ວັນທີ 9 ມີນາ 2023 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ ໄດ້ເປີດກອງປະຊຸມຄົບຄະນະປະຈໍາປີ 2022, ໂດຍການເປັນປະທານຂອງ ທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ປະທານຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມໂດຍ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ມີບັນດາທ່ານຄະນະປະຈໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງທີ່ສັງກັດ ຄະນະກຳມະການ ຍຸຕິທຳ ແລະ ປກຊ-ປກສ, ມີຮອງຫົວໜ້າກອງບັນຊາການ ທະຫານແຂວງ, ປກສແຂວງ, ອົງການກວດກາລັດແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທຳແຂວງ ແລະ ຕະຫລອດຮອດແຂກຖືເຊີນເຂົ້າຮ່ວມ.
ຄະນະປະທານກອງປະຊຸມ
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເປັນການສະຫຼຸບຕີລາຄາ, ຖອດຖອນບົດຮຽນຜົນສຳເລັດດ້ານດີ-ດ້ານອ່ອນໃນການເຄື່ອນໄຫວວຽກງານຜ່ານມາຂອງຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023.
ທ່ານ ພັທ. ຈັນເພັງ ແກ້ວມະນີ ຮອງປະທານຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ.
ໃນວາລະກອງປະຊຸມ ທ່ານ ພັທ. ຈັນເພັງ ແກ້ວມະນີ ຮອງປະທານຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານຂອງຄະນະກຳມະການຍຸຕິທຳ ແລະ ປກຊ-ປກສ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານປະຈໍາປີ2023, ຈາກນັ້ນ ຜູ້ເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າປະກອບຄຳຄິດ-ຄຳເຫັນໃສ່ບົດສະຫຼຸບ ເພື່ອໃຫ້ມີເນື້ອໃນຄົບຖ້ວນສົມບູນ, ເລິກເຊິ່ງ ໃຫ້ເປັນທິດທາງຄາດໝາຍ, ວິທີການ ແລະ ມາດຕະການທີ່ຈະສູ້ຊົນຈັດຕັ້ງປະຕິບັດໃນຕໍ່ໜ້າບົນຈິດໃຈບຸກທະລຸໃຫ້ສຳເລັດ, ພ້ອມນັ້ນກອງປະຊຸມກໍ່ໄດ້ຮັບຟັງການຊີ້ແຈງ ບາງບັນຫາຂອງພະແນກການ ທີ່ຄະນະຜູ້ແທນໄດ້ເຈາະຈີ້ມກ່ຽວກັບຄໍາສະເໜີຂອງປະຊາຊົນ.
ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ.
ຕອນທ້າຍກອງປະຊຸມໄດ້ຮັບຟັງການໂອ້ລົມຂອງທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນໄດ້ກ່າວວ່າ: ກອງປະຊຸມຄົບກຳມະການໃນຄັ້ງນີ້ແມ່ນມີຄວາມໝາຍຄວາມສຳຄັນ ເຊິ່ງເນື້ອແທ້ແມ່ນບັ້ນກວດກາ-ຕີລາຄາຄືນໃນການຈັດຕັ້ງປະຕິບັດພາລະບົດບາດ ຂອງຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄໍາມ່ວນ ປະຈໍາປີ 2022 ໃນການເຄື່ອນໄຫວ, ຕິດຕາມກວດກາ, ຊຸກຍູ້ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ກໍ່ຄື:ຄໍາຮ້ອງ-ຄໍາສະເໜີ, ຂໍຄວາມເປັນທຳ ຂອງນາຍ ແລະ ພົນທະຫານ, ນາຍ ແລະ ພົນຕໍາຫຼວດ ຕະຫຼອດຮອດ ປະຊາຊົນບັນດາເຜົ່າຊາວແຂວງຄໍາມ່ວນ, ທີ່ຕິດພັນກັບການພົວພັນປະສານງານອຳນວຍຄວາມສະດວກເຊິ່ງກັນ ແລະ ກັນ ລະຫວ່າງສະພາປະຊາຊົນແຂວງ ກັບກອງກຳລັງ ແລະ ພະແນກການທີ່ກ່ຽວຂ້ອງ ເພື່ອນຳເອົາຄວາມຍຸຕິທຳມາໃຫ້ສັງຄົມ; ພ້ອມກັນນັ້ນກອງປະຊຸມຄັ້ງນີ້ບໍ່ພຽງແຕ່ເປັນການສະຫລຸບຕີລາຄາບັນດາໝາກຜົນ, ບົດຮຽນໃນການຈັດຕັ້ງປະຕິບັດບັນດາມະຕິກອງປະຊຸມສະໄໝສາມັນເທື່ອທີ 2-3 ຂອງສະພາປະຊາຊົນແຂວງ ຊຸດທີ II, ເພື່ອບັນລຸເປົ່າໝາຍໃນການຈັດຕັ້ງປະຕິບັດໜ້າທີວຽກງານ ມີຄວາມໂປ່ງໃສ, ເປັນທຳ ແລະ ຖືກຕ້ອງຕາມກົດໝາຍ, ເພື່ອເຮັດໃຫ້ວຽກງານຕິດຕາມກວດກາ ແລະ ແກ້ໄຂຄໍາຮ້ອງຂໍຄວາມເປັນທຳ ມີປະສິດທິພາບຍິ່ງຂຶ້ນ.
ໂດຍ: ເອື້ອ ມະໂນສິງ