ໃນລະຫວ່າງວັນທີ 23-25 ເມສາ 2024 ທ່ານ ແກ້ວຈະເລີນ ເຊ່ຍຢີ້ງຢ່າງ ຮອງປະທານກໍາມາທິການບັນດາເຜົ່າ (ກບຜ) ພ້ອມດ້ວຍຄະນະ ຮ່ວມກັບສະພາປະຊາຊົນແຂວງໄໄຊຍະບູລີ ໄດ້ລົງເຄື່ອນໄຫວຕິດຕາມກວດກາບັນດາໂຄງການຈຸດສຸມວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ທີ່ພົວພັນກັບການດຳລົງຊີວິດຂອງປະຊາຊົນບັນດາເຜົ່າຢູ່ແຂວງໄຊຍະບູລີ. ທັງນີ້, ກໍເພື່ອຕິດຕາມກວດກາການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍ ຂອງບັນດາຂະແໜງການ ແລະ ອົງການກ່ຽວຂ້ອງກັບກຳມາທິການບັນດາເຜົ່າ; ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ ໄຂຄວາມທຸກຍາກ, ສ້າງບ້ານພັດທະນາ ຕິດພັນກັບວຽກ ງານ 3 ສ້າງ, ໂຄງການລົງທຶນ ແລະ ການພັດທະນາທີ່ມີຜົນກະທົບຕໍ່ປະຊາຊົນບັນດາເຜົ່າ ທັງເປັນການເກັບກຳຂໍ້ມູນຕົວຈິງຕາມຄຳຮ້ອງ, ຄໍາສະເໜີຂອງປະຊາຊົນ.

ໃນໂອກາດດັ່ງກ່າວ, ຄະນະໄດ້ເຂົ້າຢ້ຽມ ແລະ ເຮັດວຽກກັບສະພາປະຊາຊົນແຂວງ, ຮັບຟັງການລາຍງານຫຍໍ້ຈາກບັນດາພະແນກການຂອງແຂວງ ກ່ຽວກັບວຽກ ງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ວຽກງານແນວລາວສ້າງຊາດ, ວຽກງານອົງການຈັດຕັ້ງມະຫາຊົນ, ວຽກງານພາຍໃນ, ວຽກງານປ້ອງກັນຄວາມສະຫງົບ, ການລົງທຶນຂອງທະນາຄານນະໂຍບາຍຂອງແຂວງ ແລະ ອື່ນໆ. ພ້ອມດຽວກັນນັ້ນ, ທ່ານຮອງປະທານ ກບຜ ກໍໄດ້ເນັ້ນໃຫ້ເອົາໃຈໃສ່ຕື່ມບາງບັນຫາເຊັ່ນ: ການຈັດຕັ້ງປະຕິບັດວຽກງານພັດທະພັດທະນາຊົນນະບົດ ແລະ ແກ້ໄຂຄວາມທຸກຍາກ ທີ່ນອນໃນຂໍ້ຕົກລົງຂອງນາຍົກລັດຖະມົນຕີ ສະບັບເລກທີ 72/ນຍ, ມະຕິກອງປະຊຸມສະພາແຫ່ງຊາດ ສະບັບເລກທີ 82/ສພຊ, ດຳລັດ 348/ລບ ແລະ ກົດໝາຍວ່າດ້ວຍການຈັດສັນພູມລໍາເນົາ ແລະ ອາຊີບຄົງທີ່ ສະບັບເລກທີ 45/ສພຊ, ວຽກງານຕໍ່ຕ້ານ ແລະ ສະກັດກັ້ນຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ວຽກງານພາຍໃນ ຕາມດຳລັດ 315/ລບ, ການຄຸ້ມຄອງການເຂົ້າ-ອອກຂອງພົນລະເມືອງ,​ ການຄຸ້ມຄອງໂຄງການຊ່ວຍເຫຼືອລ້າ, ການຄຸ້ມຄອງຄົນຕ່າງດ້າວ ແລະ ບັນຫາແຮງງານເຄື່ອນຍ້າຍ ແລະ ທຸກຫົວຂໍ້ທີ່ນອນໃນມະຕິຂອງກອງປະຊຸມສະພາແຫ່ງຊາດ ສະບັບ 118/ສພຊ.

ຈາກນັ້ນ, ຄະນະຍັງໄດ້ລົງເຄື່ອນໄຫວພົບປະ ແລະ ເຮັດວຽກ ຢູ່ຈຸດບ້ານປາກເປັດ, ຈຸດບ້ານຫ້ວຍຄູນ, ບ້ານທົງກາບ, ບ້ານແກ່ສີພົມ ເມືອງຊຽງຮ່ອນ ແລະ ຈຸດບ້ານທອງ ເມືອງເງິນອີກດ້ວຍ.

ໂດຍ:ອິນທີ ຂຽວສີຟ້າ