ກອງປະຊຸມ ຕິດຕາມກວດກາການປະເມີນຜົນການຈັດຕັ້ງປະຕິບັດ ກົດໝາຍ ຂົງເຂດປ້ອງກັນຊາດ-ປ້ອງກັນຄວາມສະຫງົບ ໄດ້ຈັດໄຂໃນວັນທີ 4 ຕຸລາ 2023 ທີ່ ສຳນັກງານສະພາປະຊາຊົນແຂວງຄໍາມ່ວນ ໂດຍການເປັນປະທານຂອງ ທ່ານ ບຸນມີ ພິມມະສອນ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ, ປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມມີ ຮອງປະທານສະພາປະຊາຊົນແຂວງ, ພ້ອມດ້ວຍບັນດາທ່ານ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12, ສະມາຊິກສະພາປະຊາຊົນຂັ້ນແຂວງ, ຄະນະກອງບັນຊາການທະຫານແຂວງ, ຄະນະກອງບັນຊາການປ້ອງກັນຄວາມສະຫງົບແຂວງ, ອົງການທຽບເທົ່າພະແນກການຂອງແຂວງ ແລະ ແຂກທີ່ຖືກເຊີນເຂົ້າຮ່ວມ.
ກອງປະຊຸມໄດ້ຮັບຟັງບົດການປະເມີນຜົນການຈັດຕັ້ງປະຕິບັດ ກົດໝາຍຂົງເຂດປ້ອງກັນຊາດ – ປ້ອງກັນຄວາມສະຫງົບຈຳນວນ 03 ສະບັບ, ຄື: ກົດໝາຍວ່າດ້ວຍ ນາຍທະຫານກອງທັບປະຊາຊົນລາວ (ສະບັບປັບປຸງ) ປະກອບມີ: V ພາກ, 8 ໝວດ, 50 ມາດຕາ ; ກົດໝາຍວ່າດ້ວຍ ການປ້ອງກັນຊາດ ມີ X ພາກ, 8 ໝວດ, 65 ມາດຕາ ແລະ ກົດໝາຍວ່າດ້ວຍ ກຳລັງປ້ອງກັນຄວາມສະຫງົບປະຊາຊົນ ( ສະບັບປັບປຸງ ) ມີ IX ພາກ, 6 ໝວດ, 55 ມາດຕາ, ຈາກນັ້ນ, ຜູ້ແທນເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າ, ແລກປ່ຽນປະກອບຄຳ-ຄິດເຫັນຕໍ່ບົດປະເມີນຜົນການຈັດຕັ້ງປະຕິບັດກົດໝາຍຂົງເຂດປ້ອງກັນຊາດ – ປ້ອງກັນຄວາມສະຫງົບ ທັງ 03 ສະບັບ ຢ່າງມີຈຸດສຸມ ເພື່ອເຮັດໃຫ້ເນື້ອໃນຂອງບົດປະເມີນກົດໝາຍມີເນື້ອໃນຖືກຕ້ອງສອດຄ່ອງຕາມສະພາບຄວາມເປັນຈິງ.
ໃນໂອກາດດັ່ງກ່າວ, ທ່ານ ບຸນມີ ພິມມະສອນ ໄດ້ສະແດງຄວາມຍ້ອງຍໍຊົມເຊີຍ ແລະ ໄດ້ຕີລາຄາສູງຕໍ່ກອງປະຊຸມ ເຖິງວ່າກອງປະຊຸມຈະໄດ້ດໍາເນີນເປັນພຽງເວລາ 1 ວັນເຕັມ ກໍ່ຕາມບັນດາທ່ານ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12, ສະມາຊິກສະພາປະຊາຊົນຂັ້ນແຂວງ, ກຳລັງ ປກຊ – ປກສ ແຂວງ ແລະ ແຂກຜູ້ເຂົ້າຮ່ວມກອງປະຊຸມ ໄດ້ພ້ອມກັນເອົາໃຈໃສ່ຄົ້ນຄວ້າ ແລະ ປະກອບຄໍາຄິດເຫັນການຕໍ່ບົດປະເມີນການຈັດຕັ້ງປະຕິບັດກົດໝາຍ 3 ສະບັບ ຄັ້ງນີ້ເພື່ອເຮັດໃຫ້ມີເນື້ອໃນສົມບູນ ແລະ ສອດຄ່ອງກັບສະພາບຕົວຈິງ, ບັນດາຄໍາຄິດ-ຄໍາຄິດເຫັນຂອງຜູ້ແທນແມ່ນຈະໄດ້ສັງລວມລາຍງານຕໍ່ຄະນະຮັບຜິດຊອບປະເມີນກົດໝາຍ ສະພາແຫ່ງຊາດ ສືບຕໍ່ຄົ້ນຄວ້າປັບປຸງ ເຂົ້າໃສ່ກົດໝາຍ ເພື່ອໃຫ້ສາມາດນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX, ຈາກນັ້ນ, ທ່ານ ຍັງໄດ້ກ່າວວ່າ: ກົດໝາຍດັ່ງກ່າວນັ້ນ ຈະກາຍເປັນເຄື່ອງມືທີສຳຄັນ ໃນການປະຕິບັດສິດ ແລະ ໜ້າທີ່ຂອງ ກຳລັງປ້ອງກັນຊາດ- ກຳລັງປ້ອງກັນຄວາມສະຫງົບ ໃນທົ່ວປະເທດ ກໍ່ຄືຂອງແຂວງໃຫ້ມີຄຸນນະພາບສູງຂຶ້ນໃນການປະກອບສ່ວນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດເຮັດໃຫ້ສະຖຽນລະພາບທາງດ້ານການເມືອງມີຄວາມໜັກແໜ້ນຮັບປະກັນ, ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ, ການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ ຈະມີຄວາມສັກສິດນັບມື້ນັບສູງຂຶ້ນ, ສັງຄົມມີຄວາມສະຫງົບ, ປະຊາທິປະໄຕ, ຍຸຕິທຳ ແລະ ສີວິໄລ.
ໂດຍ: ເອື້ອ ມະໂນສິງ