ທ່ານ ນາງ ຄຳພອນ ພິມມະຈັນ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 4, ຮອງປະທານສະພາປະຊາຊົນແຂວງອຸດົມໄຊ ຕາງໜ້າຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 4 ໃຫ້ສໍາພາດກ່ຽວກັບການກຽມຄວາມພ້ອມຂອງແຂວງ ຕໍ່ຜົນກະທົບທີີ່ອາດຈະເກີດຂຶ້ນ ຫລັງເປີດການນໍາໃຊ້ທາງລົດໄຟລາວ-ຈີນ ເຊິ່ງທ່ານໄດ້ສະແດງຄວາມຂອບໃຈມາຍັງສື່ມວນຊົນທຸກສື່ທີ່ເຫັນຄວາມສໍາຄັນ ແລະ ໃຫ້ຄວາມສົນໃຈ ຕໍ່ກັບແຂວງທີ່ມີເສັ້ນທາງລົດໄຟຜ່ານ ຄືແຂວງອຸດົມໄຊພວກເຮົາ ໂດຍສະເພາະຕໍ່ກັບການກຽມຄວາມພ້ອມຂອງແຂວງອຸດົມໄຊ ພາຍຫລັງເປີດນຳໃຊ້ເສັ້ນທາງລົດໄຟລາວ-ຈີນ ສະພາປະຊາຊົນແຂວງ ຈະມີສ່ວນຮ່ວມໃນການຊຸກຍູ້ພະແນກກະສິກໍາ ແລະ ປ່າໄມ້, ພະແນກອຸດສະຫະກໍາ ແລະ ການຄ້າ ແລະ ພະແນກການອື່ນໆ ເພື່ອກະກຽມຄວາມພ້ອມຕໍ່ຜົນກະທົບດັ່ງກ່າວເປັນຕົ້ນແມ່ນຜົນກະທົບທາງດ້ານເສດຖະກິດ,ການຄ້າ, ການສົ່ງອອກ ແລະການທ່ອງທ່ຽວ.
ຮອງປະທານ ສພຂ ອຸດົມໄຊ ໄດ້ໃຫ້ຮູ້ວ່າ: ແຂວງອຸດົມໄຊ ຕັ້ງຢູ່ໃຈກາງຂອງບັນດາແຂວງພາກເໜືອ ມີເສັ້ນທາງລົດໄຟລາວ-ຈີນ ແລ່ນຜ່ານ 126ກວ່າກິໂລແມັດ ແລະ ຜ່ານ 3ເມືອງ ຄື ເມືອງນາໝໍ້, ເມືອງໄຊແລະ ເມືອງງາ; ຕໍ່ກັບການກະກຽມຄວາມພ້ອມຂອງແຂວງຫລັງເປີດການນຳໃຊ້ເສັ້ນທາງລົດໄຟລາວ-ຈີນ ແຂວງຂອງພວກເຮົາ ໂດຍສະເພາະແມ່ນອົງການປົກຄອງແຂວງ ແລະຂະແໜງການທີ່ກ່ຽວຂ້ອງ ແມ່ນໄດ້ມີແຜນກະກຽມຄວາມພ້ອມເພື່ອຂະຫຍາຍພື້ນຖານເສດຖະກີດ ແລະ ຊຸກຍູ້ປະຊາຊົນ, ສົ່ງເສີມທ່າແຮງບົ່ມຊ້ອນຂອງແຂວງ ເປັນຕົ້ນແມ່ນມີແຜນສ້າງແຂວງໃຫ້ເປັນເຂດແລກປ່ຽນສິນຄ້າໂດຍສ້າງເຂດພັດທະນາເຊື່ອມຕໍ່ ກັບແລວທາງລົດໄຟ ແລະ ທາງດ່ວນ (ບໍ່ເຕນ ຫານະຄອນຫລວງວຽງຈັນ) ເຊັ່ນ ຊຸກຍູ້ໃຫ້ເກີດແລວທາງເສດຖະກິດ 3 ສາຍ ຄື ແລວທາງເສດຖະກິດ ຈີນ-ລາວ-ໄທ, ແລວທາງເສດຖະກິດໄທ-ລາວ-ຈີນ-ຫວຽດນາມ ແລະ ແລວທາງເສດຖະກິດ ໄທ-ລາວ-ຫວຽດນາມ. ຊຸກຍູ້ໃຫ້ເກີດມີການກໍ່ສ້າງເສັ້ນທາງເຊື່ອມຕໍ່ແຂວງກັບແຂວງ, ຊຸກຍູ້ໃຫ້ພັດທະນາທ່າເຮືອຕາມລຳນ້ຳຂອງເພື່ອເຮັດໃຫ້ການຂົນສົ່ງທາງນ້ຳມີປະສິດທິຜົນ ແລະ ໄດ້ມາດຕະຖານ ເຊັ່ນ ກໍ່ສ້າງທ່າເຮືອ, ອຸປະກອນຍົກສິນຄ້າ, ສາງເກັບມ້ຽນສິນຄ້າຊົ່ວຄາວ ແລະ ອື່ນໆ.