ໃນວັນທີ 26 ຕຸລາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມຄະນະເລຂາທິການສະພາປະຊາຊົນແຂວງຊຽງຂວາງ ພາຍໃຕ້ການເປັນປະທານຮ່ວມຂອງທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ ຜູ້ຊີ້ນໍາວຽກງານຄະນະເລຂາທິການສະພາປະຊາຊົນແຂວງ ແລະ ທ່ານ ນາງ ສາຍພູເງິນ ອຸດົມສຸກ ເລຂາທິການສະພາປະຊາຊົນແຂວງ, ໃຫ້ກຽດເຂົ້າມີ ຮອງປະທານຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະ ແໜງ ແລະ ພະນັກງານຂອງສະພາປະຊາຊົນແຂວງເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອເປັນການສະຫຼຸບຕີລາຄາ, ກວດກາຄືນກ່ຽວກັບການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຄະນະເລຂາທິການສະພາປະຊາຊົນແຂວງຊຽງຂວາງ ໃນຖານະເປັນເສນາທິການໃຫ້ຄະນະປະຈຳສະພາປະຊາຊົນແຂວງ, ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງໃນການຄົ້ນຄວ້າ-ສັງລວມເນື້ອໃນວຽກງານຮອບດ້ານ, ຄຸ້ມຄອງວຽກງານບໍລິຫານ, ແຜນການແລະການເງິນ, ຄຸ້ມຄອງວຽກງານຈັດຕັ້ງ-ພະນັກງານ ແລະ ການບໍລິການຮັບໃຊ້ໄລຍະຜ່ານມາ. ໃນທີ່ປະຊຸມ ທ່ານ ຄໍາແພງ ວົງພະເດັດ ຮອງເລຂາທິການສະພາປະຊາຊົນແຂວງ ໄດ້ຜ່ານຮ່າງບົດສະຫຼຸບໄລຍະ 9 ເດືອນ ປີ 2023 ແລະ ທິດທາງແຜນການ 3 ເດືອນທ້າຍປີ 2023 ຂອງຄະນະເລຂາທິການສະພາປະຊາຊົນແຂວງ ເຊິ່ງໃນໄລຍະ 9 ເດືອນຜ່ານມາຄະນະເລຂາທິການສະພາປະຊາຊົນແຂວງໄດ້ພະຍາຍາມເອົາໃຈໃສ່ຈັດຕັ້ງປະຕິບັດພາລະບົດບາດຂອງຕົນຕາມການຊີ້ນໍາຂອງຄະນະປະຈໍາສະພາປະຊາຊົນແຂວງ, ເຮັດໃຫ້ການຈັດຕັ້ງປະຕິບັດວຽກງານມີຜົນສໍາເລັດເປັນຢ່າງດີເປັນຕົ້ນ: ການເປັນເສນາທິການທາງດ້ານການກະກຽມດ້ານເນື້ອໃນໃຫ້ແກ່ຄະນະປະທານ, ຄະນະປະຈໍາ ແລະ ບັນດາຄະນະກໍາມະການຂອງສະພາປະຊາຊົນແຂວງ ແລະ ການອໍານວຍຄວາມສະດວກທາງດ້ານວັດຖຸອຸປະກອນ, ງົບປະມານຮັບໃຊ້ ແລະ ວຽກງານປິ່ນອ້ອມອື່ນໆ, ໃນທິດທາງແຜນການ 3 ເດືອນທ້າຍປີ 2023 ຂອງຄະນະເລຂາທິການສະພາປະຊາຊົນແຂວງຈະເອົາໃຈໃສ່ພົວພັນປະສານງານ, ອໍານວຍຄວາມສະດວກຮອບດ້ານ ໃຫ້ແກ່ສະພາປະຊາຊົນແຂວງ, ຄະນະປະຈໍາ ແລະ ບັນດາຄະນະກໍາມະການຂອງສະພາປະຊາຊົນແຂວງ ໂດຍສະເພາະແມ່ນສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນດ້ວຍຫຼາຍຮູບແບບແລະເປັນປົກກະຕິ, ອໍານວຍຄວາມສະດວກຮອບດ້ານໃຫ້ແກ່ຄະນະສະມາຊິກສະພາແຫ່ງຊາດ ເຂົ້າຮ່ວມກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IXພົວພັນ, ປະສານງານ ແລະ ກະກຽມບັນດາເອກະສານປິ່ນອ້ອມຕ່າງໆໃຫ້ແກ່ການດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ, ກອງປະຊຸມປະຈໍາປີ 2023 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ອື່ນໆ ໃຫ້ສໍາເລັດຕາມຄາດໝາຍທີ່ວາງໄວ້.
ນອກນັ້ນໃນທີ່ປະຊຸມທ່ານ ວຽງໄຊ ສີວິໄລ ໄດ້ມີຄໍາເຫັນໂອ້ລົມຕໍ່ຄະນະເລຂາທິການກໍ່ຄືພະນັກງານສະພາປະຊາຊົນແຂວງ ຈົ່ງສືບຕໍ່ປັບປຸງເນື້ອໃນຮ່າງບົດສະຫຼຸບດັ່ງກ່າວ ໃຫ້ມີຄວາມຄົບຖ້ວນສົມບູນຕື່ມອີກ, ຈົ່ງສືບຕໍ່ພັດທະນາຕົນເອງໃນການການຊອກຮູ້ຮໍ່າຮຽນວຽກງານຈາກດ້ານຕ່າງໆ ເພື່ອນໍາໃຊ້ເຂົ້າວຽກງານໃຫ້ດີຂຶ້ນກວ່າເກົ່າ, ສືບຕໍ່ພົວພັນປະສານງານກັບອົງການປົກຄອງແຂວງ, ບັນດາຄະນະກໍາມະການ ເພື່ອສະດວກໃນການເຄື່ອນໄຫວວຽກງານໃຫ້ສະດວກຂຶ້ນກວ່າເກົ່າ, ເພີ່ມທະວີຈັດຕັ້ງປະຕິບັດໜ້າທີ່ວຽກງານຂອງຕົນຕາມພາລະບົດບາດ, ສິດ ແລະໜ້າທີ່ຂອງຕົນ ໃຫ້ຖືກຕ້ອງຕາມຂັ້ນເທິງວາງອອກ ແລະ ຮັກສາມູນເຊື້ອຄວາມສາມັກຄີພາຍໃນໃຫ້ດີຂຶ້ນກວ່າເກົ່າ.
