ໃນວັນທີ 6 ກັນຍາ 2023  ທ່ານ ປອ. ເກດແກ້ວ ສີຫາລາດ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ການຈັດຕັ້ງປະຕິບັດການກໍ່ສ້າງ, ບູລະນະສ້ອມແປງປ້ອງກັນຕາຝັ່ງເຈື່ອນ ຕາມແລວແມ່ນໍ້າທີ່ເປັນຊາຍແດນລະຫວ່າງຊາດ ( ແມ່ນໍ້າຂອງ ), ເສັ້ນທາງສາຍຫຼັກ ແລະ ເສັ້ນທາງຫຼວງແຫ່ງຊາດ ຢູ່ແຂວງຄໍາມ່ວນ; ເຂົ້າຮ່ວມຕິດຕາມກວດກາ ແລະ ເຮັດວຽກໂດຍ ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ແລະ ພະແນກການທີ່ກ່ຽວຂ້ອງຂອງແຂວງ;ໃນການລົງເຄື່ອນໄຫວຕິດຕາມກວດກາ ແລະ ຊຸກຍູ້ຄັ້ງນີ້ ຄະນະໄດ້ຮັບຟັງການລາຍງານຈາກພະແນກໂຍທາທິການ ແລະ ຂົນສົ່ງແຂວງ, ພະແນກພະລັງງານ ແລະ ບໍ່ແຮ່ແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ພະແນກກະສິກຳ ແລະ ປ່າໄມ້ແຂວງເປັນຕົ້ນ: ການຈັດຕັ້ງປະຕິບັດການກໍ່ສ້າງ, ບູລະນະສ້ອມແປງປ້ອງກັນຕາຝັ່ງເຈື່ອນ ຕາມແລວແມ່ນໍ້າທີ່ເປັນຊາຍແດນລະຫວ່າງຊາດ ( ແມ່ນໍ້າຂອງ ), ເສັ້ນທາງສາຍຫຼັກ ແລະ ເສັ້ນທາງຫຼວງແຫ່ງຊາດ, ການຈັດຕັ້ງປະຕິບັດການຄຸ້ມຄອງນໍ້າໜັກລົດຂົນສົ່ງ; ວຽກງານການຈັດຕັ້ງປະຕິບັດ ໂຄງການຂຸດຄົ້ນປຸງແຕ່ງແຮ່ທາດທົດລອງ, ການຈັດຕັ້ງປະຕິບັດການຂຶ້ນທະບຽນອອກໃບຕາດິນ ແລະ ການຈັດຕັ້ງປະບັດວຽກງານການຄຸ້ມຄອງຊັບພະຍາກອນປ່າໄມ້ ແລະ ການປູກຕົ້ນໄມ້ທົດແທນ. ພາຍຫຼັງໄດ້ຮັບຟັງການລາຍງານຈາກບັນດາພະແນກການທີ່ກ່ຽວຂ້ອງເຊິ່ງໄດ້ຍົກໃຫ້ເຫັນດ້ານດີ, ແລະ ຂໍ້ຄົງຄ້າງກ່ຽວກັບການຈັດຕັ້ງປະຕິບັດວຽກງານຜ່ານມາ ທ່ານ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະຕິດຕາມ ກໍ່ໄດ້ແລກປ່ຽນຄໍາຄິດຄໍາເຫັນ ແລະ ມີຄໍາຊັກຖາມເຈາະຈີ້ມທີ່ມີຄວາມສົນໃຈໂດຍກົງຕໍ່ກັບພະແນກການເພື່ອເປັນຂໍ້ມູນຮອບດ້ານນຳໄປຄົ້ນຄວ້າຊຸກຍູ້ການຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິພາບ ແລະ ປະສິດທິຜົນ; ຈາກນັ້ນຄະນະໄດ້ສືບຕໍ່ລົງຕິດຕາມກວດກາພາກສະໜາມຕາມແລວແມ່ນໍ້າຂອງທີ່ຕາຝັ່ງເຈື່ອນຢູ່ເຂດບ້ານດອນຂຽວເມືອງໜອງບົກ.

ໃນຕອນທ້າຍ ທ່ານ ປອ. ເກດແກ້ວ ສີຫາລາດ ໄດ້ມີຄໍາເຫັນ ແລະ ກ່າວສະແດງຄວາມຍ້ອງຍໍຊົມເຊີຍຕໍ່ ສະພາປະຊາຊົນແຂວງຄໍາມ່ວນ ທີ່ປະສານສົມທົບເປັນຂົວຕໍ່ໄປຍັງພະແນກການຂອງແຂວງ ແລະ ເມືອງ ໃນການເຂົ້າຮ່ວມລົງເຄື່ອນໄຫວວຽກງານຕິດຕາມກວດກາ ແລະ ຊຸກຍູ້ວຽກງານໃນຂົງເຂດເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ທ່ານຍັງໄດ້ສະແດງຄວາມຂອບໃຈ ບັນດາພະແນກການຂອງແຂວງ, ຂະແໜງການທີ່ກ່ຽວຂ້ອງຂອງເມືອງ ທີ່ໄດ້ໃຫ້ການຮ່ວມມື ແລະ ສະໜອງຂໍ້ມູນຮອບດ້ານໃຫ້ຄະນະທີມງານທີ່ໄດ້ລົງມາເຄື່ອນໄຫວຕິດຕາມກວດກາ ແລະ ຊຸກຍູ້ເຊິ່ງຈະເປັນຂໍ້ມູນພື້ນຖານອັນສຳຄັນ, ເປັນບ່ອນອີງທີ່ຈະສັງລວມລາຍງານຕໍ່ ຄະນະປະຈໍາສະພາແຫ່ງຊາດ ພິຈາລະນາ ແລະ ໃຫ້ທິດຊີ້ນໍາໃນການຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ.

ໂດຍ: ເອື້ອ ມະໂນສິງ