(ສພຊ) ກອງປະຊຸມຄົບຄະນະຂອງກຳມາທິການວັດທະນະທຳ-ສັງຄົມ (ກວທສ) ປະຈຳປີ 2020 ໄດ້ດຳເນີນມາເປັນເວລາ 2 ວັນ ລະຫວ່າງວັນທີ 13-14 ຕຸລາ 2020 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6); ໂດຍການເປັນປະທານຂອງທ່ານ ສົມພູ ດວງສະຫວັນ ປະທານ ກວທສ; ເຂົ້າຮ່ວມມີທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ຜູ້ຊີ້ນຳ ກວທສ, ບັນດາທ່ານປະທານ-ຮອງປະທານກໍາມາທິການ, ຮອງລັດຖະມົນຕີ, ສະມາຊິກສະພາແຫ່ງຊາດ, ກໍາມະການວັດທະນະທໍາ-ສັງຄົມ, ຫົວໜ້າ-ຮອງຫົວໜ້າກົມ ພ້ອມດ້ວຍວິຊາການທີ່ກ່ຽວຂ້ອງ.
ກອງປະຊຸມຄົບຄະນະ ກວທສ ຄັ້ງນີ້ ໄດ້ເອົາໃຈໃສ່ປຶກສາຫາລື ແລະ ມີຄໍາເຫັນຕໍ່ບັນດາຫົວຂໍ້ ແລະ ເນື້ອໃນຕ່າງໆທີ່ໄດ້ຍົກຂຶ້ນໃນກອງປະຊຸມຢ່າງຕັ້ງໜ້າ, ມີລັກສະນະທີ່ສ້າງສັນ, ຫ້າວຫັນ ແລະ ກົງໄປກົງມາ ເປັນຕົ້ນການຈັດຕັ້ງປະຕິບັດການເຄື່ອນໄຫວວຽກງານປະຈໍາປີ 2020 ແລະ ທິດທາງແຜນການເຄື່ອນໄຫວປະຈໍາປີ 2021 ຂອງ ກວທສ ກໍຄືວຽກງານສ້າງ ແລະ ປັບປຸງກົດໝາຍ ແລະ ຕໍ່ກັບເນື້ອໃນຮ່າງບົດລາຍງານຜົນການຕິດຕາມກວດກາກ່ຽວກັບການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ບັນດາມະຕິຂອງກອງປະຊຸມສະພາແຫ່ງຊາດ ໃນຂົງເຂດວັດທະນະທຳ-ສັງຄົມ; ກອງປະຊຸມໄດ້ສະເໜີໃຫ້ຄະນະຮັບຜິດຊອບເນື້ອໃນ ນໍາເອົາເນື້ອໃນຈິດໃຈຈໍານວນໜຶ່ງທີ່ກອງປະຊຸມໄດ້ຍົກຂຶ້ນ ໄປປັບປຸງຕື່ມ ເພື່ອເຮັດໃຫ້ເນື້ອໃນຂອງບົດສະຫລຸບຕີລາຄາການເຄື່ອນໄຫວວຽກງານ ແລະ ທິດທາງແຜນການຂອງກໍາມາທິການ ໃຫ້ມີເນື້ອໃນສອດຄ່ອງ ແລະ ຈະແຈ້ງຂຶ້ນຕື່ມ; ການກະກຽມຄວາມພ້ອມດ້ານຕ່າງໆໃນການສ້າງ ແລະ ປັບປຸງກົດໝາຍ ໃນ 5 ປີຕໍ່ໜ້າ (2021-2025) ຂອງບັນດາຂະແໜງການຂົງເຂດວັດທະນະທຳ-ສັງຄົມ ທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະພາແຫ່ງຊາດຊຸດທີ IX ເປັນຕົ້ນແມ່ນຈໍານວນ ແລະ ຊື່ຂອງບັນດາຮ່າງກົດໝາຍໃຫ້ລະອຽດ ເຊິ່ງຈະຖືກຮັບຮອງເອົາໃນກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ IX; ກອງປະຊຸມໄດ້ສະເໜີກະຊວງທີ່ກ່ຽວຂ້ອງຄົ້ນຄວ້າສ້າງນິຕິກໍາໃຕ້ກົດໝາຍຜັນຂະຫຍາຍບາງມາດຕາຂອງກົດໝາຍໃຫ້ສຳເລັດ ພ້ອມທັງໂຄສະນາເຜີຍແຜ່ກົດໝາຍ ແລະ ນິຕິກຳໃຕ້ກົດໝາຍໃຫ້ສັງຄົມຮັບຮູ້ ແລະ ເຂົ້າໃຈຢ່າງກວ້າງຂວາງກວ່າເກົ່າ.
