(ສພຊ) – ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນກໍລະກົດ ໄດ້ດໍາເນີນໃນລະຫວ່າງວັນທີ 08-09 ສິງຫາ 2024 ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ; ມີບັນດາທ່ານຮອງປະທານ ແລະ ກຳມະການຄະນະປະຈໍາສະພາແຫ່ງຊາດ, ບັນດາທ່ານລັດຖະມົນຕີ ແລະ ຮອງລັດຖະມົນຕີກະຊວງ, ອົງການທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການລາຍງານ ແລະ ປະກອບຄຳເຫັນຕໍ່ຜົນສຳເລັດການຮຽບຮຽງກົດໝາຍ ຈຳນວນ 10 ສະບັບ ທີ່ຜ່ານການພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ຄື: ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍການຕ້ານການສໍ້ລາດບັງຫຼວງ, ກົດໝາຍວ່າດ້ວຍການປົກປັກຮັກສາສິ່ງແວດລ້ອມ, ກົດໝາຍວ່າດ້ວຍການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ກົດໝາຍວ່າດ້ວຍການທ່ອງທ່ຽວ, ກົດໝາຍວ່າດ້ວຍສະຫະກອນ (ສ້າງໃໝ່), ກົດໝາຍວ່າດ້ວຍຊັບພະຍາກອນທີ່ເປັນຢາ (ສ້າງໃໝ່), ກົດໝາຍວ່າດ້ວຍການກັນ ແລະ ຄວບຄຸມເຊື້ອເອັດຈ໌ໄອວີ/ພະຍາດເອດ, ກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ; ຜົນສຳເລັດການປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ 5 ຈຸດອ້ອມຂ້າງສູນກາງ ແລະ 18 ແຂວງ-ນະຄອນຫຼວງ; ໜັງສືສະເໜີຂອງລັດຖະບານ ກ່ຽວກັບການສະເໜີຂໍພິຈາລະນາຍົກເວັ້ນບາງມາດຕາຂອງລັດຖະບັນຍັດ ສະບັບເລກທີ 002/ປປທ, ລົງວັນທີ 17 ມິຖຸ ນາ 2021 ຜົນປະໂຫຍດຂອງລັດຖະບານ ແລະ ການເປີດບັນຊີສຳຮອງຂອງໂຄງການຄຸ້ມຄອງຍານພາຫະນະ ແລະ ການຂົນສົ່ງແບບຄົບວົງຈອນທີ່ຕິດພັນກັບໂຄງການ; ໜັງສືສະເໜີຂອງລັດຖະບານ ກ່ຽວກັບການສະເໜີການຂໍຫັນປ່ຽນປະ ເພດທີ່ດິນປ່າທຳມະຊາດໄປເປັນດິນອຸດສາຫະກຳລັກສະນະຖາວອນ ເພື່ອຮັບໃຊ້ໃນໂຄງການສາຍສົ່ງໄຟຟ້າແຮງສູງ 500 ກວ ແຕ່ສະຖານນີບ້ານຫາດ-ບ້ານນາ ແຂວງຈຳປາສັກ ຫາ ສະຖານນີພູວົງ ແຂວງອັດຕະປື ຂອງບໍລິສັດ YEIG international Engineering CO.Ltd; ຄວາມຄືບໜ້າກ່ຽວກັບການຜະລິດຫົວອາຫານສັດ ແລະ ແນວພັນພືດ ຕາມມະຕິແຜນພັດທະນາເສດຖະກິດ-ສັງຄົມ ປະຈຳປີ 2023 ແລະ 2024; ທົບທວນ ແລະ ປະເມີນຄືນການຈັດຕັ້ງປະຕິບັດມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຮັບຮອງມາດຕະການຮັກສາສະຖຽນລະພາບຂອງລາຄານ້ຳມັນເຊື້ອໄຟ ໃນສະພາບລາຄານ້ຳມັນເຊື້ອໄຟເໜັງຕີງສູງຂຶ້ນ; ການຈັດຕັ້ງປະຕິບັດມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຮັບຮອງເອົາການປັບຫຼຸດອັດຕາພາສີຂາເຂົ້ານ້ຳມັນແນຟຕາ (Naphtha) ເພື່ອນຳໃຊ້ເຂົ້າໃນການປະ ສົມ ແລະ ປຸງແຕ່ງນ້ຳມັນແອັດຊັງທຳມະດາ ເປັນການທົດລອງ 6 ເດືອນ ຂອງບໍລິສັດ ຍອດງື່ມ ພາວເວີ ມະຫາຊົນ; ການຄົ້ນຄວ້າການສະເໜີແຕ່ງຕັ້ງບຸກຄະລາກອນຂອງສານ; ສະຖິຕິຄຳຮ້ອງຂໍຄວາມເປັນທຳຂອງຄະນະປະຈຳສະພາແຫ່ງຊາດ ແລະ ກົນໄກການພິຈາລະນາຄຳຮ້ອງຂໍຄວາມເປັນທຳຂອງກຳມາທິການຍຸຕິທຳ; ການກະກຽມຄວາມພ້ອມກອງປະ ຊຸມຮ່ວມລະຫວ່າງຄະນະປະຈຳສະພາແຫ່ງຊາດກັບຄະນະລັດຖະບານ.