ພ້ອມດຽວກັນນີ້, ແຂວງຍັງມີແຜນສຸມໃສ່ການກໍ່ສ້າງໂຄງລ່າງພື້ນຖານດ້ານໂລຈິດສະຕິກຮອງຮັບການກໍ່ສ້າງເຂົ້າຫາສະຖານີລົດໄຟ ເຊື່ອມຈອດທາງຫລວງແຫ່ງຊາດ ໂດຍສຸມໃສ່ສ້າງໂຄງລ່າງພື້ນຖານໂລຈິດສະຕິກ ແລະ ດ່ານສາກົນທ່າບົກແມ່ນໄດ້ມີກອງປະຊຸມລະຫວ່າງກະຊວງໂຍທາທິການ, ຜູ້ໃຫ້ທຶນສະໜັບສະໜູນ (ທະນາຄານໂລກ) ແລະ ຂະແໜງການທີ່ກ່ຽວຂ້ອງເພື່ອກຳນົດທີ່ຕັ້ງ ແລະລະບົບບໍລິການອື່ນໆ ເຊິ່ງມາຮອດປັດຈຸບັນຍັງບໍ່ທັນເປັນເອກະພາບ; ສຸມໃສ່ກໍ່ສ້າງສະຖານີເຊື່ອມຈອດທາງຫລວງແຫ່ງຊາດ ແລະ ທາງຫລັກຂອງແຂວງ ໂດຍໄດ້ມີການສຳຫລວດທດ້ານເຕັກນິກ, ສະພາບແວດລ້ອມ ແລະ ກຳນົດແຜນການກໍ່ສ້າງເຊິ່ງແຂວງອຸດົມໄຊປະກອບມີ11 ເສັ້ນທາງເຊື່ອມຈອດ, ເຊື່ອມຕໍ່ໄປຫາບັນດາເມືອງ ແລະ ຕ່າງແຂວງ.
ນອກຈາກນີ້, ຍັງສຸມໃສ່ກຽມຄວາມພ້ອມດ້ານການທ່ອງທ່ຽວ, ການຜະລິດກະສິກຳເປັນສິນຄ້າ ແລະ ດ້ານວຽກງານປ້ອງກັນຄວາມສະຫງົບ ມີດັ່ງນີ້:ດ້ານການທ່ອງທ່ຽວ: ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແລະ ພາກສ່ວນກ່ຽວຂ້ອງໄດ້ກະກຽມພື້ນຖານໂຄງລ່າງ ແລະພັດທະນາສະຖານທີ່ທ່ອງທ່ຽວຫລາຍແຫ່ງ ເປັນຕົ້ນແມ່ນນ້ຳກັດຢໍລາປາ, ຖ້ຳຈອມອອງ, ວັດພະເຈົ້າສິງຄຳເມືອງຫລາ ພູທາດລັດຕະນະມິ່ງເມືອງເທສະບານເມືອງໄຊ, ຕາດຕະແລ, ລີສອດແຄມຂອງເມືອງປາກແບງ ແລະບ່ອນອື່ນໆ ເຖິງແມ່ນວ່າສະພາບການລະບາດຂອງພະຍາດໂຄວິດ-19 ຈະເປັນສິ່ງກົດໜ່ວງທ່ວງດຶງການທ່ອງທ່ຽວກໍຕາມແຕ່ອົງການປົກຄອງແຂວງກໍໄດ້ມີຄວາມພະຍາຍາມ ວາງແຜນເພື່ອກຽມເປີດບໍລິການເປັນແຕ່ລະຂັ້ນຕອນ ໝາຍຄວາມວ່າຄ່ອຍປັບປຸງ ແລະ ເປີດໄປເປັນຂັ້ນ ໂດຍປະຕິບັດມາດຕະການປ້ອງກັນພະຍາດໂຄວິດ-19 ໄປພ້ອມໆກັບໄລຍະຂອງການເປີດເສັ້ນທາງລົດໄຟ;
