາມະຕິ, ນິຕິກຳ ທີ່ສະພາແຫ່ງຊາດຮັບຮອງ, ບັນດາໂຄງການທີ່ສະພາແຫ່ງຊາດອະນຸມັດ ເຄື່ອນໄຫວຈັດຕັ້ງຢູ່ແຂວງໃນໄລຍະຜ່ານມາ.
ກອງປະຊຸມ, ຜູ້ເຂົ້າຮ່ວມ ໄດ້ຮັບຟັງບົດລາຍງານ ປະຈໍາປີ 2024 ແລະ ທິດທາງແຜນການປະຈໍາປີ 2025 ຂອງ( ຄສຊຂ.12 ), ແຜນການເຄື່ອນໄຫວວຽກງານ 5ປີ ( 2026-2030); ບົດລາຍງານ ກ່ຽວກັບການຈັດຕັ້ງປະຕິບັດວຽກງານ 3 ສ້າງ ໃນໄລຍະຜ່ານມາ, ທິດທາງແຜນການຄາດໝາຍສູ້ຊົນ ໃນປີ 2025 ແລະ ແຜນການ 5 ປີ (2026-2030) ພ້ອມນັ້ນ, ຜູ້ເຂົ້າຮ່ວມກອງປະຊຸມຍັງພ້ອມກັນຄົ້ນຄວ້າປະກອບຄໍາຄິດຄໍາເຫັນ ແລະ ພິຈາລະນາຢ່າງເລິກເຊິ່ງ, ກັບສະພາບຕົວຈິງໃນການຈັດຕັ້ງປະຕິບັດໃຫ້ບັນລຸຕາມແຜນການທີ່ວາງໄວ້.
ໂອກາດດັ່ງກ່າວ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ການເຄື່ອນວຽກງານທີ່ຄະນະສະມາຊິກສະພາແຫ່ງຊາດ ປະຈໍາເຂດເລືອກທີ 12 ແຂວງຄໍາມ່ວນ ຍາດໄດ້ຜົນງານອັນພົ້ນເດັ່ນມາຫລາຍດ້ານຕະຫລອດໄລຍະ 1 ປີ ທີ່ຜ່ານມາ; ພ້ອມນັ້ນ ທ່ານ ໄດ້ຮຽກຮ້ອງມາຍັງ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ, ຄະນະປະຈໍາສະພາປະຊາຊົນຂັ້ນແຂວງ, ອົງການປົກຄອງແຂວງ, ອົງການຈັດຕັ້ງທຽບເທົ່າ, ສະມາຊິກສະພາປະຊາຊົນຂັ້ນແຂວງສືບຕໍ່ເອົາໃຈໃສ່ຄົ້ນຄວ້າ, ກຳແໜ້ນບັນດາເນື້ອໃນ, ທີ່ຕັ້ງພາລະບົດບາດ, ສິດ ແລະ ໜ້າທີ່ຂອງຕົນໃຫ້ຮັບຮູ້ເຂົ້າໃຈ ເປັນຕົ້ນ: ກຳແໜ້ນເນື້ອໃນຂອງ ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ບັນດາມະຕິຂອງສະພາແຫ່ງຊາດ, ມະຕິຂອງຄະນະປະຈໍາສະພາແຫ່ງຊາດ, ມະຕິຂອງສະພາປະຊາຊົນຂັ້ນແຂວງ ແລະ ມະຕິຂອງຄະນະປະຈໍາສະພາປະຊາຊົນຂັ້ນແຂວງເພື່ອເປັນບ່ອນອີງ ໃນການຈັດຕັ້ງປະຕິບັດໜ້າທີ່ວຽກງານການເມືອງຂອງຕົນໃຫ້ໜັກແໜ້ນ.
ໂດຍ: ເອື້ອ ມະໂນສິງ