(ສພຊ) – ຕອນບ່າຍວັນທີ 15 ມັງກອນນີ້ ທີ່ສະພາແຫ່ງຊາດ, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຮອງປະທານຜູ້ປະຈຳການ ແລະ ຫົວໜ້າກອງເລຂາຂອງຄະນະກຳມະການລະດັບຊາດປັບປຸງລັດຖະ ທຳມະນູນ ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບການຈັດຕັ້ງທາບທາມຄຳເຫັນໃສ່ຮ່າງລັດຖະທຳມະນູນ ສະບັບປັບປຸງປີ 2025 ໃນທົ່ວປະເທດ ເຊິ່ງທ່ານໄດ້ກ່າວວ່າ: ການຈັດຕັ້ງການທາບທາມຄຳເຫັນໃສ່ຮ່າງລັດຖະທຳມະນູນສະບັບປັບປຸງຄັ້ງນີ້ ມີຄວາມໝາຍສຳຄັນຢ່າງຍິ່ງ ແລະ ແມ່ນຄວາມຈຳເປັນຢ່າງພາວະວິໄສ, ເພາະວ່າລັດຖະທຳມະນູນ ແມ່ນນິຕິກຳສູງສຸດຂອງລັດ ແຫ່ງ ສປປລາວ ແລະ ເປັນກົດໝາຍພື້ນຖານຂອງຊາດລາວເຮົາ. ຜ່ານການກະກຽມຢ່າງເຄັ່ງຮ້ອນເປັນເວລາ 6 ເດືອນເຕັມ ນັບແຕ່ເດືອນມິຖຸນາ 2024 ເປັນຕົ້ນມາ, ຮ່າງລັດຖະທຳມະນູນສະບັບປັບປຸງ ໄດ້ຮັບການຄົ້ນຄວ້າ, ວິເຄາະ, ວິໄຈ ແລະ ປັບປຸງໃຫ້ສຳເລັດເປັນສະບັບສົມບູນໂດຍພື້ນຖານ; ສະນັ້ນ, ປະຕິບັດຕາມມາດຕາ 14 ຂອງລັດຖະທຳມະນູນສະບັບປີ 2015 ແລະ ມາດຕາ 39 ຂອງກົດໝາຍວ່າດ້ວຍການສ້າງນິຕິກຳ ສະບັບປີ 2021, ຄະນະກຳມະການລະດັບຊາດປັບປຸງລັດຖະທຳມະນູນ ຈຶ່ງຕົກລົງໃຫ້ນຳເອົາຮ່າງລັດຖະທຳມະນູນໄປຈັດຕັ້ງທາບທາມຄຳເຫັນທາງເລິກ ໂດຍຜ່ານກອງປະຊຸມ ແລະ ທາງກວ້າງ ໂດຍຜ່ານພາຫະນະສື່ມວນຊົນ ເພື່ອລະດົມຄຳເຫັນ, ສະຕິປັນຍາລວມ ຂອງທົ່ວພັກ, ທົ່ວລັດ, ທົ່ວກຳລັງປະກອບອາວຸດ, ພາກທຸລະກິດ ທັງລັດ ແລະ ເອກະຊົນ ກໍຄືປະຊາຊົນລາວບັນດາເຜົ່າໃນທົ່ວປະເທດ ແນໃສ່ເຮັດໃຫ້ເນື້ອໃນຂອງຮ່າງລັດຖະທຳມະນູນສະບັບປັບປຸງ ເປັນສະບັບທີ່ມີເນື້ອໃນຄົບຖ້ວນ, ຮັດກຸມ ແລະ ສົມບູນ ເພື່ອຈະນຳໄປສະເໜີຕໍ່ກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດຊຸດທີ IX ພິຈາລະນາຮັບຮອງເອົາ.

