(ສພຊ) – ກອງປະຊຸມຄົບຄະນະກໍາມະການລະດັບຊາດປັບປຸງລັດຖະທໍາມະນູນ ສະບັບປີ 2015 (ຄລຊ)ປະຈໍາເດືອນສິງຫາ 2024 ໄດ້ຈັດຂຶ້ນໃນວັນທີ 23 ສິງຫາຜ່ານມາ ທີ່ສະພາແຫ່ງຊາດ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ປະທານຄະ ນະກຳມະການລະດັບຊາດປັບປຸງລັດຖະທຳມະນູນ ສະບັບປີ 2015; ມີບັນດາທ່ານຄະນະປະຈຳການ, ຫົວໜ້າອະນຸກໍາມະການຕ່າງໆຂອງ ຄລຊ ແລະ ພາກສ່ວນກ່ຽວຂ້ອງ ເຂົ້າຮ່ວມຢ່າງພ້ອມພຽງ.
ທ່ານ ປອ. ໄຊສົມພອນ ພົມວິຫານ ໄດ້ມີຄໍາເຫັນວ່າ: ກອງປະຊຸມຄັ້ງນີ້ ເພື່ອຮັບຟັງການສະຫຼຸບການ ເຄື່ອນໄຫວວຽກງານໄລຍະຜ່ານມາຂອງຄະນະກໍາມະການລະດັບຊາດປັບປຸງລັດຖະທໍາມະນູນ ແລະ ທິດທາງແຜນ ການຮອດເດືອນທັນວາ 2024, ບົດລາຍງານການປະເມີນຜົນການຈັດຕັ້ງປະຕິບັດລັດຖະທໍາມະນູນ ສະບັບປີ 2015 ຢູ່ຂັ້ນສູງກາງ ແລະ ທ້ອງຖິ່ນໃນທົ່ວປະເທດ, ແຜນການຈັດກອງປະຊຸມວິທະຍາສາດກ່ຽວກັບການປັບປຸງລັດ ຖະທໍາມະນູນ ແລະ ບົດລາຍງານກ່ຽວກັບການປະເມີນການຈັດຕັ້ງປະຕິບັດລັດຖະທໍາມະນູນ ຕໍ່ກອງປະຊຸມກົມການເມືອງສູນກາງພັກ ໃນທ້າຍເດືອນສິງຫາ 2024; ເພື່ອເຮັດໃຫ້ດ້ານເນື້ອໃນຂອງບົດສະຫຼຸບ, ແຜນການກອງປະ ຊຸມວິທະຍາສາດ ກໍຄືບົດລາຍງານທີ່ຈະໄປຂໍທິດຊີ້ນໍາຈາກກອງປະຊຸມກົມການເມືອງສູນກາງພັກ ມີຄວາມຄົບຖ້ວນ, ຮັດກຸມ ສະເໜີໃຫ້ຜູ້ເຂົ້າຮ່ວມຈົ່ງສຸມສະຕິປັນຍາຄົ້ນຄວ້າ, ປະກອບຄວາມເຫັນຢ່າງກົງໄປກົງມາ, ສ້າງສັນ ແລະ ກ້າວໄປເຖິງຄວາມເປັນເອກະພາບຕໍ່ເນື້ອໃນ ເພື່ອເປັນບ່ອນອີງໃຫ້ແກ່ການປັບປຸງລັດຖະທໍາມະນູນ ສະບັບປີ 2015 .
(ສອນສັກ ວັນວິໄຊ)