(ສພຊ) – ຕອນເຊົ້າວັນທີ 04 ທັນວານີ້, ທ່ານຮອງປະທານສະພາແຫ່ງຊາດ ຄໍາໃບ ດໍາລັດ ຕາງໜ້າໃຫ້ຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຜົນສຳເລັດການພິຈາລະນາຮັບຮອງບົດລາຍງານຂອງລັດຖະບານໃນຂົງເຂດວຽກງານວັດທະນະທໍາ-ສັງຄົມ ໂດຍສະເພາະທິດທາງໃນຕໍ່ໜ້າ ເຊິ່ງທ່ານໃຫ້ຮູ້ວ່າ: ກອງປະຊຸມສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດຊຸດ​ທີ IX ໄດ້ມອບໃຫ້ລັດຖະບານນໍາໄປຄົ້ນຄວ້າ, ຈັດຕັ້ງປະຕິບັດ ຄື: 1. ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ຄູອາຈານ ມີຄຸນທາດ-ການເມືອງທີ່ໜັກແໜ້ນ, ມີຈັນຍາບັນ, ຈັນຍາທຳ, ມີຄວາມຮັກຊາດ ແລະ ມີຄວາມອົດທົນຜ່ານຜ່າຄວາມຫຍຸ້ງຍາກ; 2. ຄົ້ນຄວ້າ, ສ້າງ, ປັບປຸງ ກົດໝາຍ ແລະ ນິຕິກໍາໃຕ້ກົດໝາຍ ທີ່ເຫັນວ່າມີຄວາມຈໍາເປັນ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມໃນແຕ່ລະໄລຍະ; 3. ສຸມໃສ່ສ້າງ ແລະ ປັບປຸງຫຼັກສູດການຮຽນ-ການສອນໃນສາຍສາມັນສຶກສາ, ສາຍສາມັນວິຊາຊີບ ໃຫ້ມີຄຸນນະພາບສູງຂຶ້ນ; 4. ຄົ້ນຄວ້າການສ້າງພື້ນຖານໂຄງລ່າງທາງດ້ານການສຶກສາ, ສ້າງໂຮງຮຽນກິນນອນ, ທີ່ພັກສຳລັບນັກຮຽນຢູ່ເຂດຊົນນະບົດ-ຫ່າງໄກສອກຫຼີກ, ສະໜອງວັດຖຸອຸປະກອນການຮຽນ-ການສອນ, ອຸປະກອນກິລາ, ສິລະປະ, ມີກິດຈະກຳສຳລັບໄວໜຸ່ມ ແລະ ສ້າງເງື່ອນໄຂສະພາບແວດລ້ອມເພື່ອດຶງດູດໃຫ້ນັກ ຮຽນຢາກໄປຮຽນ; 5. ປັບປຸງກົນໄກການປະ ສານງານ, ແບບແຜນວິທີເຮັດວຽກ ຂອງຄະນະພັດທະນາການສຶກສາຂັ້ນບ້ານ ເພື່ອຮັບປະກັນການຄຸ້ມຄອງ ແລະ ພັດທະນາຊຸມຊົນ ໃຫ້ມີປະສິດທິຜົນສູງຂຶ້ນກວ່າເກົ່າ; 6. ທຸກພາກສ່ວນໃນສັງຄົມ ໂດຍສະເພາະສະຖາບັນຄອບຄົວ, ອຳ ນາດການປົກຄອງບ້ານ… ເປັນເຈົ້າການສຶກສາອົບຮົມໃຫ້ນັກຮຽນ, ນັກສຶກສາ ເຫັນໄດ້ຄວາມສຳຄັນຂອງວຽກງານການສຶກສາ, ກວດກາຄືນ ແລະ ຊອກວິທີແກ້ໄຂບັນຫາການຂາດແຄນຄູສອນ, ປຸກລະດົມ, ສົ່ງເສີມການເຂົ້າຮຽນໃນທຸກຊັ້ນທຸກສາຍ, ເຮັດໃຫ້ອັດຕາການປະລະການຮຽນຫຼຸດລົງ; 