ຕອນເຊົ້າຂອງວັນອັງຄານທີ 1 ຕຸລາ 2024 ກອງປະຊຸມຕິດຕາມກວດກາວຽກງານສາມສ້າງ ຂອງຄະນະປະຈໍາສະພາແຫ່ງຊາດ ຢູ່ແຂວງອຸດົມໄຊ ໄດ້ໄຂຂຶ້ນຢູ່ຫ້ອງປະຊຸມຊັ້ນ 3 ຫ້ອງວ່າການແຂວງ, ໂດຍການເປັນປະທານທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສະພາແຫ່ງຊາດ, ມີທ່ານ ຄໍາຈັນ ໂສຕາປະເສີດ ກໍາມະການປະຈໍາສະພາແຫ່ງ ຊາດ, ປະທານກໍາມາທິການບັນດາເຜົ່າ ພ້ອມດ້ວຍຄະນະ, ມີທ່ານ ຄໍາດີ ວົງລ້ອມ ປະທານສະພາປະຊາຊົນແຂວງ, ທ່ານ ສົມຈິດ ປັນຍາສັກ ຮອງເຈົ້າແຂວງ, ສະມາຊິກສະພາແຫ່ງປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ສະມາຊິກອົງການປົກຄອງເຂົ້າຮ່ວມ ຢ່າງພ້ອມພຽງ.
ກອງປະຊຸມທ່ານ ສົມຈິດ ປັນຍາສັກ ຮອງເຈົ້າແຂວງ, ໄດ້ຕາງໜ້າຄະນະຮັບຜິດຊອບລາຍງານໂດຍຫຍໍ້ການຈັດຕັ້ງປະຕິບັດວຽກງານ 3 ສ້າງ ຢູ່ແຂວງອຸດົມໄຊ, ເຊິ່ງຕະຫລອດໄລຍະທີ່ຜ່ານມາ ຄະນະພັກ, ອົງການປົກຄອງແຂວງອຸດົມໄຊ ໄດ້ຖືເປັນວຽກງານບູລິມະສິດ ໂດຍໄດ້ສຸມໃສ່ຈັດຕັ້ງປະຕິບັດບັນດາໜ້າວຽກທີ່ຂັ້ນສູນກາງ ກໍ່ຄືບັນດາກະຊວງແບ່ງຂັ້ນຄຸ້ມຄອງມອບໃຫ້ແຂວງ ແລະ ສ້າງທຸກເງື່ອນໄຂ ໃຫ້ແຂວງບັນລຸເປັນຫົວໜ່ວຍຍຸດທະສາດ ຕາມມາດຕະຖານ 7 ດ້ານ 66 ຕົວຊີ້ບອກ, ເມືອງເປັນຫົວໜ່ວຍເຂັ້ມແຂງຮອບດ້ານ ຕາມ 5 ດ້ານ 47 ຕົວຊີ້ບອກ, ບ້ານເປັນຫົວໜ່ວຍພັດທະນາ ຕາມ 4 ດ້ານ 30 ຕົວຊີ້ບອກ ເທື່ອລະກ້າວ, ພ້ອມດ້ວຍລາຍງານຜົນສໍາເລັດອີກຫລາຍໆດ້ານ.
ຫລັງຈາກນັ້ນ ຜູ້ແທນເຂົ້າຮ່ວມກອງປະຊຸມມີຄໍາເຫັນສະເໜີແລກປ່ຽນກັບຄະນະທຶມງານຢ່າງກົງໄປກົງມາ. ປະຕິບັດຕາມວາລະການເຄື່ອນໄຫວ, ຕອນບ່າຍຂອງວັນດຽວກັນ ທາງຄະນະທິມງານແມ່ນໄດ້ເດີນທາງໄປເຄື່ອນໄຫວເຮັດວຽກຮ່ວມກັບ ອົງການປົກຄອງບ້ານຫລັກ 32 ຕື່ມອີກ.
ພາບ/ຂ່າວ: ສພຂ.