(ສພຊ)ໃນວັນທີ 6 ກໍລະກົດ 2018 ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫລວງ ແລະ ຄະນະ ໄດ້ເຄື່ອນໄຫວຕິດຕາມໂຄງການກໍ່ສ້າງຂົວຂ້າມນ້ຳງື່ມ ບ້ານນາບົງຫາບ້ານທ່າກົກໄຮ ເມືອງປາກງື່ມ ນະຄອນຫລວງວຽງຈັນ ໂດຍມີອຳນາດການປົກຄອງເມືອງປາກງື່ມ, ພະນັກງານ ແລະ ວິຊາການກ່ຽວຂ້ອງເຂົ້າຮ່ວມ.
ທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ໄດ້ລາຍງານຫຍໍ້ການຈັດຕັ້ງປະຕິບັດໜ້າວຽກກໍ່ສ້າງຂົວຂ້າມນ້ຳງື່ມວ່າ: ໂຄງການກໍ່ສ້າງຂົວຂ້າມນ້ຳງື່ມ ບ້ານນາບົງຫາບ້ານທ່າກົກໄຮ ເປັນໂຄງການທີ່ໄດ້ຮັບການຊ່ວຍເຫລືອລ້າຈາກທ່ານ ສັກໄຊ ວົງມາລາບັນດິດ (ປີເຕີ ຈັນ) ປະທານບໍລິສັດ ລາວເວີນ ອະສັງຫາລີມະຊັບ ຈຳກັດ ເຊິ່ງຂົວດັ່ງກ່າວ ມີມູນຄ່າໂຄງການ 105 ຕື້ກີບ, ເປັນຂົວເບຕົງອັດແຂງ (ເບຕົງເສີມເຫລັກ ແລະ ອັດແຮງດ້ວຍລວດສະລີງ) ມີເສົາ 5 ຈຸດຄື: 2 ຈຸດຢູ່ກາງນ້ຳ ແລະ 3 ຈຸດທີ່ຂອບຝັ່ງ, ມີຄວາມຍາວ 236 ແມັດ, ໜ້າກວ້າງ 11 ແມັດ, ມີທາງຍ່າງ 2 ເບື້ອງ ກວ້າງເບື້ອງລະ 1,5 ແມັດ, ມີຮາວກັນຕົກ, ຮາວກັນຊົນ, ປ້າຍສັນຍານຈາລະຈອນ ແລະ ໄຟເຢືອງທາງຕະຫລອດຄວາມຍາວຂອງຂົວ; ການກໍ່ສ້າງຂົວດັ່ງກ່າວ ໄດ້ກໍ່ສ້າງເສົາເຂັມເຈາະຂະໜາດໜ້າຕັດ 1,5 ແມັດ ເລິກ 35 ແມັດ ຈຳນວນ 14 ເຂັມທີ່ກາງນ້ຳ, ເຂັມເຕາະຂະໜາດໜ້າຕັດ 1,2 ແມັດ ເລິກ 35 ແມັດ ຈຳນວນ 19 ເຂັມ, ມີການກວດກາຄວາມແຂງແຮງ ແລະ ຄວາມສົມບູນຂອງເຂັມຢ່າງຄົບຖ້ວນ ເຊິ່ງໄລຍະເວລາການກໍ່ສ້າງແມ່ນ 24 ເດືອນ ໂດຍເລີ່ມແຕ່ເດືອນພຶດສະພາ 2016 ເປັນຕົ້ນມາ, ປັດຈຸບັນໂຄງການແມ່ນສຳເລັດແລ້ວປະມານ 92% ແລະ ຄາດວ່າຈະໃຫ້ສຳເລັດໃນເດືອນສິງຫາ 2018 ປັດຈຸບັນ.
ໃນໂອກາດນີ້, ທ່ານປະທານສະພາແຫ່ງຊາດໄດ້ສະແດງຄວາມຂອບໃຈຕໍ່ທ່ານ ສັກໄຊ ວົງມາລາບັນດິດ ທີ່ໄດ້ສະຫລະຊັບສົມບັດສ່ວນຕົວຊ່ວຍເຫລືອພັກ-ລັດຖະບານ ໃນການພັດທະນາພື້ນຖານໂຄງລ່າງ ໂດຍສະເພາະແມ່ນຂົວຂ້າມນ້ຳງື່ມບ້ານນາບົງຫາບ້ານທ່າກົກໄຮ ເຊິ່ງພາຍຫລັງທີ່ຂົວດັ່ງກ່າວສ້າງສຳເລັດ ຈະເຮັດໃຫ້ພໍ່ແມ່ປະຊາຊົນດຳລົງຊີວິດສະດວກສະບາຍ ໂດຍສະເພາະແມ່ນນ້ອງນັກຮຽນທີ່ເດີນທາງໄປໂຮງຮຽນ ມີເສັ້ນທາງສັນຈອນສະດວກສະບາຍຂຶ້ນຕື່ມອີກ; ພ້ອມນີ້, ທ່ານຍັງໄດ້ເນັ້ນໃຫ້ອຳນາດການປົກຄອງຂອງເມືອງປາກງື່ມ ຊຸກຍູ້ສົ່ງເສີມການຜະລິດສິນຄ້າກະສິກຳອິນຊີ ເຊິ່ງປັດຈຸບັນເມືອງປາກງື່ມມີບ້ານທີ່ມີການປູກຜັກປອດສານຜິດສະໜອງໃຫ້ນະຄອນຫລວງ ດັ່ງນັ້ນ, ເມື່ອຂົວດັ່ງກ່າວສຳເລັດຄາດວ່າຈະເປັນຜົນປະໂຫຍດທີ່ສຸດໃຫ້ແກ່ຊາວກະສິກຳໃນການຂົນສົ່ງສິນຄ້າ; ນອກນັ້ນ, ຍັງຈະສ້າງຄວາມສະດວກໃຫ້ແກ່ການທ່ອງທ່ຽວ ຈຶ່ງຮຽກຮ້ອງໃຫ້ອຳນາດການປົກຄອງເມືອງປາກງື່ມ ກໍຄືນະຄອນຫລວງວຽງຈັນ ຄົ້ນຄວ້າພິຈາລະນາຊອກຫາຊ່ອງທາງ ແລະ ຄວາມເປັນໄປໄດ້ໃນການສ້າງໃຫ້ເມືອງປາກງື່ມກາຍເປັນແຫລ່ງທ່ອງທ່ຽວທີ່ມີຊື່ສຽງ ແລະ ໜ້າທ່ຽວຊົມຂອງນະຄອນຫລວງ.
(ນາງ ປາກາລັກ ພົມມີໄຊ)