7. ສູ້ຊົນ, ຄົ້ນຄວ້າແກ້ໄຂງົບປະມານເຂົ້າໃນວຽກງານສຶກສາ ໃຫ້ໄດ້ຕາມກົດໝາຍກຳນົດໄວ້; 8. ສືບຕໍ່ເພີ່ມທະວີຄວາມເປັນເຈົ້າການໃນການປະສານສົມທົບກັນ ເພື່ອຈັດຕັ້ງຜັນຂະຫຍາຍມະຕິຕົກລົງ ເລກທີ 09/ລບ, ລົງວັນທີ 17 ກໍລະກົດ 2023 ກ່ຽວກັບນະໂຍບາຍ, ມາດຕະການແກ້ໄຂການຂາດແຄນຄູສອນ ແລະ ການແກ້ໄຂການປະລະຂອງນັກຮຽນ, ສົ່ງເສີມການເຂົ້າຮຽນວິຊາຊີບໃຫ້ຫຼາຍ, ທົ່ວເຖິງ ແລະ ເປັນຮູບທໍາຫຼາຍຂຶ້ນ; 9. ສືບຕໍ່ຈັດຕັ້ງປະຕິບັດ 6 ຍຸດທະສາດຫຼັກ ແລະ 3 ຍຸດທະສາດທີ່ປິ່ນອ້ອມ ທີ່ໄດ້ກຳນົດໃນຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2025 ໃຫ້ສຳເລັດຕາມແຜນການທີ່ວາງໄວ້; 10. ສ້າງເງື່ອນໄຂ, ສະພາບແວດລ້ອມທີ່ເອື້ອອຳນວຍໃຫ້ແກ່ການພັດທະນາຊັບພະຍາກອນມະນຸດ ເປັນຕົ້ນສືບຕໍ່ກໍ່ສ້າງ, ປັບປຸງພື້ນຖານໂຄງລ່າງດ້ານການສຶກສາ, ສາທາລະນະສຸກ, ແຮງງານ ແລະ ສະຫວັດດີການ-ສັງຄົມ ເພື່ອເຮັດໃຫ້ທົ່ວສັງຄົມສາມາດເຂົ້າເຖິງໄດ້ຢ່າງທົ່ວເຖິງ.

ສຳລັບການປະເມີນຜົນການຈັດຕັ້ງປະຕິບັດ 4 ກົດໝາຍ ໃນຂົງເຂດວັດທະນະທຳ-ສັງຄົມ (ກົດໝາຍວ່າດ້ວຍການສຶກສາ, ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ, ກົດໝາຍວ່າດ້ວຍແຮງງານ ແລະ ກົດໝາຍວ່າດ້ວຍປ້າຍ), ກອງປະຊຸມໄດ້ສະເໜີວິທີການ ແລະ ມາດຕະການແກ້ໄຂໃນຕໍ່ໜ້າ ເປັນຕົ້ນ: 1. ການປັບປຸງກົດໝາຍ ແລະ ນິຕິກຳໃຕ້ກົດໝາຍໃນຕໍ່ໜ້າ ໃຫ້ແທດເໝາະກັບຕົວຈິງ, ສອດຄ່ອງກັບລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ, ສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ແລະ ການພັດທະນາເສດຖະກິດ-ສັງຄົມໃນແຕ່ລະໄລຍະ; 2. ການປັບປຸງເນື້ອໃນຂອງກົດໝາຍ ຕ້ອງແນໃສ່ການແກ້ໄຂບັນຫາທີ່ເຫັນວ່າບໍ່ທັນສອດຄ່ອງ, ມີຊ່ອງວ່າງ, ການຈັດຕັ້ງປະຕິບັດມີຄວາມຊຳ້ຊ້ອນ, ບັນຫາທີ່ຂັດກັບກົດໝາຍ ຫຼື ນິຕິກຳອື່ນ ແລະ ເພີ່ມບາງເນື້ອໃນທີ່ກົດໝາຍຍັງບໍ່ທັນໄດ້ກຳນົດ ໃຫ້ຄົບຖ້ວນ, ຮັດກຸມ, ເປັນລະບົບຄົບຊຸດ; 3. ຮີບຮ້ອນຄົ້ນຄວ້າຜັນຂະຫຍາຍມາດຕາຂອງກົດໝາຍທີ່ກຳນົດໃຫ້ອອກເປັນນິຕິກຳໃຕ້ກົດໝາຍ ແລະ ປະກາດໃຊ້ໂດຍໄວ; ພ້ອມກັນນັ້ນ, ໃຫ້ສືບຕໍ່ຄົ້ນຄວ້າ ແລະ ສັງລວມບັນດາມາດຕາຂອງກົດໝາຍທີ່ເຫັນວ່າມີຄວາມຈໍາເປັນຕ້ອງໄດ້ມີການປັບປຸງ ເພື່ອເຮັດໃຫ້ກົດໝາຍມີຄວາມສອດຄ່ອງ, ແທດເໝາະກັບສະພາບຕົວຈິງຂອງສັງຄົມ, ສາມາດຈັດຕັ້ງປະຕິບັດໄດ້; 4. ປັບປຸງກົນໄກ ແລະ ຂັ້ນຕອນການປະສານງານກ່ຽວກັບການຄຸ້ມຄອງ, ຕິດຕາມກວດກາ, ການປະເມີນ ແລະ ການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍໃນຂົງເຂດວັດທະນະທຳ-ສັງຄົມ ລະຫວ່າງສະພາແຫ່ງຊາດ, ສະພາປະຊາຊົນຂັ້ນແຂວງ, ບັນດາຂະແໜງການ ແລະ ພາກສ່ວນອື່ນທີ່ກ່ຽວຂ້ອງ ທັງຢູ່ຂັ້ນສູນກາງ ແລະ ທ້ອງຖິ່ນ; 5. ເພີ່ມທະວີການໂຄສະນາ, ເຜີຍແຜ່ກົດໝາຍໃຫ້ເລິກເຊິ່ງ, ຕໍ່ເນື່ອງ, ກວ້າງຂວາງ, ທົ່ວເຖິງ ແລະ ແທດເໝາະກັບແຕ່ລະປະເພດເປົ້າໝາຍ ແນໃສ່ສ້າງຄວາມເຂົ້າໃຈທີ່ຖືກຕ້ອງ, ເປັນເອກະພາບຕໍ່ເນື້ອໃນແຕ່ລະກົດໝາຍ, ຍົກສູງສະຕິເຄົາລົບ ແລະ ປະຕິບັດກົດໝາຍໃນທົ່ວສັງຄົມ; 6. ລັດຖະບານ ກໍຄືຂະແໜງການທີ່ກ່ຽວຂ້ອງ ເອົາໃຈໃສ່ເຂັ້ມງວດຈັດຕັ້ງປະຕິບັດກົດໝາຍ, ກວດກາ ແລະ ປະເມີນຄືນການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍ ທີ່ເຫັນວ່າບໍ່ທັນສອດຄ່ອງ, ຈັດຕັ້ງປະຕິບັດຫຍຸ້ງຍາກ ໃຫ້ເປັນລະບົບ ແລະ ຕໍ່ເນື່ອງ ເພື່ອຮັບປະກັນການຄຸ້ມຄອງຢ່າງມີປະສິດທິພາບ ແລະ ສາມາດຈັດຕັ້ງປະຕິບັດໄດ້; 7. ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສືບຕໍ່ຍົກສູງຄຸນນະພາບການປະຕິບັດພາລະບົດບາດດ້ານການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍໃນຂົງເຂດວັດທະນະທຳ-ສັງຄົມ ໃຫ້ເປັນລະບົບ, ປົກກະຕິ, ຕໍ່ເນື່ອງ ແລະ ກ້າວໄປສູ່ການປັບປຸງກົດໝາຍດັ່ງກ່າວໃນຕໍ່ໜ້າ.