ຕອນເຊົ້າຂອງວັນທີ 20 ມັງກອນ 2025 ທີ່ສະພາປະຊາຊົນແຂວງຄຳມ່ວນ ໄດ້ຈັດກອງປະຊຸມຄົບຄະນະຂອງສອງຄະນະກຳມະການຄື: ຄະນະກຳມະການເສດຖະກິດ, ແຜນການ ແລະ ການເງິນ ແລະ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄຳມ່ວນ ປະຈຳປີ 2024, ໂດຍການເປັນປະທານຮ່ວມກອງປະຊຸມຂອງ ທ່ານ ນາງ ສາທິດ ຈັນສີ ປະທານຄະນະກຳມະການເສດຖະກິດ, ແຜນການ ແລະ ເງິນ ແລະ ທ່ານ ຄຳສຸກ ວັນທະວົງສາ ປະທານຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງຄຳມ່ວນ, ເປັນກຽດເຂົ້າຮ່ວມກອງປະຊຸມຂອງ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄຳມ່ວນ, ມີ ຮອງປະທານສະພາປະຊາຊົນຂັ້ນແຂວງ, ບັນດາທ່ານຄະນະປະຈໍາສະພາປະຊາຊົນຂັ້ນແຂວງ, ປະທານ/ຮອງປະທານຄະນະກໍາມະການ, ຄະນະເລຂາທິການ, ສະມາຊິກສະພາປະຊາຊົນແຂວງ ທີ່ສັງກັດຄະນະກຳມະການ, ພະແນກການທີ່ກ່ຽວຂ້ອງຂອງແຂວງ ແລະ ແຂກທີ່ຖືກເຊີນເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເປັນການສະຫຼຸບຕີລາຄາ, ຖອດຖອນບົດຮຽນຜົນສຳເລັດດ້ານດີ ແລະຂໍ້ຄົງຄ້າງ ໃນການເຄື່ອນໄຫວວຽກງານຜ່ານມາຂອງຄະນະກຳມະການ.ກອງປະຊຸມ ຄະນະກຳມະການ ໄດ້ຜ່ານຮ່າງບົດສະຫຼຸບການເຄື່ອນໄຫວວຽກງານ ປະຈຳປີ 2024 ແລະ ທິດທາງແຜນການ ປີ 2025 ຂອງສອງຄະນະກຳມະການ, ຈາກນັ້ນ ຜູ້ເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນຕໍ່ເນື້ອໃນບົດສະຫຼຸບ ເພື່ອໃຫ້ມີເນື້ອໃນຄົບຖ້ວນສົມບູນ, ເລິກເຊິ່ງເປັນທິດທາງຄາດໝາຍ, ວິທີການ ແລະ ມາດຕະການທີ່ຈະຈັດຕັ້ງປະຕິບັດວຽກງານໃນຕໍ່ໜ້າໃຫ້ສຳເລັດ,

ພ້ອມນັ້ນ, ກອງປະຊຸມໄດ້ຈັດພິທີເຊັນຂໍ້ຕົກລົງຮ່ວມ ລະຫວ່າງ ຄະນະກຳມະການຍຸຕິທຳ ແລະ ປກຊ-ປກສ ຮ່ວມກັບ ສະຫະພັກນັກຮົບເກົ່າ, ໂດຍການລົງນາມຮ່ວມລະຫວ່າງ ທ່ານ ຄຳສຸກວັນທະວົງສາ ປະທານຄະນະກຳມະການຍຸຕິທຳ ແລະ ປກຊ-ປກສ ແລະ ທ່ານ ພັນເອກ ຄຳມອນ ບຸນໂຈມເຮືອງສີ ປະທານສະຫະພັນນັກຮົບເກົ່າແຂວງຄຳມ່ວນ.

ໂອກາດດັ່ງກ່າວ, ທ່ານ ບຸນມີ ພິມມະສອນ ປະທານສະພາປະຊາຊົນຂັ້ນແຂວງ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ບັນດາຜົນສໍາເລັດໃນການເຄື່ອນໄຫວວຽກງານໃນ 1 ປີຜ່ານມາ ທີ່ສອງຄະນະກຳມະການກໍຄືບັນດາທ່ານສະມາຊິກສະພາປະຊາຊົນຂັ້ນແຂວງທີ່ເປັນກໍາມະການຂອງຄະນະກຳມະການ ຍາດມາໄດ້ ພ້ອມທັງມີຄຳເຫັນຊີ້ນຳຕໍ່ທິດທາງແຜນການເຄື່ອນໄຫວວຽກງານຂອງຄະນະກຳມະການ ປະຈໍາປີ 2025 ໂດຍເນັ້ນໜັກໃຫ້ເພີ່ມທະວີການປະ ສານສົມທົບລະຫວ່າງຄະນະກຳມະການ ກັບພາກສ່ວນທີ່ກ່ຽວຂ້ອງໃນຂອບເຂດຄວາມຮັບຜິດຊອບຂອງຕົນໃຫ້ກົມກຽວ, ທັນເວລາ ແລະ ຖືກຕ້ອງກັບຕົວຈິງ ແລະ ເພີ່ມທະວີການນໍາພາດ້ານການເມືອງ-ແນວຄິດ, ສຶກສາອົບຮົມດ້ານວິຊາສະ ເພາະ ກໍຄືບໍາລຸງສ້າງພະນັກງານຂອງຄະນະກຳມະການ ໃຫ້ມີຄວາມໜັກແໜ້ນດ້ານຫຼັກໝັ້ນການເມືອງ, ກໍາໄດ້ແນວທາງນະໂຍບາຍຂອງພັກ, ມີຄຸນສົມບັດສິນທໍາປະຕິວັດ, ມີຈັນຍາບັນ, ຈັນຍາທໍາ ໃຫ້ສົມກັບວ່າເປັນຜູ້ຮັບຜິດຊອບວຽກງານເສດຖະກິດ ແລະ ວຽກງານຍຸຕິທໍາເພື່ອຕອບສະໜອງກັບຄວາມຮຽກຮອງຕ້ອງການຂອງໜ້າທີ່ການເມືອງໃນໄລຍະໃໝ່.