ມື້ທີສອງຂອງກອງປະຊຸມສະໄໝສາມັນ ເທື່ອທີ່ 7 ຂອງສະພາປະຊາຊົນ ແຂວງໄຊສົມບູນ ຊຸດທີ II ທີ່ຈັດຂຶ້ນຢູ່ສະໂມສອນເມືອງອະນຸວົງ ໃນລະຫວ່າງວັນທີ 31 ກໍລະກົດ ຫາ ວັນທີ 2 ສິງຫາ ນີ້ ໂດຍການເປັນປະທານຂອງທ່ານ ແດງປະທຸມທອງ ປະທານສະພາປະຊາຊົນແຂວງໄຊສົມບູນ ເປັນກຽດເຂົ້າຮ່ວມຂອງທ່ານ ພອຍຄຳ ຮ່ງບຸນຍວງ ເຈົ້າແຂວງໄຊສົມບູນ, ມີບັນດາສະມາຊິກສະພາແຫ່ງຊາດ ປະຈຳຂດເລືອກຕັ້ງທີ່ 18 ແລະ ສະມາຊິກສະພາປະຊາຊົນແຂວງ ພ້ອມດ້ວຍ ການນຳພັກ-ລັດ ຂັ້ນສູງຂອງແຂວງ, ແຂກຈາກສູນກາງ ແລະ ແຂກຖືກຊີນ ເຂົ້າຮ່ວມ.

ສຳລັບມື້ນີ້ ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນ ແຂວງໄຊສົມບູນ ໃນນາມເປັນຕົວແທນໃຫ້ແກ່ສິດ ແລະ ຜົນປະໂຫຍດອັນຊອບທຳ ຂອງປະຊາຊົນລາວບັນດາເຜົ່າ ທົ່ວແຂວງ ໄດ້ຍົກສູງຄວາມຮັບຜິດຊອບໃນການຄົ້ນຄວ້າ, ປະກອບຄໍາເຫັນ ແລະ ຊັກຖາມຄວາມຄືບໜ້າໃນການຈັດຕັ້ງປະຕິບັດວຽກງານ ຕໍ່ບົດລາຍງານຕ່າງໆ ທີ່ພາກສ່ວນກ່ຽວຂ້ອງໄດ້ຜ່ານ ເປັນຕົ້ນແມ່ນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງ ແຂວງໄຊສົມບູນ, ການຈັດຕັ້ງປະຕິບັດວຽກງານກອງທຶນພັດທະນາແຂວງ, ການຈັດຕັ້ງປະຕິບັດ ດຳລັດ 414/ລບ ໃນການຈັດຕັ້ງປະຕິບັດນັບແຕ່ມື້ລົງລາຍເຊັນ (ປີ 2020) ເປັນຕົ້ນມາ ແລະ ວາງທິດທາງແຜນການໃນຕໍ່ໜ້າ, ການຈັດຕັ້ງປະຕິບັດບັນດາໂຄງການລົງທຶນແຮ່ທາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ພ້ອມນີ້ ພາກສ່ວນທີ່ກ່ຽວຂ້ອງກໍໄດ້ຊີ້ແຈງ, ອະທິບາຍ ແລະ ຕອບຄຳຊັກຖາມຂອງບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ເປັນຕົ້ນ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ການຈັດຕັ້ງປະຕິບັດ ດຳລັດ 414/ລບ ຕາມ 5 ທ່າແຮງຂອງແຂວງ ຄື ດ້ານກະສິກຳ, ການທ່ອງທ່ຽວ, ພະລັງງານໄຟຟ້າ, ດ້ານບໍ່ແຮ່ ແລະ ໃຈການທາງຜ່ານເຊື່ອມຈອດ- ເຊື່ອມໂຍງ ແລະ ວຽກງານອື່ນໆອີກ ເພື່ອແກ້ໄຂບັນຫາຕ່າງໆທີ່ຍັງຄົງຄ້າງ ໃຫ້ດີຂຶ້ນກວ່າເກົ່າ ແລະ ສຳເລັດຕາມແຜນການທີ່ວາງໄວ້ ເພື່ອສ້າງໃຫ້ແຂວງໄຊສົມບູນ ໄດ້ຮັບການພັດທະນາຂຶ້ນເປັນກ້າວໆ.

(ອໍາໄພພອນ ແກ້ວວິໄລ)