(ສພຊ) ກອງປະຊຸມກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍເຂດເສດຖະກິດພິເສດ (ສ້າງໃໝ່) ໄດ້ຈັດຂຶ້ນໃນລະຫວ່າງວັນທີ 22-23 ກັນຍາ 2023 ທີ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ; ເຂົ້າຮ່ວມມີທ່ານ ອໍາໄພ ຈິດມານົນ ຮອງປະທານກຳມາທິການກົດໝາຍ, ທ່ານ ທັນຕາ ກອງຜາລີ ຮອງປະທານກໍາມາທິການ ແຜນການ, ການເງິນ ແລະ ການກວດສອບ, ຮອງຫົວໜ້າຫ້ອງວ່າການສໍານັກງານປະທານປະເທດ, ຮອງລັດຖະມົນຕີກະຊວງຍຸຕິທໍາ, ຮອງລັດຖະມົນຕີກະຊວງແຜນການ ແລະ ການລົງທຶນ, ບັນດາທ່ານຄະນະທີ່ປຶກສາທາງດ້ານກົດໝາຍຂອງຄະນະປະຈໍາສະພາແຫ່ງຊາດ, ຄະນະກົມ, ຄະນະພະແນກ ແລະ ວິຊາການທີ່ກ່ຽວຂ້ອງຈາກສະພາແຫ່ງຊາດ, ຫ້ອງວ່າການສໍານັກງານປະທານປະເທດ, ກະຊວງຍຸຕິທໍາ,ກະຊວງແຜນການ ແລະ ການລົງທຶນ, ກະຊວງອຸດສາຫະກໍາ ແລະ ການຄ້າ, ກະຊວງແຮງງານ ແລະ ສະຫວັດດີການສັງຄົມ, ທະນາຄານແຫ່ງ ສປປລາວ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງການເງິນ ແລະ ພາກສ່ວນທີ່ກ່ຽວຂ້ອງ.
ໂອກາດດັ່ງກ່າວ, ທ່ານ ສົມມາດ ພົລເສນາ ໄດ້ກ່າວເປີດກອງປະຊຸມ ເຊິ່ງທ່ານ ໃຫ້ຮູ້ວ່າ: ຮ່າງກົດໝາຍວ່າດ້ວຍເຂດເສດຖະກິດພິເສດ ລັດຖະບານ ສະເໜີຫາຄະນະປະຈໍາສະພາແຫ່ງຊາດ ຕາມໜັງສືສະເໜີ ສະບັບເລກທີ 66/ລບ, ລົງວັນທີ 29 ສິງຫາ 2023 ເຊິ່ງກ່ອນລັດຖະບານ ຈະສະເໜີຫາຄະນະປະຈໍາສະພາແຫ່ງຊາດ ໃນຄັ້ງນີ້ ກະຊວງແຜນການ ແລະ ການລົງທຶນ ກໍໄດ້ສົມທົບກັບພາກສ່ວນທີ່ກ່ຽວຂ້ອງ ດໍາເນີນການຄົ້ນຄວ້າສ້າງຕາມຂັ້ນຕອນຂອງການສ້າງ ແລະ ປັບປຸງກົດໝາຍທີ່ກົດໝາຍວ່າດ້ວຍການສ້າງນິຕິກໍາ, ສະນັ້ນ ການຈັດກອງປະຊຸມໃນຄັ້ງນີ້ ຈຶ່ງມີຄວາມໝາຍຄວາມສຳຄັນຫຼາຍ ເພາະຈະເປັນການຄົ້ນຄວ້າເນື້ອໃນຂອງຮ່າງກົດໝາຍຢ່າງລະອຽດ, ຮອບດ້ານ ແນໃສ່ເຮັດໃຫ້ຮ່າງກົດໝາຍມີເນື້ອໃນທີ່ຄົບຖ້ວນ, ຮັດກຸມ ແລະ ສາມາດນຳເຂົ້າພິຈາລະນາຮັບຮອງເອົາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ທີ່ຈະໄຂຂຶ້ນໃນທ້າຍເດືອນຕຸລາ 2023 ນີ້ໄດ້.
