(ສພຊ) – ຕອນບ່າຍວັນທີ 21 ຕຸລາຜ່ານມາ ທີ່ຫໍປະຊຸມແຫ່ງຊາດ, ໄດ້ມີກອງປະຊຸມຄົບຄະນະວາລະທີ 2 ຂອງກອງປະຊຸມໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະ ທານສະພາແຫ່ງຊາດ ແຫ່ງ ສປປລາວ ທັງເປັນປະທານ AIPA-45; ເຂົ້າຮ່ວມມີບັນດາທ່ານປະທານລັດຖະສະພາ, ຫົວໜ້າຄະນະຜູ້ແທນລັດຖະສະພາສະມາຊິກໄອປາ ແລະ ບັນດາທ່ານຫົວໜ້າຄະນະຜູ້ແທນລັດຖະສະພາສັງເກດການຂອງໄອປາ, ບັນດາທ່ານສະມາຊິກລັດຖະສະພາ, ທ່ານເລຂາທິການໃຫຍ່ໄອປາ, ທ່ານເລຂາທິການໃຫຍ່ອາຊຽນ ແລະ ບັນດາແຂກຖືກເຊີນ.

ໃນກອງປະຊຸມ ໄດ້ມີການປຶກສາຫາລື ແລະ ຮັບຮອງເອົາບັນດາບົດລາຍງານຂອງກຳມາທິການການເມືອງ, ກຳມາທິການເສດຖະກິດ, ກຳມາທິການສັງຄົມ, ກອງປະຊຸມວຽກງານສະມາຊິກລັດຖະສະພາເພດຍິງໄອປາ (WAIPA), ກອງປະຊຸມວຽກງານສະມາ ຊິກລັດຖະສະພາໄວໜຸ່ມໄອປາ (YPA), ກຳມາທິການວຽກງານຈັດຕັ້ງພາຍໃນໄອປາ, ກອງປະຊຸມພົບປະລັດຖະສະພາ ແລະ ປະເທດສັງເກດການໄອປາ, ກອງປະຊຸມຮັບຟັງລະຫວ່າງກອງເລຂາໄອປາ ແລະ ອາຊຽນ ຄັ້ງທີ 3; ຈາກນັ້ນ, ຫົວໜ້າຄະນະຜູ້ແທນລັດຖະສະພາສະມາຊິກອາຊຽນ ໄດ້ຖະແຫຼງການ ແລະ ລົງນາມໃນບົດຖະແຫຼງຮ່ວມກັນ.

(ນາງ ອາລິນ ສຸພິມມະປະດິດ)