ໃນວັນທີ20 ມັງກອນ 2023 ຢູ່ທີ່ຫ້ອງປະຊຸມສະພາປະຊາຊົນແຂວງໄດ້ເປີດກອງປະຊຸມປະຈໍາປີ 2022 ແລະທິດທາງແຜນການປີ 2023 ຂອງສະພາປະຊາຊົນແຂວງ ໂດຍການເປັນປະທານຂອງ ທ່ານ ບຸນໂຮມ ເທດທານີ ປະທານສະພາປະຊາຊົນແຂວງ, ມີບັນທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ແລະ ພະນັກງານວິຊາການສະພາປະຊົນແຂວງ ເຂົ້າຮ່ວມ.
ໃນກອງປະຊຸມທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ ຜູ້ຊີ້ນໍາວຽກງານຄະນະເລຂາທິການໄດ້ຜ່ານຮ່າງບົດສະຫຼຸບ ປະຈໍາປີ 2022 ແລະ ທິດທາງແຜນການປີ 2023 ຂອງສະພາປະຊາຊົນແຂວງ ເຊິ່ງໄລຍະຜ່ານມາໄດ້ປະຕິບັດໜ້າທີ່ວຽກງານທີ່ສໍາເລັດໄດ້ຫຼາຍດ້ານເປັນຕົ້ນແມ່ນ: ສະພາປະຊາຊົນແຂວງໄດ້ເອົາໃຈໃສ່ສຶກສາອົບຮົມດ້ານເມືອງແນວຄິດໃຫ້ພະນັກງານ-ລັດຖະກອນດ້ວຍຫຼາຍຮູບການ, ໄດ້ປະຕິບັດວຽກງານຕາມ 3 ພາລະບົດບາດ ເຊິ່ງໄດ້ທາບທາມການສ້າງ ແລະ ປັບປຸງກົດໝາຍທີ່ສະພາແຫ່ງຊາດ, ກະຊວງທີ່ກ່ຽວຂ້ອງສົ່ງມາໃຫ້ທາບທາມຢູ່ທ້ອງຖິ່ນ, ໄດ້ປະກອບຄໍາເຫັນໃສ່ຮ່າງມະຕິຂອງຄະນະປະຈໍາສະພາແຫ່ງຊາດ, ອອກມະຕິຮັບຮອງເອົາແຜນການລົງທຶນຂອງລັດ ແລະ ໂຄງການ
ລົງທຶນຂອງລັດ, ຄົ້ນຄວ້າ ແລະ ຮັບຮອງເອົານິຕິກໍາທີ່ສໍາຄັນຕ່າງໆທີ່ສໍາຄັນຕາມການສະເໜີຂອງອົງການປົກຄອງແຂວງ, ຕິດຕາມກວດກາ, ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ບັນດານິຕິກໍາລຸ່ມກົດໝາຍ, 2 ວາລະແຫ່ງຊາດ ແລະ ບັນດາມະຕິທີ່ໄດ້ຮັບຮອງຢູ່ໃນກອງປະຊຸມສະໄໝສາມັນ, ນອກນັ້ນຍັງໄດ້ປະຕິບັດໜ້າທີ່ວຽກງານປິ່ນອ້ອມຕ່າງໆພາຍໃນສະພາປະຊາຊົນແຂວງ ເປັນຕົ້ນແມ່ນ: ດ້ານການກະກຽມເນື້ອໃນເອກະສານຕ່າງໆໃຫ້ສະພາປະຊາຊົນແຂວງໃນການເປີດກອງປະຊຸມຮ່ວມກັບພາກສ່ວນທີ່ກ່ຽວຂ້ອງ, ຂຶ້ນແຜນເຄື່ອນໄຫວວຽກງານຕ່າງໆ ແລະ ທິດທາງໃນຕໍ່ໜ້າສະພາປະຊາຊົນແຂວງຍັງໄດ້ສືບຕໍ່ສຶກອົບຮົມດ້ານດານເມືອງ-ແນວຄິດ ໃຫ້ພະນັກງານລັດຖະກອນ, ສືບຕໍ່ປະຕິບັດ
ວຽກງານວິຊາສະເພາະເປັນຕົ້ນແມ່ນດ້ານນິຕິກໍາ, ດ້ານການຕົກລົງບັນຫາສໍາຄັນພື້ນຖານຂອງທ້ອງຖິ່ນ ແລະ ດ້ານການຕິດຕາມກວດກາ, ເອົາໃຈໃສ່ປະຕິບັດວຽກງານທີ່ປິ່ນອ້ອມໃຫ້ສໍາເລັດ. ນອກນັ້ນໃນທີ່ປະຊຸມຍັງໄດ້ ປະດັບການຍ້ອງຍໍຜົນງານ 5 ປີ (2016-2020)ໃຫ້ພະນັກງານສະພາປະຊາຊົນແຂວງໃນນັ້ນໄດ້ຮັບຫຼຽນໄຊແຮງງານຊັ້ນ I ມີ 1 ທ່ານ, ໄດ້ຮັບຫຼຽນກາແຮງງານ ມີ 21 ທ່ານ, ຍິງ 11 ທ່ານ ແລະ ໃບຍ້ອງຍໍລັດຖະບານ ມີ 2 ທ່ານ, ຍິງ 1 ທ່ານ.
ໃນຕອນທ້າຍຂອງກອງປະຊຸມ ທ່ານບຸນໂຮມ ເທດທານີ ຍັງມີຄໍາເຫັນໂອ້ລົມຕໍ່ກັບພະນັກງານສະພາປະຊາຊົນແຂວງ ຈົ່ງສືບຕໍ່ເອົາໃຈໃສ່ສືບຕໍ່ປະຕິບັດໜ້າທີ່ວຽກງານຂອງຕົນຢ່າງຕັ້ງໜ້າ, ສືບຕໍ່ຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງ, ຄຸນສິນທໍາປະຕິວັດ, ໃຫ້ມີແບບແຜນການເຮັດວຽກທີ່ດີ, ຮັກສາມູນເຊື້ອໃນການປະກອບສ່ວນເຂົ້າໃນໜ້າທີ່ວຽກງານຢ່າງຕັ້ງໜ້າ ເປັນແບບຢ່າງທີ່ດີ ແລະ ຮັກສາຄວາມສາມັກຄີພາບໃນ ແລະ ພາຍນອກໃຫ້ແໜ້ນແຟ້ນກວ່າເກົ່າ
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