ໃນວາລະຂອງກອງປະຊຸມ ທ່ານ ນາງ ຄໍາຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ຜ່ານບົດສະເໜີກ່ຽວກັບການປັບປຸງກົດໝາຍວ່າດ້ວຍເຂດເສດຖະກິດພິເສດ (ສ້າງໃໝ່)ໂດຍໄດ້ຍົກໃຫ້ເຫັນເຫດຜົນ ແລະ ຄວາມຈຳເປັນຂອງການຈັດຕັ້ງປະຕິບັດວຽກງານພັດທະນາ ແລະ ຄຸ້ມຄອງເຂດເສດຖະກິດພິເສດ ໃນໄລຍະຜ່ານມາ ເຖິງວ່າຈະມີນິຕິກຳຈຳນວນໜຶ່ງ ທີ່ເປັນບ່ອນອີງໃນການຈັດຕັ້ງປະຕິບັດ ແຕ່ນິຕິກຳເຫຼົ່ານັ້ນ ເປັນພຽງນິຕິກຳລຸ່ມກົດໝາຍເທົ່ານັ້ນ ຈຶ່ງເຮັດໃຫ້ການໃຫ້ນະໂຍ ບາຍສົ່ງເສີມ, ກົນໄກການຄຸ້ມຄອງ ແລະ ການປະຕິບັດຕົວຈິງ ຂອງວຽກງານພັດທະນາ ແລະ ຄຸ້ມຄອງເຂດເສດຖະກິດພິເສດ ຍັງບໍ່ທັນມີປະສິດທິພາບເທົ່າທີ່ຄວນ. ສະນັ້ນ, ເພື່ອຕອບສະໜອງຄວາມຮຽກຮ້ອງຕ້ອງການຂອງການຂະຫຍາຍຕົວເສດຖະກິດ-ສັງຄົມ ຂອງພາກພື້ນ ແລະ ສາກົນໃນໄລຍະໃໝ່ ເວົ້າລວມ ການພັດທະນາເຂດເສດຖະກິດພິເສດຢູ່ ສປປລາວ ເວົ້າສະເພາະສາມາດຕອບສະໜອງ ແລະ ເພີ່ມຂີດຄວາມສາມາດໃນການຍາດແຍ່ງແຂ່ງຂັນດ້ານການດຶງດູດການລົງທຶນໃຫ້ນັບມື້ນັບເພີ່ມຂຶ້ນ. ຈຶ່ງມີຄວາມຈໍາເປັນຕ້ອງໄດ້ຍົກລະດັບບັນດານິຕິກຳທີ່ມີແລ້ວ ໃຫ້ເປັນກົດໝາຍ ໂດຍຮັບປະກັນມີຄວາມໜັກແໜ້ນ, ຮັດກຸມ, ຈະແຈ້ງ, ຄົບຖ້ວນ ພ້ອມທັງເຮັດໃຫ້ການພັດທະນາ ແລະ ການລົງທຶນໃນເຂດເສດຖະກິດພິເສດ ສປປລາວ ມີຄວາມໃກ້ຄຽງກັບພາກພື້ນ, ສາກົນ ແລະ ສາມາດແຂ່ງຂັນໄດ້; ສ້າງຄວາມເຊື່ອໝັ້ນ ໃຫ້ແກ່ຜູ້ພັດທະນາ ແລະ ຜູ້ລົງທຶນ ຈາກພາຍໃນ ແລະ ຕ່າງປະເທດ ໃນການລົງທຶນພັດທະນາເຂດເສດຖະກິດພິເສດ ອີກດ້ວຍ.
ຫຼັງຈາກນັ້ນ, ຜູ້ເຂົ້າຮ່ວມ ໄດ້ພ້ອມກັນສຸມໃສ່ຄົ້ນຄວ້າຢ່າງມີຈຸດສຸມ ແລະ ກົງໄປກົງມາຕໍ່ກັບເນື້ອໃນຂອງຮ່າງກົດໝາຍສະບັບດັ່ງກ່າວ ເຮັດໃຫ້ຮ່າງກົດໝາຍມີຄວາມຮັດກຸມ, ຈະແຈ້ງ, ສອດຄ່ອງກັບແນວທາງນະໂຍບາຍຂອງລັດ, ລັດຖະທຳມະນູນ, ກົດໝາຍອື່ນ, ສົນທິສັນຍາສາກົນ ທີ່ ສປປລາວ ເປັນພາຄີ ແລະ ແທດເໝາະກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ; ທັງເພື່ອເປັນການລະດົມສະຕິປັນຍາຈາກພາກສ່ວນທີ່ກ່ຽວຂ້ອງກັບການສ້າງ ແລະ ປັບປຸງກົດໝາຍ, ປະກອບຄຳເຫັນ ແລະ ເປັນເອກະພາບກັນໃສ່ຮ່າງກົດໝາຍວ່າດ້ວຍເຂດເສດຖະກິດພິເສດ (ສ້າງໃໝ່) ຢ່າງກົງໄປກົງມາ ເຊິ່ງປະກອບມີ XII ພາກ, 16 ໝວດ ແລະ 90 ມາດຕາ ເພື່ອເຮັດໃຫ້ເນື້ອໃນຂອງກົດໝາຍດັ່ງກ່າວ ຄົບຖ້ວນ ແລະ ສອດຄ່ອງກັບລັດຖະທໍາມະນູນ, ກົດໝາຍອື່ນທີ່ປະກາດໃຊ້ແລ້ວ, ສົນທິສັນຍາ, ສັນຍາສາກົນທີ່ກ່ຽວຂ້ອງ ແລະ ການຈັດຕັ້ງປະຕິບັດຕົວຈິງ ກ່ອນນໍາສະເໜີກອງປະຊຸມຄະນະປະຈຳສະພາແຫ່ງຊາດ ພິຈາລະນາກ່ອນນຳເຂົ້າກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX.
ກອງປະຊຸມຄັ້ງນີ້ ໄດ້ຮັບການສະໜັບສະໜູນໂດຍມູນນິທິເອເຊຍ ປະຈຳ ສປປລາວ.