ກອງປະຊຸມກວດກາເນື້ອໃນຮອບດ້ານກ່ຽວກັບຮ່າງຂໍ້ຕົກລົງວ່າດ້ວຍ ການຄຸ້ມຄອງການຈັດງານ ແລະ ບຸນປະເພນີພາຍໃນແຂວງຫລວງນ້ຳທາ ໄດ້ຈັດຂຶ້ນໃນວັນທີ 14 ທັນວາ 2023 ພາຍໃຕ້ການເປັນປະທານຂອງທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ຄະນະປະຈຳສະພາປະຊາຊົນແຂວງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ບັນດາພະແນກການ, ອົງການທີ່ກ່ຽວຂ້ອງຂອງແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການພາຍໃນສະພາປະຊາຊົນແຂວງເຂົ້າຮ່ວມ 21 ຄົນ, ຍິງ 5 ຄົນ.

ກອງປະຊຸມທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ໄດ້ກ່າວເປີດກອງປະຊຸມ ແລະ ກ່າວຈຸດປະສົງໃນການເປີດກອງປະຊຸມຄັ້ງນີ້ ກໍເພື່ອເປັນການທາບທາມມີຄຳເຫັນຕໍ່ຮ່າງຂໍ້ຕົກລົງວ່າດ້ວຍ ການຄຸ້ມຄອງການຈັດງານ ແລະ ບຸນປະເພນີພາຍໃນແຂວງຫລວງນ້ຳທາ ຄັ້ງສຸດທ້າຍກ່ອນນຳເຂົ້າພິຈາລະນາ, ຮັບຮອງ ໃນກອງປະຊຸມສະໄໝສາມັນເທື່ອທີ6 ຂອງສະພາປະຊາຊົນແຂວງຊຸດທີ2 ການສ້າງຮ່າງຂໍ້ຕົກລົງສະບັບນີ້ກໍເພື່ອເປັນການຫັນໄປສູ່ການປະຫຍັດ, ຕ້ານການຟຸມເຟືອຍ ໃນທາມກາງເສດຖະກິດຝຶດເຄືອງ ແລະ ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ, ຫລຸດຜ່ອນປະກົດການຫຍໍ້ທໍ້ ຊຶ່ງການເຄື່ອນໄຫວຕ່າງໆຕ້ອງໃຫ້ສອດຄອງກັບລະບຽບກົດໝາຍ ແລະ ຮີດຄອງປະເພນີ, ຕິດພັນກັນໃຊ້ຊີວິດແບບໃໝ່ໃນການຫັນເຂົ້າສູ່ສາກົນ, ພ້ອມທັງ ຮຽກຮ້ອງໃຫ້ບັນດາຜູ້ແທນກອງປະຊຸມຍົກສູງໃນການປະກອບຄຳຄິດເຫັນຕໍ່ຮ່າງຂໍ້ຕົກລົງດັ່ງກ່າວໃຫ້ມີເນື້ອໃນຖຶກຕ້ອງຮັດກຸມສົມບຸນຂຶ້ນກວ່າ;

ພ້ອມດຽວກັນ ກອງເລຂາໄດ້ຂຶ້ນຜ່ານຮ່າງຕົກລົງວ່າດ້ວຍ ການຄຸ້ມຄອງການຈັດງານ ແລະ ບຸນປະເພນີພາຍໃນແຂວງຫລວງນ້ຳທາ ຊຶ່ງມີທັງໝົດ 12 ໝວດ, 47 ມາດຕາ ແລະ ບັນດາທ່ານຜູ້ແທນກອງປະຊຸມໄດ້ສຸ່ມໃສ່ປະກອບຄຳຄິດເຫັນກ່ຽວກັບຮ່າງຂໍ້ຕົກລົງວ່າດ້ວຍ ການຄຸ້ມຄອງການຈັດງານ ແລະ ບຸນປະເພນີພາຍໃນແຂວງຫລວງນ້ຳທາ ຢ່າງມີຈຸດສຸ່ມ ເພື່ອເຮັດໃຫ້ຮ່າງຂໍ້ຕົກລົງສະບັບນີ້ໄດ້ຮັບການປັບປຸງ, ມີເນື້ອໃນຖຶກຕ້ອງສົມບຸນສອດຄອງກັບກົດໝາຍ, ສະພາບຄວາມເປັນຈິງ ສາມາດນຳເຂົ້າພິຈາລະນາ,ຮັບຮອງ ແລະ ນຳໄປຈັດຕັ້ງປະຕິບັດໃນຕໍ່ໜ້າໄດ້ຮັບຜົນປະໂຫຍດສູງສຸດ.

ພາບ,ຂ່າວ: ວັນນີ ແຝງບົວວັນ