(ສພຊ) ກອງປະຊຸມຄົບຄະນະກຳມາທິການບັນດາເຜົ່າ ປະຈຳປີ 2023 ໄດ້ໄຂຂຶ້ນໃນຕອນເຊົ້າຂອງວັນທີ 9 ຕຸລາ 2023, ທີ່ສະພາແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ນາງ ທັດສະດາ ພອນ ຈັນທະມາດ ຮອງປະທານກຳມາທິການບັນດາເຜົ່າ, ທ່ານ ແກ້ວຈະເລີນ ເຊ່ຍຍິ່ງຢ່າງ ຮອງປະທານກຳມາທິ ການບັນດາເຜົ່າ; ເຂົ້າຮ່ວມມີທ່ານ ພົນໂທ ສຸວອນ ເລືອງບຸນມີ ກຳມະການສູນກາງພັກ, ຄະນະປະຈຳ, ຮອງປະ ທານສະພາແຫ່ງຊາດ ຜູ້ຊີ້ນຳວຽກງານດັງກ່າວ, ມີບັນດາທ່ານລັດຖະມົນຕີທີ່ກ່ຽວຂ້ອງ, ບັນດາທ່ານສະມາຊິກສະພາ ແຫ່ງຊາດ ທີ່ເປັນກຳມະການຂອງກຳມາທິການດັ່ງກ່າວ ຈາກ 18 ເຂດເລືອກ ຕັ້ງທົ່ວປະເທດ, ພ້ອມດ້ວຍພະນັກ ງານກຳມາທິການບັນດາເຜົ່າຂອງສະພາແຫ່ງຊາດ ແລະ ແຂກຖືກເຊີນເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອພ້ອມກັນຄົ້ນຄວ້າ, ປຶກສາຫາລື ແລະ ແລກປ່ຽນທັດສະນະ ຮ່ວມກັນຂອງກຳມະການ ທີ່ສັງກັດໃນ ກຳມາທິການບັນດາເຜົ່າ ຕໍ່ກັບບັນຫາທີ່ພົ້ນເດັ່ນເກີດຂຶ້ນຢູ່ໃນສັງຄົມ ທີ່ຕິດພັນກັບຂົງເຂດວຽກງານບັນດາເຜົ່າ ລວມທັງຫົວຂໍ້ ແລະ ເນື້ອໃນ ທີ່ຈະເຂົ້າຜ່ານກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ທີ່ຈະຈັດຂຶ້ນໃນມໍ່ໆນີ້; ກອງປະຊຸມຍັງໄດ້ຮັບຟັງ ຜ່ານຮ່າງ ບົດສະຫຼຸບການເຄື່ອນໄຫວ ວຽກງານປະຈຳປີ 2023 ແລະ ທິດທາງແຜນການປະຈຳປີ 2024 ຂອງກຳມາ ທິການບັນດາເຜົ່າ; ພ້ອມດຽວກັນນັ້ນ ໄດ້ຮັບຟັງການປະກອບຄໍາຄິດຄໍາເຫັນຈາກບາງເຂດເລືອກຕັ້ງ ແລະ ບັນດາ ພາກສ່ວນທີ່ກ່ຽວຂ້ອງຢູ່ສູນກາງ ແລະ ທ້ອງຖິ່ນ ເພື່ອແລກປ່ຽນ ແລະ ຖອດຖອນບົດຮຽນກ່ຽວກັບການ ເຄື່ອນໄຫວວຽກງານຂອງແຕ່ລະພາກສ່ວນ.

