(ສພຊ) – ກອງປະຊຸມຄະນະປະຈໍາສະພາແຫ່ງຊາດ (ຄປຈສພຊ) ປະຈໍາເດືອນສິງຫາ 2025 ໄດ້ດໍາເນີນໃນວັນທີ 27-28 ສິງຫາຜ່ານມາ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານຄະນະປະຈໍາສະພາແຫ່ງຊາດ, ມີບັນດາທ່ານຮອງປະທານ ແລະ ກຳມະການໃນ ຄປຈສພຊ, ບັນດາທ່ານລັດຖະມົນຕີ ແລະ ຮອງລັດຖະມົນຕີກະຊວງ, ອົງການ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມຂອບເຂດສິດ ແລະ ໜ້າທີ່ຂອງຄະນະປະຈໍາສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ເປັນຕົ້ນ: ລາຍງານແຜນການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ 10 ຂອງ ສພຊ ຊຸດທີ IX; ລາຍງານກ່ຽວກັບໜັງສືສະເໜີຂອງລັດຖະບານ ສະບັບເລກທີ 95/ລບ, ລົງວັນທີ 16 ກໍລະກົດ 2025 ສະເໜີຂໍຫັນປ່ຽນທີ່ດິນປ່າໄມ້ທໍາມະຊາດ ໄປເປັນທີ່ດິນປະເພດອື່ນລັກສະນະຊົ່ວຄາວ ທີ່ນອນໃນປ່າສະຫງວນແຫ່ງຊາດດົງອໍາພາມ ເພື່ອນໍາໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງແຮ່ຄໍາ ຢູ່ບ້ານໜອງໄກ່ໂອກ ເມືອງຊານໄຊ ແຂວງອັດຕະປື ຂອງບໍລິສັດ ວັງຕັດ ສໍາຫຼວດແຮ່ທາດ ຈໍາກັດ; ລາຍງານກ່ຽວກັບໜັງສືສະເໜີຂອງລັດຖະບານ ສະບັບເລກທີ 90/ລບ, ລົງວັນທີ 10 ກໍລະກົດ 2025 ສະເໜີພິຈາລະນາຮັບຮອງ ແລະ ຜ່ອນຜັນ ການປະຕິບັດບາງມາດຕາຂອງກົດໝາຍ ທີ່ພົວພັນກັບໂຄງການພະລັງງານລົມ ພິນລາ (Pinla Power Sole Co.LTD) ແລະ ກະລອງ (Kalong Wind Power Sole Co.LTD) ຢູ່ເມືອງຄໍາເກີດ ແລະ ເມືອງໄຊຈໍາພອນ ແຂວງບໍລິຄໍາໄຊ; ລາຍງານກ່ຽວກັບໜັງສືສະເໜີຂອງລັດຖະບານ ສະບັບເລກທີ 104/ລບ, ລົງວັນທີ 4 ສິງຫາ 2025 ສະເໜີຂໍພິຈາລະນາຮັບຮອງ, ຍົກເວັ້ນ ແລະ ຜ່ອນຜັນ ການປະຕິບັດບາງມາດຕາຂອງກົດໝາຍ ທີ່ພົວພັນກັບໂຄງການໄຟຟ້າພະລັງງານນໍ້າເຊກອງ 4A ແລະ 4B ຂອງບໍລິສັດ 4 ພາວເວີ ຈໍາກັດ; ລາຍງານການຄົ້ນຄວ້າ, ປັບປຸງຮ່າງລັດຖະບັນຍັດວ່າດ້ວຍເຂດຍຸດທະສາດປ້ອງກັນຊາດ; ລາຍງານຜົນການຄົ້ນຄວ້າບົດລາຍງານຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 552/ຫສນຍ, ລົງວັນທີ 17 ມີຖຸນາ 2025 ກ່ຽວກັບແຈ້ງການສະບັບເລກທີ 139/ຄລສ.ກຜງສ, ລົງວັນທີ 5 ພຶດສະພາ 2025 ສະເໜີໃຫ້ລັດຖະບານພິຈາລະນາປັບປຸງເນື້ອໃນແຈ້ງການສະບັບເລກທີ 740/ຫສນຍ, ລົງວັນທີ 5 ເມສາ 2025 ວ່າດ້ວຍຂອບອັດຕາອາກອນຊົມໃຊ້ນໍ້າມັນເຊື້ອໄຟ; ລາຍງານການກະກຽມເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 46 ໃນລະຫວ່າງວັນທີ 16-22 ກັນຍາ 2025 ທີ່ນະຄອນຫຼວງກົວລາລຳເປີ ປະເທດມາເລເຊຍ; ລາຍງານຄວາມຄືບໜ້າໃນການສ້າງປຶ້ມ 50 ປີ ແຫ່ງສາຍພົວພັນລະຫວ່າງສະພາແຫ່ງຊາດ ແຫ່ງ ສປປລາວ ແລະ ສະພາແຫ່ງຊາດ ແຫ່ງ ສສ.ຫວຽດ ນາມ, ການຮ່ວມມືຮອບດ້ານ ແລະ ພັດທະນາ; ລາຍງານກ່ຽວກັບແຜນການຈັດກອງປະຊຸມເຝິກອົບຮົມຍົກສູງພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ນອກນັ້ນ, ຍັງມີຄຳຮ້ອງຂໍຄວາມເປັນທຳ 3 ເລື່ອງ.
ບັນດາຜູ້ເຂົ້າຮ່ວມໄດ້ເອົາໃຈໃສ່ຄົ້ນຄວ້າ, ປະກອບຄໍາເຫັນຢ່າງມີຈຸດສຸມ, ກົງໄປກົງມາ ຕໍ່ບັນດາບົດລາຍງານທີ່ນໍາມາພິຈາລະນາໃນກອງປະຊຸມຄັ້ງນີ້ ເພື່ອຮັບປະກັນການຕົກລົງບັນຫາຢ່າງມີຄວາມເປັນເອກະພາບ, ສາມາດເປັນບ່ອນອີງໃນການຈັດຕັ້ງປະຕິບັດ ແລະ ນໍາຜົນປະໂຫຍດລວມມາສູ່ປະເທດຊາດ ແລະ ປະຊາຊົນບັນດາເຜົ່າຢ່າງແທ້ຈິງ.
(ນາງ ກຸກກິກ ບຸດດາໄຊ)