ກອງປະຊຸມຄະນະປະຈໍາສະພາປະຊາຊົນແຂວງຫລວງນໍ້າທາ ໄດ້ໄຂຂຶ້ນເວລາ 13 ໂມງ 30 ນາທີ ຂອງວັນທີ 17 ຕຸລາ 2024 ທີ່ຫ້ອງປະຊຸມຂອງສະພາປະຊາຊົນແຂວງ ໂດຍການເປັນປະທານຂອງ ທ່ານ ຄໍາຟອງ ອິນມານີ ຮອງເລຂາຄະນະບໍລິຫານງານພັກແຂວງ ປະທານຄະນະປະຈໍາສະພາປະຊາຊົນແຂວງ, ມີບັນດາທ່ານກໍາມະການຄະນະປະຈໍາສະພາປະຊາຊົນແຂວງ ເຂົ້າຮ່ວມ ຈໍານວນ 7 ທ່ານ, ຍິງ 2 ທ່ານ.

ກອງປະຊຸມ ໄດ້ຮັບຟັງການລາຍງານ, ຄົ້ນຄວ້າ ພິຈາລະນາ, ເຫັນດີເປັນເອກະພາບ ຕໍ່ບັນຫາສໍາຄັນພື້ນຖານຕ່າງໆ ແລະ ມອບຄວາມຮັບຜິດຊອບໃຫ້ບັນດາກົງຈັກພາຍໃນ ສພຂ ຈັດຕັ້ງປະຕິບັດຄື ໄດ້ຮັບຟັງການລາຍງານ ຂອງຂະແໜງບໍລິຫານ, ຈັດຕັ້ງ ແລະ ກວດກາ ສະພາປະຊາຊົນແຂວງ ກ່ຽວກັບສະພາບການຈັດຕັ້ງປະຕິບັດລາຍຮັບ-ຈ່າຍ ຮວງເງິນຕ່າງໆ, ກອງປະຊຸມ ມອບໃຫ້ ຄະນະເລຂາທິການ ຊີ້ນໍາຂະແໜງດັ່ງກ່າວຄົ້ນຄວ້າ ດ້ານວິຊາການ ເພື່ອຄຸ້ມຄອງ ແລະ ມູນໃຊ້ງົບປະມານດັ່ງກ່າວ ໃຫ້ຖືກຕ້ອງຕາມລະບຽບກົດໝາຍ;ກອງປະຊຸມ ເຫັນດີຮັບຮອງເອົາການສະເໜີ ຍົກຍ້າຍ, ແຕ່ງຕັ້ງບຸກຄະລາກອນຂອງແຂວງ ແລະ ບຸກຄະລາກອນຂອງສານປະຊາຊົນແຂວງ ຕາມການສະເໜີຂອງເຈົ້າແຂວງ, ປະທານສານປະຊາຊົນແຂວງ, ມອບໃຫ້ຄະນະເລຂາທິການ ສະພາປະຊາຊົນແຂວງ ຮ່າງມະຕິຮັບຮອງເອົາບຸກລະກອນ ຂອງແຂວງ ໃຫ້ສໍາເລັດໂດຍໄວ, ເຫັນດີມອບໃຫ້ຄະນະກໍາມະການຍຸຕິທໍາ ແລະ ປກຊ-ປກສ ຮ່າງມະຕິຂອງຄະນະປະຈໍາ ວ່າດ້ວຍການຮັບຮອງເອົາການສະເໜີຍົກຍ້າຍບຸກຄະລາກອນ ຂອງສານປະຊາຊົນແຂວງ ແລະ ໜັງສືສະເໜີເຖິງສານປະຊາຊົນສູງສຸດ ພິຈາລະນາ ຄົ້ນຄວ້າຕາມກົດໝາຍ ໂດຍໄວ, ຮ່າງແຜນການ ຕິດຕາມກວດກາຜົນການຈັດຕັ້ງປະຕິບັດ ນິຕິກໍາໃຕ້ກົດໝາຍຂອງແຂວງນັ້ນ, ບົນພື້ນຖານກອງປະຊຸມເຫັນດີດ້ານພື້ນຖານ ແລະ ສະເໜີໃຫ້ຄະນະກໍາມະການ ປັບປຸງຮ່າງແຜນດັ່ງກ່າວຕື່ມ ໂດຍສະເພາະ ຈຸດປະສົງ ລະດັບຄາດໝາຍ, ກໍານົດເວລາ ແລະ ເນື້ອໃນອື່ນໆ ໃຫ້ມີເນື້ອໃນ ຄົບຖ້ວນສົມບູນ ແລ້ວສະເໜີຄະນະປະຈໍາ ພິຈາລະນາ ໂດຍໄວ; ເຫັນດີມອບໃຫ້ຄະນະກໍາມະການ ຍຸຕິທໍາ ແລະ ປກຊ-ປກສ ດໍາເນີນກອງປະຊຸມ ຖອດຖອນບົດຮຽນກ່ຽວກັບການປະສານງານ ລະຫວ່າງ ຄະນະກຳມະການດດັ່ງກ່າວ ກັບ ພາກສ່ວນກ່ຽວຂ້ອງ ແລ້ວ ລາຍງານຄະນະປະຈໍາ ຮັບຊາບ;

ຕອນທ້າຍ ປະທານກອງປະຊຸມ ໄດ້ເໜັ້ນໜັກໃຫ້ບັນດາຄະນະກໍາມະການ, ຄະນະເລຂາທິການ ຈົ່ງເອົາໃຈໃສ່ຈັດຕັ້ງປະຕິບັດວຽກງານທີ່ສໍາຄັນຮີບດ່ວນດັ່ງກ່າວ ໃຫ້ມີຜົນສໍາເລັດຕາມທີ່ໄດ້ກໍານົດໄວ້ໃນບົດບັນທຶກສະບັບນີ້ ແລະ ມອບໃຫ້ເລຂາທິການສະພາປະຊາຊົນແຂວງ ລາຍງານຜົນການຈັດຕັ້ງປະຕິບັດບົດບັນທຶກສະບັບນີ້ ໃນກອງປະຊຸມຄະນະປະຈໍາສະພາປະຊາຊົນແຂວງ ປະຈໍາເດືອນ ພະຈິກ 2024.

ໂດຍ ນັກຂ່າວ ສພຂ ຫຼວງນໍ້າທາ