(ສພຊ) ວັນທີ 2 ກຸມພາ 2023, ທີ່ສະພາແຫ່ງຊາດ ນະຄອນຫຼວງວຽຈັນ ກຳມາທິການເສດຖະກິດ, ເຕັກ ໂນໂລຊີ ແລະ ສິ່ງແວດລ້ອມ ໄດ້ຈັດກອງປະຊຸມປຶກສາຫາລືຂອງຄະນະທີ່ປຶກສາບໍ່ປະຈຳການຂອງ ກຳມາທິການເສດ ຖະກິດ, ເຕັກໂນໂລຊີ ແລະ ສິ່ງແວດລ້ອມ ໂດຍການເປັນປະທານຂອງທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ກຳມະການຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ, ເຕັກ ໂນໂລຊີ ແລະ ສິ່ງແວດລ້ອມ ສະພາແຫ່ງຊາດ; ເຂົ້າຮ່ວມມີບັນດາທ່ານຄະນະທີ່ປຶກສາ ພ້ອມດ້ວຍພະນັກງານ-ລັດຖະກອນທີ່ກ່ຽວຂ້ອງ.

ຈຸດປະສົງຂອງກອງປະຊຸມຄັ້ງນີ້ ເພື່ອເປັນການຜັນຂະຫຍາຍມະຕິຂອງ ຄະນະປະຈຳສະພາແຫ່ງຊາດ ສະບັບ ເລກທີ 202/ຄປຈ, ລົງວັນທີ 12 ສິງຫາ 2022 ວ່າດ້ວຍການແຕ່ງຕັ້ງຄະນະທີ່ປຶກສາ ທີ່ບໍ່ປະຈຳການຂອງ ກຳມາ ທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໂດຍມີບັນດາຈຸດປະສົງສະເພາະຄື: ເພື່ອເປັນການທຳຄວາມຮູ້ ຈັກ ແລະ ຮັບຊາບກ່ຽວກັບທີ່ຕັ້ງ ແລະ ພາລະບົດບາດຂອງ ສະພາແຫ່ງຊາດ ຊຸດທີ IX, ເວົ້າລວມ, ເວົ້າລະເພາະ ແມ່ນກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ສະເໜີໃຫ້ຮັບຊາບບັນດາວຽກຈຸດສຸມ ປະຈຳປີ 2023 ຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ປຶກສາຫາລືກ່ຽວກັບກົນໄກວິທີເຮັດວຽກ ແລະ ແຜນການເຄື່ອນໄຫວຂອງຄະນະທີ່ປຶກສາ ທີ່ບໍ່ປະຈໍາການຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)