ໃນຕອນເຊົ້າຂອງວັນທີ 19 ກັນຍາ 2023 ນີ້ ໜ່ວຍພັກສະພາປະຊາຊົນແຂວງຫລວງນ້ຳທາ ໄດ້ເປີດກອງປະຊຸມກາງສະໄໝຂື້ນທີ່ຫ້ອງປະຊຸມຂອງສະພາປະຊາຊົນແຂວງ ໂດຍກາຍເປັນປະທານຂອງ ສະຫາຍ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ເລຂາໜ່ວຍພັກສະພາປະຊາຊົນແຂວງ ຮອງປະທານສະພາປະຊາຊົນແຂວງ ໃຫ້ກຽດເຂົ້າຮ່ວມໂດຍ ສະຫາຍ ວຽງສະຫວັດ ສີພັນດອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນ້ຳທາ ,ເຂົ້າຮ່ວມມີ ຮອງເລຂາໜ່ວຍພັກ, ຄະນະໜ່ວຍພັກ,ມີຮອງປະທານຄະນະກວດກາລັດແຂວງ, ຄະນະຈັດຕັ້ງແຂວງ, ພ້ອມດ້ວຍສະມາຊິກພັກສົມບູນ ແລະ ສຳຮອງ ພາຍໃນໜ່ວຍເຂົ້າຮ່ວມທັງໝົດ  34  ສະຫາຍ, ຍິງ 13 ສະຫາຍ.

ໃນກອງປະຊຸມໄດ້ຮັບຟັງ ບົດສະຫຼຸບການຈັດຕັ້ງປະຕິບັດວຽກງານກາງສະໄໝ (2021-2023)ແລະ ແຜນການວຽກງານຈຸດສຸມທ້າຍສະໄໝ (2023-2025)ຂອງໜ່ວຍພັກສະພາປະຊາຊົນແຂວງ ເຊິ່ງໃນໄລຍະສອງປີເຄິ່ງຜ່ານມາ ຄະນະໜ່ວຍພັກ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ສະມາຊິກພັກ, ດ້ວຍຫລາຍຮູບ, ຫລາຍສີ ທັງລວງກວ້າງ ແລະ ລວງເລິກ ໂດຍການນໍາເອົາແນວທາງນະໂຍບາຍຂອງພັກ, ກົດໝາຍຂອງລັດ, ມະຕິ, ຄໍາສັ່ງ ແລະ ມູນເຊື້ອວັນສໍາຄັນຕ່າງໆຂອງພັກ, ຂອງຊາດ ເຜີຍແຜ່ເຊື່ອມຊຶມ ໃຫ້ພະນັກງານ-ລັດຖະກອນພາຍໃນສະພາປະຊາຊົນແຂວງ ຊຶ່ງໄດ້ເຮັດໃຫ້ສະມາຊິກພັກ ແລະ ພະນັກງານ-ລັດຖະກອນ ມີຄວາມຮັບຮູ້ເຂົ້າໃຈ ແລະ ເປັນເອກະພາບຕໍ່ແນວທາງນະໂຍບາຍຂອງພັກ, ມີນໍ້າໃຈຮັກຊາດ, ຮັກລະບອບໃໝ່, ມີຄວາມສາມັກຄີປ່ອງດອງ, ຮັກສາໄດ້ດ້ານຄຸນທາດການເມືອງ, ມີຄຸນສົມບັດສິນທໍາປະຕິວັດ ແລະ ເຮັດສໍາເລັດໜ້າທີ່ການ ເມືອງທີ່ໄດ້ຮັບມອບໝາຍ, ນອກຈາກວຽກການເມືອງແລ້ວ ຄະນະໜ່ວຍພັກໄດ້ຖືສໍາຄັນ ແລະ ເອົາໃຈໃສ່ເຮັດວຽກນໍາພາແນວຄິດເປັນປົກກະຕິ, ມີການຕໍານິກໍ່ສ້າງຊ່ວຍເຫຼືອເຊິ່ງກັນ ແລະ ກັນ ຊຶ່ງໄດ້ເຮັດໃຫ້ສະມາຊິກພັກ, ພະນັກງານ-ລັດຖະກອນ ມີແນວຄິດຫຼັກໝັ້ນຊົນຊັ້ນ, ມີຄວາມສາມັກຄີພາຍໃນ-ພາຍນອກຢ່າງກວ້າງຂວາງ, ມີແນວຄິດອຸ່ນອຽນທຸ່ນທ່ຽງ, ມີແບບແຜນການດໍາລົງຊີວິດທີ່ໂປ່ງໃສ-ຂາວສະອາດ, ຕັ້ງໜ້າຝຶກຝົນຫຼໍຫຼອມຕົນເອງ ກາຍເປັນສະມາຊິກພັກ, ພະນັກງານ-ລັດຖະກອນທີ່ດີເດັ່ນ ເປັນແບບຢ່າງນໍາໜ້າໃຫ້ແກ່ມະຫາຊົນ ແລະ ມີຄວາມຫ້າວຫັນໃນການປະຕິບັດວຽກງານວິຊາສະເພາະ ດ້ວຍຄວາມຮັບຜິດຊອບສູງ, ປະຈຸບັນ ມີສະມາຊິກພັກທັງໝົດ 36 ສະຫາຍ, ຍິງ 14 ສະຫາຍ, ໃນນີ້ ສະມາຊິກພັກສໍາຮອງ 2 ສະຫາຍ, ຍິງ 2 ສະຫາຍ, ສໍາລັບທິດທາງແຜນການໃນຕໍ່ໜ້າແມ່ນຈະສືບຕໍ່ ສືບຕໍ່ສຶກສາອົບຮົມການເມືອງ-ແນວຄິດ, ປັບປຸງແບບແຜນວິທີນໍາພາ, ວິທີເຮັດວຽກ ສົມທົບກັບການຍົກລະດັບຄວາມຮູ້, ຄວາມສາມາດ ຂອງພະນັກງານ-ສະມາຊິກພັກ ຕໍ່ກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດໃຫ້ສູງຂຶ້ນ, ສືບຕໍ່ຈັດຕັ້ງປະຕິບັດວຽກງານວິຊາສະເພາະ ໃຫ້ຖືກຕາມພາລະບົດບາດ ສິດ ແລະ ໜ້າທີ່ ທີ່ໄດ້ກໍານົດໄວ້ໃນກົດໝາຍ ແລະ ນິຕິກໍາໃຕ້ກົດໝາຍ; ສືບຕໍ່ສ້າງ ແລະ ປັບປຸງໜ່ວຍພັກ ໃຫ້ເປັນໜ່ວຍພັກທີ່ປອດໃສ, ເຂັ້ມແຂງ ແລະ ໜັກແໜ້ນຢ່າງຕໍ່ເນື່ອງ; ສືບຕໍ່ສ້າງ ແລະ ຂະຫຍາຍພັກ ຮັບປະກັນໃຫ້ໄດ້ທັງປະລິມານ ແລະ ຄຸນນະພາບ.

