(ສພຊ) ໃນຕອນເຊົ້າຂອງວັນທີ 6 ມັງກອນ 2022 ທີ່ສະພາແຫ່ງຊາດ ໄດ້ມີ ກອງປະຊຸມທາບທາມກົດໝາຍວ່າດ້ວຍການແກ້ໄຂຄຳຮ້ອງທຸກ (ໃນຮູບແບບທາງໄກ) ໂດຍການ ເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ, ເຂົ້າຮ່ວມມີ ຮອງປະທານກຳມາທິການຍຸຕິທຳ, ປະທານ–ຮອງປະທານ ຄະນະສະມາຊິກສະພາແຫ່ງຊາດປະຈໍາແຕ່ລະເຂດເລືອກຕັ້ງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຄະນະຮັບຜີດຊອບປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ.
ກອງປະຊູມ, ຈະໄດ້ພ້ອມກັນຄົ້ນຄວ້າປຶກສາຫາລື ແລະແລກປ່ຽນຄຳຄິດຄຳເຫັນຕໍ່ບັນດາເນື້ອໃນ ຂອງຮ່າງປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ສະບັບປີ 2016 ທີ່ນອນໃນແຜນການ ປັບປຸງກົດໝາຍ ປະຈຳປີ2022 ຂອງສະພາແຫ່ງຊາດ ແນ່ໃສ່ເຮັດໃຫ້ເນື້ອໃນຮ່າງປັບປຸງກົດ ໝາຍຄຳຮ້ອງທຸກມີເນື້ອ ໃນໜັກ ແໜ້ນ, ແທດເໝາະກັບສະພາບຄວາມຮຽກຮ້ອງຕ້ອງການໃນໄລຍະໃໝ່ສອດຄ່ອງກັບມະຕິກອງປະຊຸມຄົບຄະນະບໍລິຫານງານສູນກາງພັກ ເລກທີ 037/ຄລສພ ລົງວັນທີ 18 ມິຖຸນາ 2018,ມະຕິກົມການເມືອງສູນກາງພັກ ເລກທີ 112/ກມສພ, ລົງວັນທີ 02 ມິຖຸນາ 2020 ເຮັດໃຫ້ການແກ້ໄຂຄຳຮ້ອງທຸກ ຖືກຕ້ອງຕາມພາລະບົດບາດ ຕາມທີ່ລັດຖະທຳມະນູນ ແລະ ກົດໝາຍກຳນົດໄວ້ ທັງເປັນການເສີມຂະຫຍາຍບົດບາດໃນການຕິດຕາມກວດກາຂອງສະພາແຫ່ງຊາດ, ສະພາປະຊາຊົນແຂວງ ແລະ ສາມາດນຳສະເໜີຕໍ່ກອງປະຊຸມສະໄໝສາມັນເທື່ອທີ 3 ສະພາແຫ່ງຊາດ ພິຈາລະນາຮັບຮອງເອົາຕາມແຜນການວາງໄວ້; ກອງປະຊຸມ, ໄດ້ຄົ້ນຄວ້າປະກອບຄຳເຫັນໃສ່ຮູບການ ແລະ ວິທີການແກ້ໄຂຄຳຮ້ອງທຸກຂອງປະຊາຊົນ ຕາມທີ່ໄດ້ກຳນົດໄວ້ໃນກົດໝາຍສະບັບເກົ່າ ເຊິ່ງມີ 3 ປະເພດຄື: ການແກ້ໄຂຄຳສະເໜີ, ການແກ້ໄຂຄຳຮ້ອງຟ້ອງ ແລະ ການແກ້ໄຂຄຳຮ້ອງຂໍຄວາມເປັນທຳ ທັງສາມປະເພດນີ້ຕ້ອງກຳນົດພາລະບົດບາດ,ສິດ ແລະ ໜ້າທີ່ ຢູ່ໃນຮ່າງກົດໝາຍສະບັບ ປັບປຸງໃຫ້ຈະແຈ້ງ; ຈາກນັ້ນ,ກອງປະຊຸມໄດ້ພ້ອມກັນສຸມໃສ່ຄົ້ນຄວ້າ ແລະ ແລະປ່ຽນຄຳຄິດຄຳເຫັນກັນ ເພື່ອເຮັດໃຫ້ຮ່າງກົດໝາຍສະບັບດັ່ງກ່າວເປັນບ່ອນອີງໃນການຈັດຕັ້ງປະຕິບັດໃຫ້ດີຂຶ້ນກວ່າເກົ່າ.
ໃນໂອກາດດັ່ງກ່າວ, ປະທານກອງປະຊຸມ ຍັງໄດ້ຮຽກຮ້ອງຮຽກຮ້ອງມາຍັງບັນດາທ່ານຄະນະນຳ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພາກກສ່ວນກ່ຽວຂ້ອງຈົ່ງສຸ່ມໃສ ຄົ້ນຄວ້າປະກອບຄໍາຄິດຄໍາເຫັນຢ່າງກົງໄປກົງມາ ດ້ວຍເຫດຜົນ ແລະ ຍົກເອົາປະສົບການ, ບົດຮຽນໃນການປະຕິບັດວຽກງານຕົວຈິງທີ່ຈັດຕັ້ງປະຕິບັດຜ່ານມາ ເພື່ອມາແລກປ່ຽນຄຳຄິດ ຄຳເຫັນນຳກັນ ເພື່ອພ້ອມກັນນຳເອົາບົດຮຽນທີ່ເປັນປະໂຫຍດມາປັບປຸງເຂົ້າໃນກົດໝາຍ ສະບັບນີ້ໃຫ້ມີຄວາມຮັດກຸມ, ສອດຄ່ອງ ກັບສະພາບຄວາມເປັນຈິງ, ຖືກຕ້ອງຕາມລັດຖະທຳມະນູນ ກໍ່ຄືແນວທາງຂອງພັກເຮົາ.
(ພາບ ແລະ ຂ່າວ: ໄຊໂສພາພອນ ມິ່ງມຸງຄຸນ)