ກອງປະຊຸມໄດ້ຮັບຟັງການລາຍງານໂດຍຫຍໍ້ ກ່ຽວກັບການສ້າງຮ່າງກົດໝາຍວ່າດ້ວຍການສຶກສາຊັ້ນສູງ ເຊິ່ງເຫັນໄດ້ວ່າການສ້າງຮ່າງກົດໝາຍດັ່ງກ່າວ ໄດ້ດຳເນີນຕາມບາດກ້າວ ແລະ ຂັ້ນຕອນຂອງການສ້າງກົດໝາຍ. ຈາກນັ້ນ, ບັນດາທ່ານຜູ້ແທນ ໄດ້ພ້ອມກັນຄົ້ນຄວ້າ ແລະ ປຶກສາຫາລືຕໍ່ບັນດາພາກ, ໝວດ ແລະ ມາດຕາຂອງຮ່າງກົດໝາຍດັ່ງກ່າວ ດ້ວຍຄວາມເປັນເຈົ້າການ, ດ້ວຍຄວາມຮັບຜິດຊອບສູງ ແລະ ທີ່ປະຊຸມ ໄດ້ເຫັນດີເປັນເອກະພາບຕໍ່ຮ່າງກົດໝາຍດັ່ງກ່າວ; ສ່ວນເນື້ອໃນຂອງບາງມາດຕາທີ່ກອງປະຊຸມໄດ້ສະເໜີໃຫ້ປັບປຸງ ແລະ ສັບຊ້ອນຄືນໃໝ່ ເພື່ອໃຫ້ມີຄວາມສອດຄ່ອງ, ຈະແຈ້ງ ແລະ ຮັດກຸມໃຫ້ຫລາຍຂຶ້ນກວ່າເກົ່າ; ກອງປະຊຸມຍັງໄດ້ຮັບຟັງຮ່າງລາຍງານຂອງຄະນະປະຈໍາສະພາແຫ່ງຊາດ ກ່ຽວກັບການຕິດຕາມກວດກາການຈັດຕັ້ງປະຕິບັດກົດໝາຍທີ່ຕິດພັນກັບການຄຸ້ມຄອງການບໍລິການໃນຮ້ານກິນດື່ມ ແລະ ຮ້ານບັນເທີງ ເຊິ່ງໄດ້ຍົກໃຫ້ເຫັນສະພາບໃນໄລຍະຜ່ານມາ, ຂໍ້ສະດວກ, ຂໍ້ຫຍຸ້ງຍາກ-ຄົງຄ້າງ, ທິດທາງນະໂຍບາຍ, ມາດຕະການ ແລະ ວິທີການແກ້ໄຂໃນຕໍ່ໜ້າ ກ່ຽວກັບການຄຸ້ມຄອງວຽກງານດັ່ງກ່າວ ສະເໜີໃຫ້ກະຊວງກ່ຽວຂ້ອງ ຮີບຮ້ອນຄົ້ນຄວ້າແກ້ໄຂບັນດາຂໍ້ຄົງຄ້າງຕ່າງໆທີ່ເປັນອຸປະສັກກີດຂວາງຕໍ່ການອໍານວຍຄວາມສະດວກໃຫ້ແກ່ວຽກງານການບໍລິການໃນຮ້ານກິນດື່ມ ແລະ ຮ້ານບັນເທີງໃຫ້ມີຄວາມສະດວກ ແລະ ສາມາດດຶງດູດນັກທ່ອງທ່ຽວໃຫ້ເຂົ້າມາທ່ອງທ່ຽວ ແລະ ໃຊ້ບໍລິການໃຫ້ຫລາຍຂຶ້ນ ໂດຍສະເພາະນັກທ່ອງທ່ຽວຈາກປະເທດເພື່ອນບ້ານໃກ້ຄຽງ ແລະ ເຮັດແນວໃດເພື່ອເຮັດໃຫ້ຜູ້ປະກອບການກ່ຽວກັບວຽກງານການບໍລິການໃນຮ້ານກິນດື່ມ ແລະ ຮ້ານບັນເທີງພາຍໃນປະເທດເຮົາ ໃຫ້ສາມາດສືບຕໍ່ດຳເນີນທຸລະກິດໄດ້ຢ່າງແຂງແຮງ ແລະ ພ້ອມດຽວກັນນີ້ ກອງປະຊຸມຍັງໄດ້ຮຽກຮ້ອງໃຫ້ພາກສ່ວນກ່ຽວຂ້ອງຮີບຮ້ອນປັບປຸງ ແລະ ຄົ້ນຄວ້າສ້າງນິຕິກຳໃຕ້ກົດໝາຍ ເພື່ອຜັນຂະຫຍາຍບາງມາດຕາຂອງກົດໝາຍທີ່ຕິດພັນໃຫ້ສໍາເລັດ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານການບໍລິການໃນຮ້ານກິນດື່ມ ແລະ ຮ້ານບັນເທີງ ພ້ອມທັງສະເໜີໃຫ້ລັດຖະບານ ກໍຄືກະຊວງກ່ຽວຂ້ອງ ພິຈາລະນາກວດກາຄືນ ເພື່ອໃຫ້ຮັກສາໄດ້ຜົນປະໂຫຍດຂອງຊາດເຮົາ ແລະ ໃຫ້ເປັນການບໍລິການໃນຮ້ານ ກິນດື່ມ ແລະ ຮ້ານບັນເທີງພາຍໃນໃຫ້ມີການພັດທະນາຂຶ້ນຕື່ມ.