ຈຸດປະສົງ ແລະ ລະດັບຄາດໝາຍໃນການຈັດຕັ້ງການທາບທາມຄຳເຫັນໃສ່ຮ່າງລັດຖະທຳມະນູນສະບັບປັບປຸງຄັ້ງນີ້ ແມ່ນແນໃສ່: 1. ປະກອບຄຳເຫັນເຂົ້າໃສ່ເນື້ອໃນຂອງຮ່າງລັດຖະທຳມະນູນທີ່ໄດ້ປັບປຸງ ເຊິ່ງຄະນະກຳມະ ການລະດັບຊາດປັບປຸງລັດຖະທຳມະນູນ ໄດ້ນຳມາຈັດຕັ້ງການທາບທາມຄຳເຫັນຄັ້ງນີ້ ໃຫ້ເປັນສະບັບຮ່າງທີ່ມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບໂຄງການການເມືອງຂອງພັກ ສະບັບທີ 3 ແລະ ລາຍງານການເມືອງຕໍ່ກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ ເຮັດໃຫ້ຮ່າງລັດຖະທຳມະນູນກາຍເປັນຮ່າງສະບັບສົມບູນ; 2. ເຊື່ອມຊຶມທັດສະນະຊີ້ນຳຂອງສູນກາງພັກ ຕໍ່ການປັບປຸງລັດຖະທຳມະນູນຄັ້ງນີ້ ແລະ ສ້າງຄວາມຮັບຮູ້ເຂົ້າໃຈທີ່ຖືກຕ້ອງຕໍ່ການປັບປຸງເນື້ອໃນຂອງຮ່າງລັດຖະທຳມະນູນ ເພື່ອສືບຕໍ່ຍົກສູງສະຕິເຄົາລົບ ແລະ ປະຕິບັດລັດຖະທຳມະນູນໃນທົ່ວສັງຄົມ ໃຫ້ເຂັ້ມງວດ ແລະ ສັກສິດກວ່າເກົ່າ; 3. ປະກອບສ່ວນຍູ້ແຮງຂະບວນການແຂ່ງຂັນກັນສ້າງຜົນງານຂໍ່ານັບຮັບຕ້ອນການດຳເນີນກອງປະຊຸມໃຫຍ່ສາມຂັ້ນຂອງພັກປະຊາຊົນປະຕິວັດລາວ ແລະ ຂ່ຳນັບຮັບຕ້ອນສາມວັນປະຫວັດສາດທີ່ສຳຄັນຂອງຊາດໃນປີ 2025 ຄື: ວັນເກີດຂອງປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກຂອງປະຊາຊົນລາວບັນດາເຜົ່າ ຄົບຮອບ 105 ປີ, ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ແລະ ວັນສ້າງຕັ້ງລັດແຫ່ງ ສປປລາວ ຄົບຮອບ 50 ປີ.

ສຳລັບເນື້ອໃນທີ່ສຳຄັນຕົ້ນຕໍໃນການຈັດຕັ້ງການທາບທາມຄຳເຫັນໃສ່ຮ່າງລັດຖະທຳມະນູນ ມີ: 1. ຮ່າງລັດຖະທຳມະນູນສະບັບປັບປຸງ, 2. ບົດອະ ທິບາຍການປັບປຸງເນື້ອໃນຂອງຮ່າງລັດຖະທຳມະ ນູນ, 3. ຄຳຖາມເຈາະຈີ້ມ ແລະ ອື່ນໆ.

