ໃນຕອນບ່າຍ ວັນທີ 11 ມັງກອນ 2024, ສະພາປະຊາຊົນແຂວງຜົ້ງສາລີ ໄດ້ຈັດກອງປະຊຸມຖອດຖອນບົດຮຽນການກະກຽມ ແລະ ດໍາເນີນກອງປະຊຸມຄົບຄະນະປະຈໍາປີ 2023 ຂອງຄະນະກໍາມະການ, ຄະນະເລຂາທິການ, ກອງປະຊຸມຄົບຄະນະປະຈໍາປີ 2023 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ແລະ ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ໂດຍການເປັນປະທານຂອງ ທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ບັນດາທ່ານຮອງປະທານຄະນະກໍາມະການ,  ຮອງເລຂາທິການ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມ

ໃນກອງປະຊຸມ, ໄດ້ຮັບຟັງ ທ່ານ ນາງ ພອນສະຫວັນ ເລຂາທິການສະພາປະຊາຊົນແຂວງ ຂຶ້ນຜ່ານຮ່າງບົດສະຫຼຸບຕີລາຄາ ແລະ  ຖອດຖອນບົດຮຽນການກະກຽມ ແລະ ດໍາເນີນກອງປະຊຸມຄົບຄະນະປະຈໍາປີ 2023 ຂອງຄະນະກໍາມະການ, ຄະນະເລຂາທິການ, ກອງປະຊຸມຄົບຄະນະປະຈໍາປີ 2023 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ແລະ ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ເຊິ່ງຍົກໃຫ້ເຫັນດ້ານດີ, ດ້ານອ່ອນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ຫຼັງຈາກປະທານກອງປະຊຸມໄດ້ມີຄໍາເຫັນເຈາະຈີ້ມ ແລ້ວ, ບັນດາທ່ານຜູ້ເຂົ້າຮ່ວມກອງປະຊຸມ ກໍ່ໄດ້ປະກອບຄໍາຄິດຄໍາເຫັນ ຕໍ່ ຮ່າງບົດສະຫຼຸບດັ່ງກ່າວ ຢ່າງກົງໄປກົງມາ, ມີການແລກປ່ຽນ​ບົດຮຽນ ແລະ ມີຂໍ້ສະເໜີຈໍານວນໜຶ່ງ ເພື່ອເປັນບ່ອນອີງໃນການປັບປຸງແກ້ໄຂ, ເພື່ອເປັນບົດຮຽນ ແລະ ສ້າງຄວາມເຂັ້ມແຂງ ແນໃສ່ເຮັດໃຫ້ການກະກຽມ ແລະ ດໍາເນີນກອງປະຊຸມ ໃນຄັ້ງຕໍ່ໄປ ມີປະສິດຕິພາບ ແລະ ປະສິດຕິຜົນສູງ

ພາບ-ຂ່າວ: ສູນທອງ