ນອກຈາກນີ້, ຍັງໄດ້ຮັບຟັງການລາຍງານຄວາມຄືບໜ້າໃນການກະກຽມການເປັນເຈົ້າກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ ຄັ້ງທີ 45; ການຂໍພິຈາລະນາຮັບເອົາປະເທດສັງເກດການ 2 ປະ ເທດຄື: ບາເຣນ ແລະ ເຢຍລະມັນ ພ້ອມທັງພິຈາລະນາການສະເໜີຂອງປະເທດອານເຊຣີ ເປັນແຂກຖືກເຊີນຂອງປະ ເທດເຈົ້າພາບ, ພິຈາລະນາຜູ້ທີ່ມີຜົນງານດີເດັ່ນຈາກສະພາແຫ່ງຊາດລາວ ເພື່ອຮັບລາງວັນກຽດຕິຄຸນຂອງໄອປາ. ການຂໍທິດຊີ້ນຳກ່ຽວກັບການມີສ່ວນຮ່ວມຂອງກຳມາທິການວັດທະນະທຳ-ສັງຄົມ ໃນຂະບວນການປຸກລະດົມຂົນຂວາຍນັກ ຮຽນ, ນັກສຶກສາ ເຂົ້າມາຮຽນໃນທຸກຊັ້ນທຸກສາຍ ໃນສົກປີຮຽນ 2024-2025 ໃຫ້ເພີ່ມຂຶ້ນ; ຂໍທິດຊີ້ນຳກ່ຽວກັບການຮ່າງມະຕິວ່າດ້ວຍການເພີ່ມທະວີການຮ່ວມມືໃນການສ້າງໃຫ້ອາຊຽນປອດຄວັນຢາສູບ ແລະ ປອດການຊົມໃຊ້ສານນິ ໂຄຕິນ ທີ່ຈະນຳເຂົ້າກອງປະຊຸມໄອປາ ຄັ້ງທີ 45 ທີ່ ສປປລາວ ເປັນເຈົ້າພາບ.
ກອງປະຊຸມຍັງໄດ້ຜ່ານຮ່າງມະຕິຂອງຄະນະປະຈຳສະພາແຫ່ງຊາດ ກ່ຽວກັບການປ່ຽນຊື່ເຈົ້າແຂວງ, ເຈົ້າຄອງນະຄອນຫຼວງ, ເຈົ້າເມືອງ, ເຈົ້ານະຄອນ ແລະ ນາຍບ້ານ ເປັນປະທານຄະນະກຳມະການປົກຄອງ; ຜ່ານແບບປຶ້ມທີ່ລະນຶກເພື່ອແຈກຢາຍໃນກອງປະຊຸມໄອປາ ຄັ້ງທີ 45 ແລະ ພິຈາລະນາຄຳຮ້ອງຂໍຄວາມເປັນທຳ 1 ເລື່ອງ.
(ຂ່າວ: ນາງ ກຸກກິກ ບຸດດາໄຊ, ພາບ: ສອນສັກ ວັນວິໄຊ)