ໃນຕອນເຊົ້າວັນທີ 08 ພະຈິກ 2024 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງໆສະຫວັນນະເຂດ ຄະນະກຳມະການເສດຖະກິດ ແຜນການ ແລະ ການເງິນ ຂອງສະພາປະຊາຊົນແຂວງ ໄດ້ຈັດກອງປະຊຸມຄົບຄະນະປະຈຳປີ 2024 ຂອງຕົນຂຶ້ນຢ່າງເປັນທາງການ ໂດຍການເປັນປະທານຮ່ວມຂອງທ່ານ ທອງໃສ ອິນທິແສງ ຄະນະປະຈຳສະພາປະຊາຊົນແຂວງ ປະທານຄະນະກຳມະການເສດຖະກິດ ແຜນການ ແລະ ການເງິນ, ທ່ານ ຈັນສະໝອນ ສອນພົງພັນ ຮອງປະທານຄະນະກຳມະການເສດຖະກິດ ແຜນການ ແລະ ການເງິນ ແລະ ທ່ານ ນາງ ຫົງຄຳໄຊຍະຄົມ ຮອງປະທານຄະນະກຳມະການເສດຖະກິດ ແຜນການ ແລະ ການເງິນ ມີບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ທີ່ສັງກັດຢູ່ໃນຄະນະກຳມະການ, ບັນດາະພແນການທີ່ກ່ຽວຂ້ອງ ພ້ອມດ້ວຍຫົວໜ້າ-ຮອງຫົວໜ້າຂະແໜງ ແລະ ພະນັກງານພາຍໃນຄະນະກຳມະການດັ່ງກ່າວ ເຂົ້າຮ່ວມ.

 

ກອງປະຊຸມໄດ້ຮັບຟັງການຜ່ານມະຕິຄະນະປະຈຳສະພາປະຊາຊົນແຂວງ ວ່າດ້ວຍການຈັດຕັ້ງ ແລະ ການເຄື່ອນໄຫວ ວຽກງານກຳມະການເສດຖະກິດ ແຜນການ ແລະ ການເງິນ; ຜ່ານຮ່າງບົດສະຫຼຸບການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຄະນະກຳມະການເສດຖະກິດ ແຜນການ ແລະ ການເງິນ ພ້ອມທັງສະເໜີຮ່າງນິຕິກໍາໃຕ້ກົດໝາຍ ຂໍ້ຕົກລົງຂອງທ່ານເຈົ້າແຂວງ ແລະ ບົດລາຍງານ ຈາກບັນດາພາກສ່ວນທີ່ກ່ຽວຂ້ອງ ທີ່ຈະນຳເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 08 ຂອງສະພາປະຊາຊົນແຂວງ ຊຸດທີ II. ນອກຈາກນີ້ຍັງຜ່ານຮ່າງມະຕິກອງປະຊຸມວ່າດ້ວຍການຮັບຮອງເອົາມະຕິບົດສະຫຼຸບການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຂອງຄະນະກຳມະການດັ່ງກ່າວ ຈາກນັ້ນບັນດາທ່ານຜູ້ແທນທີ່ເຂົ້າຮ່ວມກອງປະຊຸມ ກໍໄດ້ສຸມສະຕິປັນຍາ ແລະ ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ໃນການປະກອບຄໍາຄິດ-ຄໍາເຫັນຕໍ່ບັນຫາຕ່າງໆ ໂດຍສະເພາະການຕີລາຄາ ຜົນງານດ້ານດີ, ດ້ານອ່ອນ ແລະ ຂໍ້ຄົງຄ້າງ ໃນການຈັດຕັ້ງປະຕິບັດວຽກງານ ຂອງຄະນະກໍາມະການໃນຊຸມປີຜ່ານມາ ແລະ ທິດທາງແຜນການເຄື່ອນໄຫວວຽກງານໃນປີຕໍ່ໜ້າ, ພ້ອມທັງ ຍົກໃຫ້ເຫັນຜົນສໍາເລັດຂອງການເຄື່ອນໄຫວວຽກງານໃນທ້ອງຖິ່ນຕົນ ໃນຖານະເປັນຕົວແທນແຫ່ງສິດຜົນປະໂຫຍດ ຂອງປະຊາຊົນບັນດາເຜົ່າ, ເຮັດໃຫ້ເນື້ອໃນ ແລະ ຈຸດປະສົງຂອງກອງປະຊຸມໃນຄັ້ງນີ້ ບັນລຸໄດ້ຕາມຄາດໝາຍທາງວາງໄວ້.

ໃນຕອນທ້າຍປະທານກອງປະຊຸມ ຍັງໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມ ຕ້ອງເພີ່ມທະວີຄວາມເອົາໃຈໃສ່ໃນການປະສານສົມທົບວຽກງານກັບບັນດາພະແນກການທີ່ຢູ່ໃນຂົງເຂດ ເສດຖະກິດ ແຜນການ ແລະ ການເງິນ ແລະ ບັນດາຫ້ອງການເມືອງໃນຂອບເຂດຄວາມຮັບຜິດຊອບຂອງຕົນ ເປັນຕົ້ນແມ່ນ: ການຊຸກຍູ້ການສ້າງນິຕິກໍາໃຕ້ກົດໝາຍການເພີ່ມທະວີໃນການຄົ້ນຄວ້າ, ວິເຄາະ-ວິໄຈ ບັນຫາຕ່າງໆ, ການຍົກສູງຄຸນນະພາບໃນການຕິດຕາມກວດກາ ແລະ ຊຸກຍູ້ການເຄື່ອນໄຫວ ວຽກງານຂອງອົງການປົກຄອງທ້ອງຖິ່ນ, ພ້ອມທັງເປັນການສ້າງເງື່ອນໄຂໃຫ້ ສສຊ-ສສຂ ທີ່ສັງກັດຄະນະກໍາມະການ ໃຫ້ໄດ້ເຂົ້າຮ່ວມຝຶກອົບຮົມ ແລະ ຍົກລະດັບໃນດ້ານຕ່າງໆ. ທັງໝົດເຫຼົ່ານີ້ກໍເພື່ອເຮັດໃຫ້ການເຄື່ອນໄຫວຂອງຄະນະກໍາມະການໃນຕໍ່ໜ້າໄດ້ຮັບການປັບປຸງ ແລະ ດີຂຶ້ນກວ່າເກົ່າ.