1) ດ້ານການຜະລິດກະສິກຳ: ພະແນກກະສິກຳ ແລະປ່າໄມ້ແຂວງ ແລະ ພະແນກການທີ່ກ່ຽວຂ້ອງໄດ້ສຸມໃສ່ການຜະລິດພືດກະສິກຳເພື່ອສົ່ງອອກໄປຕ່າງປະເທດ ໂດຍສະເພາະໄດ້ຜັນຂະຫຍາຍຂໍ້ກຳນົດດ້ານສຸຂານາໄພພືດຂອງກະຊວງກະສິກຳ ແລະ ປ່າໄມ້ ກ່ຽວກັບການສົ່ງອອກຜົນຜະລິດກະສິກຳຂອງ ສປປລາວ ໄປຍັງ ສປຈີນ ມີ 10 ສະນິດພືດ, 8 ອະນຸສັນຍາ. ສະເພາະແຂວງອຸດົມໄຊສະເໜີໃໝ່ມີ 6 ລາຍການ ປະກອບມີຜະລິດຕະພັນມອນ (ຝັກຫລອກມ້ອນ), ຜົນຜະລິດໝາກພຸກ, ໝາກກ້ຽງ, ໝາກມ່ວງ, ຢາງພາລາອົບແຫ້ງ ແລະ ລຳອ້ອຍ ເຊິ່ງການຜະລິດດັ່ງກ່າວເມື່ອເສັ້ນທາງລົດໄຟເປີດຈະໄດ້ຂົນສົ່ງອອກສູ່ ສປຈີນ ສະດວກ ແລະວ່ອງໄວຂຶ້ນ. ຜ່ານມາແຂວງອຸດົມໄຊພວກເຮົາໄດ້ສົ່ງຜົນຜະລິດກະສິກຳຫລາຍຊະນິດ ເປັນຕົ້ນແມ່ນສາລີ, ໝາກກ້ວຍ, ໝາກມ່ວງ, ໝາກໂມ, ມັນ, ໝາກຖົ່ວ, ໝາກອຶ, ຢາງພາລາ ແລະ ອື່ນໆ ທີ່ສົ່ງອອກ ສປຈີນ ສ້າງລາຍຮັບໃຫ້ປະຊາຊົນຫລາຍພໍສົມຄວນ.
2) ດ້ານປ້ອງກັນຊາດ-ປ້ອງກັນຄວາມສະຫງົບ: ຄະນະພັກ-ຄະນະບັນຊາໄດ້ຈັດວາງກຳລັງເພື່ອປ້ອງກັນໂຄງການເສັ້ນທາງລົດໄຟລາວ-ຈີນຊ່ວງຜ່ານແຂວງອຸດົມໄຊ ມີທັງໝົດ 9 ຈຸດ; ອົງການປົກຄອງແຂວງ,ເມືອງ ແລະ ບ້ານ ຕະຫລອດຮອດປະຊາຊົນບັນດາເຜົ່າ ກໍ່ໃຫ້ການສະໜັບສະໜູນ ເອື້ອອຳນວຍຊ່ວຍເຫລືອເບິ່ງແຍງເຈົ້າໜ້າທີ່ປ້ອງກັນທາງລົດໄຟລາວ-ຈີນ; ປະຊາຊົນສ່ວນຫລາຍແມ່ນເຂົ້າໃຈຕໍ່ແນວທາງຂອງພັກ-ລັດໃນໄລຍະໃໝ່ ແລະ ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບເປັນຢ່າງດີ; ແຕ່ເຖິງຢ່າງໃດກໍຕາມ ໄລຍະຜ່ານມາກໍ່ໄດ້ມີສະພາບການປາກົດການຫຍໍ້ທໍ້ເກີດຂຶ້ນ ເປັນຕົ້ນແມ່ນການລັກອຸປະກອນກໍ່ສ້າງເສັ້ນທາງລົດໄຟ , ລັກສາຍໄຟຟ້າ, ສິ້ນສ່ວນຕູ້ໄຟຟ້າ ແລະເຫລັກປະເພດຕ່າງໆ ສ້າງຄວາມເສຍຫາຍຫລາຍກວ່າ 500 ລ້ານກີບ ແລະ 2 ແສນຢວນ ເຊິ່ງທາງເຈົ້າໜ້າທີ່ກໍໄດ້ກັກຕົວຜູ້ຖືກຫາ ມາດຳເນີນຄະດີຕາມຂັ້ນຕອນ, ພ້ອມທັງໄກ່ເກ່ຍແລະ ສຶກສາອົບຮົມ.ຕອນທ້າຍ, ທ່ານ ນາງຄໍາພອນ ພິມມະຈັນ ກ່າວຕື່ມວ່າ: ມາຮອດປັດຈຸບັນອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ ພວມສຸມໃສ່ແກ້ໄຂບັນຫາທີ່ຍັງຄົງຄ້າງ ແລະ ສືບຕໍ່ປັບປຸງແກ້ໄຂ ເພື່ອໃຫ້ທັນກັບການກະກຽມຄວາມພ້ອມ ໃຫ້ແກ່ການເປີດເສັ້ນທາງລົດໄຟລາວ-ຈີນ ໃຫ້ທັນຕາມແຜນການ.