          ໃນໂອກາດນີ້ຄະນະພັກໄດ້ຜ່ານບົດສໍາຫຼວດຕົນເອງ ພ້ອມທັງໄດ້ປ່ອນບັດປະເມີນຕີລາຄາຈັດແບ່ງປະເພດຂອງຄະນະພັກໃນການຊີ້ນຳໆພາ, ຈັດຕັ້ງປະຕິບັດວຽກງານຮອບດ້ານກາງສະໄໝ.

                  ໃນຕອນທ້າຍ ສະຫາຍ ວຽງສະຫວັດ ສີພັນດອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນ້ຳທາ ໄດ້ມີຄຳເຫັນໂອ້ລົມ ແລະ ໜັກ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານໃນໄລຍະຜ່ານມາຂອງຄະນະໜ່ວຍພັກຂອງສະພາປະຊາຊົນແຂວງ ພ້ອມທັງສະເໜີໃຫ້ຄະນະໜ່ວຍພັກ ນໍາພາສະມາຊິກພັກ-ພະນັກງານ, ລັດຖະກອນ ພາຍໃນສະພາປະຊາຊົນແຂວງ ຈັດຕັ້ງປະຕິບັດເນື້ອໃນກອງປະຊຸມ ຕິດພັນກັບການສ້າງຂະບວນການ, ສ້າງຜົນງານຂໍ່ານັບຮັບຕ້ອນ ກອງປະຊຸມໃຫຍ່ 3 ຂັ້ນຂອງພັກ ທີ່ຈະໄຂຂຶ້ນໃນຕໍ່ໜ້ານີ້, ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານ-ສະມາຊິກພັກ ຢ່າງເປັນປົກກະຕິຕໍ່ເນື່ອງ ໃຫ້ກໍາໄດ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຄໍາສັ່ງຕ່າງໆຂອງຂັ້ນເທິງ, ເພື່ອເຮັດໃຫ້ສະມາຊິກພັກພາຍໃນໜ່ວຍ ມີຄຸນທາດການເມືອງໜັກແໜ້ນ, ມີຄວາມຮູ້ທາງດ້ານທິດສະດີການເມືອງ, ມີຄວາມຮູ້-ຄວາມສາມາດໃນວຽກງານວິຊາສະເພາະທີ່ຕົນເອງຮັບຜິດຊອບ, ມີນໍ້າໃຈຮັກຊາດ, ຮັກລະບອບ  ໃໝ່, ມີທັດສະນະຮັບໃຊ້ປະຊາຊົນຢ່າງຖືກຕ້ອງ, ກ້າຄິດ, ກ້າເຮັດ, ກ້າຮັບຜິດຊອບ ແລະ ຕັ້ງໜ້າຝຶກຜົນຫຼໍຫຼອມຕົນເອງ ໃຫ້ກາຍເປັນສະມາຊິກພັກ, ພະນັກງານຜູ້ສືບທອດທີ່ດີຂອງພັກ ແລະ ຂອງປະຊາຊົນ;ຄະນະໜ່ວຍພັກ ຕ້ອງສືບຕໍ່ນໍາພາວຽກງານວິຊາສະເພາະໃຫ້ດີ, ປະຕິບັດ 3 ພາລະບົດບາດຂອງ ສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ໃນການສ້າງ ແລະ ປັບປຸງກົດໝາຍ, ນິຕິກໍາລຸ່ມກົດໝາຍ, ການພິຈາລະນາຮັບຮອງເອົາບັນຫາສໍາຄັນພື້ນຖານຂອງຊາດ, ຂອງທ້ອງຖິ່ນ, ເອົາໃຈໃສ່ປັບປຸງແບບແຜນວິທີເຮັດວຽກ, ວິທີນໍາພາໃຫ້ດີ, ປະຕິບັດຕາມຫຼັກການລວມສູນ ປະຊາທິປະໄຕ ຢ່າງເຂັ້ມງວດ, ພ້ອມກັນສະກັດກັ້ນ ຕີຖອຍປະກົດການຫຍໍ້ທໍ້ຕ່າງໆ ໃນຖັນແຖວສະມາຊິກພັກ, ພະນັກງານ ສ້າງໃຫ້ມີການຫັນປ່ຽນໃໝ່ ແລະ ຍາດໄດ້ຜົນງານຍິ່ງໃຫຍ່ກວ່າເກົ່າ.

ໂດຍ ອໍາພອນ ສີປະເສີດ