ສຳລັບການຈັດຕັ້ງການທາບທາມຄຳເຫັນໃສ່ຮ່າງລັດຖະທຳມະນູນໂດຍຜ່ານກອງປະຊຸມນັ້ນ, ຄະນະກຳມະການລະດັບຊາດປັບປຸງລັດຖະທຳມະນູນ ໄດ້ຕົກລົງໃຫ້ເປີດກອງປະຊຸມຢູ່ 7 ຈຸດຄື: ຈຸດທີ 1 ສຳລັບພະນັກງານນຳພາ-ຄຸ້ມຄອງຂອງບັນດາກະຊວງ, ອົງການອ້ອມຂ້າງສູນກາງ ລວມທັງມະຫາວິທະຍາໄລແຫ່ງຊາດ, ມະຫາວິທະຍາໄລສຸຂະພາບ, ສະພາການຄ້າ ແລະ ອຸດສາຫະກຳແຫ່ງຊາດລາວ ຈັດຢູ່ນະຄອນຫຼວງວຽງຈັນ, ວັນທີ 16 ມັງກອນ 2025; ຈຸດທີ 2 ສຳລັບພະນັກງານນຳພາ-ຄຸ້ມຄອງຂອງ 3 ແຂວງຄື: ນະຄອນຫຼວງວຽງຈັນ, ວຽງຈັນ ແລະ ບໍລິຄໍາໄຊ ຈັດຢູ່ນະຄອນຫຼວງວຽງຈັນ, ວັນທີ 17 ມັງກອນ 2025; ຈຸດທີ 3 ສຳລັບພະນັກງານນຳພາ-ຄຸ້ມຄອງຂອງ 3 ແຂວງຄື: ຊຽງຂວາງ, ໄຊສົມບູນ ແລະ ຫົວພັນ ຈັດຢູ່ແຂວງຊຽງຂວາງ, ວັນທີ 16-17 ມັງກອນ 2025; ຈຸດທີ 4 ສຳລັບພະນັກງານນຳພາ-ຄຸ້ມຄອງຂອງ 3 ແຂວງຄື: ສະຫວັນນະເຂດ, ຄໍາມ່ວນ ແລະ ຈຳປາສັກ ຈັດຢູ່ແຂວງສະຫວັນນະເຂດ, ວັນທີ 16-17 ມັງກອນ 2025; ຈຸດທີ 5 ສຳລັບພະນັກງານນຳພາ-ຄຸ້ມຄອງຂອງ 3 ແຂວງຄື: ຫຼວງນໍ້າທາ, ບໍ່ແກ້ວ ແລະ ຜົ້ງສາລີ ຈັດຢູ່ແຂວງຫຼວງນໍ້າທາ, ວັນທີ 23-24 ມັງກອນ 2025; ຈຸດທີ 6 ສຳລັບພະນັກງານນຳພາ-ຄຸ້ມຄອງຂອງ 3 ແຂວງຄື: ຫຼວງພະບາງ, ໄຊຍະບູລີ ແລະ ອຸດົມໄຊ ຈັດຢູ່ແຂວງຫຼວງພະບາງ, ວັນທີ 23-24 ມັງກອນ 2025; ຈຸດທີ 7 ສຳລັບພະນັກງານນຳພາ-ຄຸ້ມຄອງຂອງ 3 ແຂວງຄື: ເຊກອງ, ສາລະວັນ ແລະ ອັດຕະປື ຈັດຢູ່ແຂວງເຊກອງ, ວັນທີ 21-22 ມັງກອນ 2025.

ສຳລັບການຈັດຕັ້ງການທາບທາມຄຳເຫັນໂດຍຜ່ານພາຫະນະສື່ມວນຊົນນັ້ນ, ຈະມີການຖະແຫຼງຂ່າວ, ຈັດລາຍການສົນທະນາກ່ຽວກັບການປັບປຸງເນື້ອໃນຮ່າງລັດຖະທຳມະນູນ; ສໍາພາດບຸກຄົນໃນຄະນະກໍາມະການລະດັບຊາດປັບປຸງລັດຖະທຳມະນູນ, ຄະນະປະຈຳສະພາແຫ່ງຊາດ, ພະນັກງານບຳນານ ແລະ ຕົວແທນຂອງພາກສ່ວນຕ່າງໆ ທັງຢູ່ສູນກາງ ແລະ ທ້ອງຖິ່ນ ໂດຍຜ່ານໂທລະພາບ, ວິທະຍຸກະຈາຍສຽງແຫ່ງຊາດ ແລະ ສື່ອື່ນໆ; ພິມເນື້ອໃນຮ່າງລັດຖະທຳມະນູນສະບັບປັບປຸງ ໃສ່ໜັງສືພິມ, ເວັບໄຊ ແລະ ອື່ນໆ.

ການຈັດຕັ້ງການທາບທາມຄຳເຫັນໃສ່ຮ່າງລັດຖະທຳມະນູນ ແມ່ນໃຫ້ສຳເລັດທົ່ວປະເທດໃນເດືອນມັງກອນນີ້; ຫຼັງຈາກນັ້ນ, ຈະໄດ້ສະຫຼຸບສັງລວມຜົນຂອງການທາບທາມຄຳເຫັນເພື່ອລາຍງານຂໍທິດຊີ້ນຳຈາກຂັ້ນເທິງ ແລ້ວສືບຕໍ່ຮຽບຮຽງຮ່າງລັດຖະທຳມະນູນໃຫ້ກາຍເປັນຮ່າງສະບັບສົມບູນ.