ກອງປະຊຸມຍັງຈະໄດ້ຮັບຟັງ ການໂອ້ລົມຈາກທ່ານຮອງປະທານສະພາແຫ່ງຊາດ ຜູ້ຊີ້ນຳ ເພື່ອເປັນການຊີ້ນຳ ແລະ ຊີ້ທິດເຍືອງທາງໃຫ້ກອງປະຊຸມຈັດຕັ້ງຜັນຂະຫຍາຍເນື້ອໃນກອງປະຊຸມຄັ້ງນີ້ໃຫ້ເກີດດອກອອກຜົນ; ນອກຈາກເນື້ອໃນ ຕົ້ນຕໍແລ້ວ ກອງປະຊຸມຈະໄດ້ພ້ອມກັນແລກປ່ຽນຄໍາຄິດຄໍາເຫັນລົງເລິກໃສ່ວຽກງານ ແລະ ການພົວພັນຮ່ວມມືກັນໃນ ໄລຍະ 1 ປີຜ່ານມາ ລະຫວ່າງກໍາມາທິການບັນດາເຜົ່າ ກັບ ກໍາມະການຂອງກໍາມາທິການບັນດາເຜົ່າ ທຸກເຂດເລືອກຕັ້ງ ແລະ ບັນດາກະຊວງທີ່ກ່ຽວຂ້ອງ, ອົງການຈັດຕັ້ງມະຫາຊົນຂັ້ນສູນກາງ ເພື່ອມີຄວາມເປັນເອກະພາບ ໃນການຈັດຕັ້ງປະຕິບັດ ວຽກງານຕໍ່ໜ້າໃຫ້ມີຄວາມຄ່ອງຕົວກວ່າເກົ່າ ແລະ ກອງປະຊຸມຍັງຈະໄດ້ພ້ອມກັນຕີລາຄາຕໍ່ການ ຕິດຕາມກວດກາ ບັນດາ ປາກົດການຫຍໍ້ທໍ້ທີ່ເກີດຂຶ້ນທາງດ້ານສາສະໜາ-ການພັດທະນາຊີວິດການເປັນຢູ່ຂອງຊົນເຜົ່າຕ່າງໆ ແລະ ອື່ນໆ.

ທ່ານ ພົນໂທ ສຸວອນ ເລືອງບຸນມີ ໄດ້ມີຄຳເຫັນໂອ້ລົມໃນມື້ເປີດກອງປະຊຸມວ່າ: ກອງປະຊຸມຄັ້ງນີ້ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານປະຈຳປີ 2023 ແລະ ວາງທິດທາງແຜນການເຄື່ອນໄຫວ ປະຈຳປີ 2024 ຂອງກຳມາທິການບັນດາເຜົ່າ ແລະ ບາງບົດຮຽນໃນການແກ້ໄຂປາກົດການຫຍໍ້ທໍ້ທາງສາສະໜາ ຂອງບາງເຂດເລືອກຕັ້ງ; ການຈັດຕັ້ງປະຕິ ບັດບັນດາຄາດໝາຍ ວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ; ຂໍ້ມູນການປະເມີນເບື້ອງ ຕົ້ນກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການປົກຄອງທ້ອງຖິ່ນ ຕິດພັນກັບວຽກງານ 3 ສ້າງ; ພ້ອມກັນນີ້ ສູນກາງແນວລາວສ້າງຊາດ ໄດ້ສະເໜີ ຜົນໄດ້ຮັບໃນການເຜີຍແຜ່ ແລະ ຜັນຂະຫຍາຍ ມະຕິສະພາແຫ່ງຊາດ ວ່າດ້ວຍການຮັບຮອງເອົາ 49 ຊົນເຜົ່າ ໃນລາວ. ຜ່ານການຮັບຟັງບັນດາຄຳເຫັນທີ່ກ່າວມານັ້ນ, ຂ້າພະເຈົ້າເຫັນວ່າ ມັນແມ່ນຜົນງານທີ່ໃຫຍ່ ເຊິ່ງບັນດາສະຫາຍໄດ້ປະສານສົມທົບກັນສຸມໃສ່ ຈັດຕັ້ງປະຕິບັດຢ່າງຕັ້ງໜ້າ ແລະ ມີຄວາມຮັບຜິດຊອບສູງ ເຮັດໃຫ້ວຽກງານມີຜົນສໍາເລັດ ຕາມຄາດໝາຍທີ່ວາງໄວ້; ຕີລາສູງຕໍ່ບົດສະຫຼຸບຜົນງານການເຄື່ອນ ໄຫວວຽກງານປະຈໍາປີ 2023 ຂອງກໍາມາທິການບັນດາເຜົ່າ ເຊິ່ງເຫັນວ່າໃນໄລຍະ 1 ປີ ຜ່ານມາ ເຖິງວ່າປະເທດເຮົາຈະພົບ ກັບຄວາມຫຍຸ້ງຍາກຫຼາຍປະການດັ່ງທີ່ໄດ້ກ່າວເບື້ອງຕົ້ນນັ້ນ. ແຕ່ກໍາມາທິການບັນດາເຜົ່າ ກໍຄືບັນດາທ່ານກຳມະການຂອງກຳມາທິການ ພ້ອມທັງເສນາທິການຢູ່ສູນກາງ ແລະ ທ້ອງຖິ່ນ ກໍມີຄວາມພະຍາຍາມສູງປະຕິບັດໜ້າທີ່ການເມືອງຂອງຕົນ ສໍາເລັດໂດຍພື້ນຖານ ໂດຍສະເພາະແມ່ນບັນດາສະຫາຍໄດ້ຄົ້ນ ຄວ້າ, ປະກອບຄໍາເຫັນ ຕໍ່ກັບການປະເມີນກົດໝາຍ 4 ສະບັບ ຂອງສະພາແຫ່ງຊາດ, ການປະຕິ ບັດໜ້າທີ່ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ, ແຜນພັດທະນາເສດຖະກິດ-ສັງຄົມ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ວຽກງານ 3 ສ້າງ, ອົງການຈັດຕັ້ງມະຫາຊົນ, ວຽກງານຊົນເຜົ່າ ແລະ ວຽກງານແນວໂຮມ-ສາສະໜາ, ໂຄງການທີ່ມີຜົນກະທົບຕໍ່ຊີວິດການ ເປັນຢູ່ຂອງປະຊາຊົນ ແລະ ສິ່ງແວດລ້ອມ; ບັນດາສະຫາຍ ຍັງໄດ້ເອົາໃຈໃສ່ຕິດຕາມກວດກາ ການແກ້ໄຂບັນຫາປາກົດການ ຫຍໍ້ທໍ້ ທາງສາສະໜາ ທີ່ເກີດຂຶ້ນໃນທ້ອງຖິ່ນຂອງຕົນ ດ້ວຍນະໂຍບາຍທີ່ນີ້ມນວນ ແລະ ສອດຄ່ອງກັບກົດໝາຍ ເຮັດໃຫ້ສັງຄົມ ມີຄວາມສະຫງົບ, ປະຊາຊົນ ມີຄວາມສາມັກຄີປອງດອງ. ຄຽງຄູ່ກັບການປະຕິບັດໜ້າທີ່ການເມືອງແລ້ວ ກຳມາທິການຍັງໄດ້ປະຕິ ບັດວຽກງານການສ້າງຄວາມເຂັ້ມແຂງ ແລະ ຍົກສູງຄວາມສາມາດຢູ່ສູນກາງ ແລະ ທ້ອງຖິ່ນ ຕິດພັນ ກັບການປັບປຸງນິຕິກຳຕ່າງໆທີ່ກ່ຽວຂ້ອງ.

ຕອນທ້າຍ ທ່ານຮອງປະທານສະພາແຫ່ງຊາດ ຍັງໄດ້ເນັ້ນຕື່ມວ່າ: ກອງປະຊຸມຄົບຄະນະ ປະຈໍາປີ 2023 ຂອງກໍາມາທິການບັນດາເຜົ່າ ໃນຄັ້ງນີ້ ເຊື່ອໝັ້ນຢ່າງໜັກແໜ້ນວ່າບັນດາຜູ້ເຂົ້າຮ່ວມກອງປະຊຸມ ຈະນໍາເອົາເນື້ອໃນຈິດໃຈ ຂອງກອງປະຊຸມໃນຄັ້ງນີ້ ໄປຜັນຂະຫຍາຍເປັນແຜນລະອຽດ ເຂົ້າສູ່ສະພາບເງື່ອນໄຂຕົວຈິງຂອງເຂດເລືອກຕັ້ງຕົນ ເພື່ອຈັດຕັ້ງປະ ຕິບັດໃຫ້ມີປະສິດທິຜົນ.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)