​(ສພຊ) ວັນທີ 23 ທັນວາ 2023 ຢູ່ຫໍສະພາແຫ່ງຊາດ ໄດ້ຈັດກອງປະຊຸມຄົບຄະນະຂອງກຳມາທິການກົດໝາຍ ໂດຍການປະທານຂອງທ່ານ ຈະເລີນ ເຍຍປາວເຮີີ ຮອງປະທານສະພາແຫ່ງຊາດ, ປະທານກຳມາທິການກົດໝາຍ; ເຂົ້າຮ່ວມມີບັນດາທ່ານຮອງປະທານກຳມາທິການສະພາແຫ່ງຊາດ, ຮອງລັດຖະມົນຕີກະຊວງຍຸຕິທຳ, ຮອງຫົວໜ້າຫ້ອງວ່າການສຳນັກງານປະທານປະເທດ, ຮອງຫົວໜ້າຫ້ອງວ່າ ການສຳນັກງານນາຍົກລັດຖະມົນຕີ, ບັນດາທ່ານສະມາຊິກສະພາແຫ່ງຊາດ ທີ່ສັງກັດກຳມາທິການກົດໝາຍ, ຕາງໜ້າຄະນະເລຂາທິການສະພາແຫ່ງຊາດ, ສະຖາບັນຄົ້ນຄວ້ານິຕິ ກຳ, ຫົວໜ້າ-ຮອງຫົວໜ້າກົມ ແລະ ພະນັກງານ-ລັດຖະກອນ ຂອງກຳມາທິການກົດໝາຍ.
​ ກອງປະຊຸມ ໄດ້ຮັບຟັງບົດສະຫຼຸບການເຄື່ອນໄຫວວຽກງານກາງສະໄໝ (ປີ 2021-2023), ທິດທາງວຽກງານທ້າຍສະໄໝ (ປີ 2023-2025), ການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2024 ຂອງກຳມາທິການກົດໝາຍ; ຄຳແນະນຳ ຂອງຄະນະປະຈຳສະພາແຫ່ງຊາດ ວ່າດ້ວຍການສ້າງແຜນການສ້າງ ແລະ ປັບປຸງກົດໝາຍໄລຍະ 2026-2030 ຂອງສະພາແຫ່ງຊາດ; ຄຳແນະນຳ ຂອງຄະນະປະຈຳສະພາແຫ່ງຊາດ ວ່າດ້ວຍການສະຫຼຸບຕີລາຄາການໂຄສະນາເຜີຍແຜ່ກົດໝາຍ ໃນໄລຍະທີ່ຜ່ານມາ ແລະ ມະຕິ ກອງປະຊຸມຄົບຄະນະ ຂອງກຳມາທິການກົດໝາຍ ປະຈຳປີ 2023.
​ ໃນຕອນທ້າຍ, ປະທານກອງປະຊຸມຍັງໄດ້ເນັ້ນບາງຈຸດຄື ປັບປຸງບົດສະຫຼຸບການເຄື່ອນໄຫວວຽກງານກາງສະ ໄໝ (ປີ 2021-2023), ທິດທາງແຜນການເຄື່ອນໄຫວວຽກງານທ້າຍສະໄໝ (ປີ 2023-2025), ການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2024 ຂອງກໍາມາທິການກົດໝາຍ ໃຫ້ມີເນື້ອໃນຄົບຖ້ວນ, ຖືກກັບການເຄື່ອນໄຫວວຽກງານຕົວຈິງ ຕາມການປະກອບຄຳເຫັນຂອງກອງປະຊຸມ; ປັບປຸງຄຳແນະນຳ ຂອງຄະນະປະຈຳສະພາແຫ່ງຊາດ ວ່າດ້ວຍການກະກຽມສ້າງແຜນການສ້າງ ແລະ ປັບປຸງກົດ ໝາຍ ໄລຍະ 2026-2030 ແລ້ວລາຍງານຄະນະປະຈຳສະພາແຫ່ງຊາດ ໃນທ້າຍເດືອນທັນວານີ້ ເພື່ອນຳໄປຈັດຕັ້ງຜັນຂະຫຍາຍໂດຍໄວ; ປັບປຸງຄຳແນະນຳ ຂອງຄະນະປະຈຳສະພາແຫ່ງຊາດ ວ່າດ້ວຍການສະຫຼຸບຕີລາຄາການໂຄສະນາເຜີຍແຜ່ກົດໝາຍ ແລ້ວສະເໜີຄະນະປະຈຳສະພາແຫ່ງຊາດ ພິຈາລະນາລົງລາຍເຊັນປະກາດໃຊ້ໂດຍໄວ ເພື່ອນຳໄປປະສານສົມທົບກັບ ບັນດາກະຊວງ-ອົງການທີ່ເປັນເຈົ້າຂອງກົດໝາຍ ແລະ ບັນດາກຳມາທິການທີ່ກ່ຽວຂ້ອງ ຈັດຕັ້ງຜັນຂະຫຍາຍ ແລະ ໃຫ້ທັນສະຫຼຸບສັງລວມລາຍງານຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX; ສຸມໃສ່ຮຽບຮຽງບັນດາກົດໝາຍ ທີ່ໄດ້ຮັບຮອງຈາກກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃຫ້ສຳເລັດໂດຍໄວ ເພື່ອໃຫ້ທັນໄດ້ປະກາດໃຊ້ ຕາມກົດໝາຍ ແລະ ລະບຽບການກຳນົດ; ຮີບຮ້ອນປະສານສົມທົບກັບ ບັນດາກະຊວງ-ອົງການ ທີ່ເປັນເຈົ້າຂອງກົດໝາຍ ແລະ ບັນດາກຳມາທິການທີ່ກ່ຽວຂ້ອງ ເພື່ອກະກຽມແຜນການສ້າງ ແລະ ປັບປຸງກົດໝາຍ ປີ 2024 ເພື່ອລາຍງານຕໍ່ຄະນະປະຈຳສະພາແຫ່ງຊາດ ແລະ ໃຫ້ໄດ້ປະກາດໃຊ້ໃນຕົ້ນປີ 2024; ສືບຕໍ່ປັບປຸງການປະສານງານໃນວຽກງານການສ້າງ ແລະ ປັບປຸງກົດໝາຍຢູ່ພາຍໃນສະພາແຫ່ງຊາດ ແລະ ບັນດາອົງການທີ່ມີສິດສະເໜີສ້າງ ແລະ ປັບປຸງກົດໝາຍໃຫ້ແໜ້ນແຟ້ນກົມ ກຽວກັນ ເຮັດໃຫ້ວຽກງານສ້າງ ແລະ ປັບປຸງກົດໝາຍມີປະສີດທິພາບ ແລະ ປະສິດທິຜົນສູງກວ່າເກົ່າ; ປັບປຸງກົນໄກ ແລະ ວິທີການທາບທາມຮ່າງກົດໝາຍໃຫ້ແທດຕົວຈິງ, ປະດິດສ້າງ ແລະ ມີປະສິດທິຜົນກວ່າເກົ່າ ໂດຍຖືເອົາຄະນະສະມາຊິກສະພາແຫ່ງຊາດ ແລະ ຄະນະປະຈຳສະພາປະຊາຊົນຂັ້ນແຂວງ ເປັນໃຈກາງ; ສືບຕໍ່ຮ່າງແຜນການຕິດຕາມ ກວດກາ ການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍ ປະຈຳປີ 2024 ແລະ ແຜນປີ 2025 ຂອງກໍາມາທິການກົດໝາຍ ໃຫ້ສຳເລັດໂດຍໄວ ເພື່ອປະກອບສ່ວນລົງຊຸກຍູ້ກະຊວງ-ອົງການ ແລະ ທ້ອງຖິ່ນ ເອົາໃຈໃສ່ຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມຂອງຕົນ ໃຫ້ຖືກຕ້ອງສອດຄ່ອງກັບກົດໝາຍ ແລະ ລະບຽບການ ບັນລຸຕາມຄາດໝາຍທີ່ກຳນົດໄວ້; ເອົາໃຈໃສ່ ປະສານສົມທົບກັບ ບັນດາກະຊວງ-ອົງການທີ່ເປັນເຈົ້າຂອງກົດໝາຍ ເພື່ອສ້າງເງື່ອນໄຂຕ່າງໆ ໃນການນຳເອົາບັນດາກົດໝາຍທີ່ໄດ້ປະກາດໃຊ້ແລ້ວ ລົງໂຄສະນາເຜີຍແຜ່ຢູ່ສູນກາງ ແລະ ທ້ອງຖິ່ນ ເພື່ອໃຫ້ປະຊາຊົນລາວບັນດາເຜົ່າ ໄດ້ຮັບຮູ້, ເຂົ້າໃຈຢ່າງກວ້າງຂວາງ ດ້ວຍຫຼາຍວິທີ, ຫຼາຍຮູບການ; ເອົາໃຈໃສ່ປະສານສົມທົບກັບ ບັນດາກະຊວງ-ອົງການ ທີ່ມີສິດສະເໜີໃຫ້ຄະນະປະຈຳສະ ພາແຫ່ງຊາດ ພິຈາລະນາຕີຄວາມໝາຍ ແລະ ອະທິບາຍກົດໝາຍ ເພື່ອຍົກລະດັບວຽກງານດັ່ງກ່າວ ໃຫ້ຫຼາຍຂຶ້ນທັງທາງດ້ານປະລິມານ ແລະ ຄຸນນະພາບ, ມີຄວາມວ່ອງໄວ, ມີຄຳຕອບຄຳອະທິບາຍທີ່ຈະແຈ້ງ, ຖືກຕ້ອງ, ສອດຄ່ອງກັບກົດໝາຍ ແລະ ລະບຽບການຕ່າງໆ.
(ພາບ ແລະ ຂ່າວ ນາງ ກຸກກິກ ບຸດດາໄຊ)