ໃນການຈັດຕັ້ງການທາບທາມຄຳເຫັນໃສ່ຮ່າງລັດຖະທຳມະນູນສະບັບປັບປຸງຄັ້ງນີ້, ພວກເຮົາຈົ່ງພ້ອມກັນເອົາໃຈໃສ່ຄົ້ນຄວ້າ, ເຊື່ອມຊຶມ ແລະ ກຳແໜ້ນທັດສະນະຊີ້ນຳຂອງສູນກາງພັກປະຊາຊົນປະຕິວັດລາວ ຕໍ່ການປັບປຸງລັດຖະທຳມະນູນ ເພື່ອຮັບປະກັນເຮັດໃຫ້ການປະກອບຄຳເຫັນຖືກທິດ, ສອດຄ່ອງກັບແນວທາງປ່ຽນແປງໃໝ່ຮອບດ້ານມີຫຼັກການຂອງພັກ ແລະ ສະພາບຄວາມເປັນຈິງໃນການປົກປັກຮັກສາ ແລະ ພັດທະນາປະເທດຊາດໃນໄລຍະໃໝ່, ມີປະສິດທິພາບ, ປະສິດທິຜົນ.

ເນື້ອໃນທັດສະນະຊີ້ນຳຂອງສູນກາງພັກປະຊາຊົນປະຕິວັດລາວ ຕໍ່ການປັບປຸງລັດຖະທຳມະນູນມີ: 1. ແນໃສ່ການປັບປຸງລະບົບອຳນາດແຫ່ງລັດ ໃຫ້ມີປະສິດທິພາບສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ການເຊື່ອມໂຍງເສດຖະກິດພາກພື້ນ ແລະ ສາກົນ ແນໃສ່ສ້າງພື້ນຖານທາງດ້ານກົດໝາຍ ກໍຄືນິຕິກຳທີ່ຈະວາງອອກໃນຕໍ່ໜ້າ ໃຫ້ຮັບປະກັນແນວທາງການເມືອງຂອງພັກ, ການຄຸ້ມຄອງ-ບໍລິຫານລັດໃນໄລຍະໃໝ່; 2. ການປັບປຸງລັດຖະທຳມະນູນຄັ້ງນີ້ ຕົ້ນຕໍແມ່ນສຸມໃສ່ປັບປຸງບາງໝວດ, ບາງມາດຕາ ເພື່ອຮັບປະກັນ ຫຼື ຮອງຮັບແນວທາງການເມືອງຂອງພັກ ແລະ ແນວທາງການຈັດຕັ້ງ, ການຄຸ້ມຄອງ-ບໍລິຫານລັດໃນໄລຍະໃໝ່ ກໍຄືແນວທາງປ່ຽນແປງໃໝ່ໃນຊຸມປີຕໍ່ໜ້າ ໂດຍສະເພາະໃນສະໄໝທີ XII ຂອງພັກ ຫາກບໍ່ແມ່ນການປັບປຸງທັງໝົດເນື້ອໃນຂອງລັດຖະທຳມະນູນ; ໝາຍວ່າ ອັນໃດທີ່ເຂົ້າໃຈເປັນເອກະພາບ, ປະຕິບັດມີປະສິດທິຜົນ, ບໍ່ມີຄວາມສັບສົນ ຫຼື ເປັນບັນຫາຫຍຸ້ງຍາກໃນການຈັດຕັ້ງປະຕິບັດ ກໍບໍ່ຈຳເປັນຕ້ອງປັບປຸງຕື່ມອີກ; 3. ການປັບປຸງລັດຖະທຳມະນູນ ຕ້ອງມີເນື້ອໃນສອດຄ່ອງກັບບັນດາເນື້ອໃນຂອງໂຄງການການເມືອງຂອງພັກ ສະບັບທີ 3, ຮ່າງລາຍງານການເມືອງທີ່ຈະສະເໜີຕໍ່ກອງປະຊຸມໃຫຍ່ ສະໄໝທີ XII ຂອງພັກ, ມະຕິ 05/ຄບສພ, ມະຕິ 04/ກມສພ ແລະ ຄໍາສັ່ງຂອງຄະນະເລຂາທິການສູນກາງພັກ ເລກທີ 173/ຄລສພ ໂດຍສະເພາະບັນຫາບົດບາດພັກເປັນແກນນໍາ, ບັນຫາຈຸດໝາຍສັງຄົມນິຍົມ, ບັນຫາເສດຖະກິດເອກະລາດເປັນເຈົ້າຕົນເອງ, ບັນຫາການແບ່ງຂັ້ນຄຸ້ມຄອງ, ການກໍານົດຊື່ເອີ້ນຕ່າງໆ ຕ້ອງປັບປຸງໄປລວງດຽວກັນ.