ກອງປະຊຸມ ໄດ້ມີຄວາມເອກະພາບຮັບຮອງເອົາມະຕິກອງປະຊຸມຄົບຄະນະຂອງ ກວທສ ປະຈຳປີ 2020 ເພື່ອເປັນ ບ່ອນອີງໃຫ້ບັນດາທ່ານສະມາຊິກສະພາແຫ່ງຊາດທີ່ເປັນກຳມະການຂອງກຳມາທິການວັດທະນະທຳ-ສັງຄົມ ເພື່ອຈັດຕັ້ງປະຕິບັດ ແລະ ຜັນຂະຫຍາຍໃນຂັ້ນຕໍ່ໄປ.
ໃນໂອກາດທີ່ທ່ານ ບຸນປອນ ບຸດຕະນະວົງ ໄດ້ເຂົ້າຮ່ວມກອງປະຊຸມຄັ້ງນີ້ ທ່ານໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ກອງປະຊຸມຄົບຄະນະ ກວທສ ວ່າ: ກວທສ ໃນນາມທີ່ເປັນເສນາທິການໃຫ້ແກ່ສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ ເອົາໃຈໃສ່ຕິດຕາມການຈັດຕັ້ງປະຕິບັດບັນດາມະຕິຂອງກອງປະຊຸມສະພາແຫ່ງຊາດ ໂດຍສະເພາະບັນດາຄາດໝາຍດ້ານວັດທະນະທຳ-ສັງຄົມ ທີ່ຍັງບໍ່ບັນລຸ ເຊິ່ງໃນນີ້ ກະທົບໜັກກວ່າໝູ່ແມ່ນວຽກງານການທ່ອງທ່ຽວ ແລະ ການພັດທະນາສີມືແຮງງານ ແລະ ການສ້າງວຽກເຮັດງານທໍາ ເນື່ອງມາຈາກການແຜ່ລະບາດຂອງພະຍາດໂຄວິດ-19 ແຕ່ມັນຍັງສົ່ງຜົນກະທົບໂດຍກົງຕໍ່ເສດຖະກິດຂອງຊາດໜັກໜ່ວງສົມຄວນ; ພ້ອມດຽວກັນນີ້, ກໍໃຫ້ກະກຽມຄົ້ນຄວ້າບັນດາບັນຫາສຳຄັນພື້ນຖານຂອງປະເທດຊາດທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII ທີ່ຈະຈັດຂຶ້ນໃນທ້າຍເດືອນຕຸລານີ້, ນອກນັ້ນ, ທ່ານຍັງໄດ້ຮຽກຮ້ອງໃຫ້ບັນດາທ່ານສະມາຊິກສະພາແຫ່ງຊາດ ກະກຽມເຂົ້າຮ່ວມ ແລະ ມີສ່ວນຮ່ວມໃນຂະບວນການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະພາປະຊາຊົນຂັ້ນແຂວງຊຸດທີ II ໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້ ພ້ອມກັນສ້າງຂະບວນການສະເຫລີມສະຫລອງສະພາແຫ່ງຊາດ ຄົບຮອບ 45 ປີ ໃຫ້ມີຜົນສຳເລັດຢ່າງຈົບງາມ.
ແຫຼ່ງຂ່າວທີ່ມາ: ສະພາແຫ່ງຊາດ