ທ່ານ ສຈ. ປອ. ຈະເລີນ ເຍຍປາວເຮີ ກ່າວໃນຕອນທ້າຍວ່າ: ການສ້າງ ແລະ ປັບປຸງລັດຖະທຳມະນູນ ເປັນວຽກງານທີ່ສຳຄັນທີ່ສຸດຢູ່ແລ້ວ, ແຕ່ການຈັດຕັ້ງປະຕິບັດລັດຖະທຳມະນູນໃຫ້ເກີດດອກອອກຜົນເປັນຈິງ ດ້ວຍການຫັນເອົາລັດຖະທຳມະນູນເປັນກົດໝາຍ ແລະ ນິຕິກຳໃຕ້ກົດໝາຍ ກໍຄືການຫັນເຂົ້າສູ່ຊີວິດຕົວຈິງຂອງທົ່ວສັງຄົມນັ້ນ ເປັນວຽກງານໜຶ່ງທີ່ມີຄວາມໝາຍສຳຄັນ ແລະ ມີຄວາມຫຍຸ້ງຍາກສັບສົນຍິ່ງກວ່າການສ້າງ ແລະ ປັບປຸງລັດຖະທຳມະນູນ ຫຼາຍສິບເທົ່າ. ສະນັ້ນ, ພວກເຮົາຈົ່ງພ້ອມກັນປະກອບຄຳຄິດເຫັນເຮັດໃຫ້ຮ່າງລັດຖະທຳມະນູນສະບັບນີ້ ກາຍເປັນສະບັບສົມບູນ ແລະ ໃນເມື່ອສະພາແຫ່ງຊາດ ໄດ້ຮັບຮອງ ແລະ ຖືກປະກາດໃຊ້ໂດຍລັດຖະດຳລັດຂອງປະທານປະເທດແລ້ວ ມັນເລັ່ງທວງໃຫ້ທົ່ວພັກ, ທົ່ວລັດ, ທົ່ວກຳລັງປະກອບອາວຸດ, ຜູ້ປະກອບການທັງພາກລັດ ແລະ ເອກະຊົນ ກໍຄືປະຊາຊົນລາວບັນດາເຜົ່າໃນທົ່ວປະເທດ ຈົ່ງພ້ອມກັນສຶກສາ, ຄົ້ນຄວ້າ ແລະ ເຊື່ອມຊຶມເນື້ອໃນຂອງລັດຖະທຳມະນູນໃຫ້ເລິກເຊິ່ງ ພ້ອມທັງຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ ໃຫ້ເຂັ້ມງວດ, ສັກສິດ ແນໃສ່ເຮັດໃຫ້ການສ້າງລັດປະຊາທິປະໄຕປະຊາຊົນລາວ ພາຍໃຕ້ການນຳພາຂອງພັກປະຊາຊົນປະຕິວັດລາວ ເປັນລັດທີ່ປົກຄອງດ້ວຍກົດໝາຍ ໃຫ້ມີຜົນສັກສິດເປັນກ້າວໆ, ຮັບປະກັນການເສີມຂະຫຍາຍສິດເປັນເຈົ້າປະເທດຊາດ, ສິດ ແລະ ປະຊາທິປະໄຕຂອງປະຊາຊົນລາວບັນດາເຜົ່າ ເພື່ອປົກປ້ອງຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ, ພັດທະນາເສດຖະກິດ-ສັງຄົມໃຫ້ຂະຫຍາຍຕົວ ແລະ ຫຼຸດພົ້ນອອກຈາກຄວາມຫຍຸ້ງຍາກທີ່ພວກເຮົາພວມປະສົບໃນປັດຈຸບັນ ຕາມທິດຍູ້ແຮງການສ້າງເສດຖະກິດເອກະລາດເປັນເຈົ້າຕົນເອງ, ເສີມຂະຫຍາຍຄວາມເປັນເຈົ້າການໃນການເຊື່ອມໂຍງກັບພາກພື້ນ ແລະ ສາກົນ, ພາປະເທດຊາດກ້າວເດີນຕາມເສັ້ນທາງກ້າວຂຶ້ນສັງຄົມນິຍົມຢ່າງໜັກແໜ້ນ ແລະ ມິໄຊ.