(ສພຊ) – ຕອນເຊົ້າວັນທີ 27 ພະຈິກຜ່ານມາ, ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ຕາງໜ້າໃຫ້ຄະນະປະຈຳສະພາແຫ່ງຊາດ ຖະແຫຼງຂ່າວຜົນສຳເລັດການພິຈາລະນາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດວຽກງານ 3 ສ້າງ ຕາມມະຕິຂອງສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016 ວ່າດ້ວຍການຈັດຕັ້ງປະຕິບັດວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເມື່ອວັນທີ 21 ພະຈິກ 2024; ໂດຍອີງໃສ່ມະຕິເລກທີ 02/ສພຊ, ວຽກງານ 3 ສ້າງ ໄດ້ຮັບການຈັດຕັ້ງຜັນຂະຫຍາຍຢ່າງກວ້າງຂວາງ, ກອງປະຊຸມສະໄໝສາມັນເທື່ອທີ 8 ກໍໄດ້ຢັ້ງຢືນ ແລະ ຮັບຮອງເອົາການສະຫຼຸບສັງລວມຜົນສຳເລັດ ແລະ ບັນຫາທີ່ຍັງຄົງຄ້າງ ພ້ອມທັງທິດທາງ, ແຜນການ ແລະ ຄາດໝາຍສູ້ຊົນຂອງລັດຖະບານ ໃນປີ 2025 ແລະ ທິດທາງ 5 ປີ (2026-2030).

ດ້ານຜົນສຳເລັດ:

1. ໄດ້ສ້າງຕັ້ງສະພາປະຊາຊົນຂັ້ນແຂວງ ເຊິ່ງແມ່ນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາ ຊົນລາວບັນດາເຜົ່າ ແລະ ເປັນອົງການອຳນາດລັດຂັ້ນທ້ອງຖິ່ນ ມີສິດ ແລະ ໜ້າທີ່ລວມຄື: ສິດ ແລະ ໜ້າທີ່ດ້ານນິຕິກຳ, ສິດ ແລະ ໜ້າທີ່ດ້ານການຕົກລົງບັນຫາສຳຄັນພື້ນຖານຂອງທ້ອງຖິ່ນ, ສິດ ແລະ ໜ້າທີ່ດ້ານການຕິດຕາມກວດກາ; ສຳ ເລັດການປະກາດສ້າງຕັ້ງ 3 ນະຄອນຄື: ນະຄອນຫຼວງພະບາງ, ນະຄອນໄກສອນ ພົມວິຫານ ແລະ ນະຄອນປາກເຊ; ບັນດາກະຊວງ, ອົງການ ກໍໄດ້ຄົ້ນຄວ້າສ້າງ ແລະ ປັບປຸງບັນດານິຕິກຳ ເພື່ອໃຫ້ສອດຄ່ອງ ແລະ ມີຄວາມເປັນເອກະພາບໃນການຈັດຕັ້ງປະຕິບັດວຽກງານ 3 ສ້າງ ໃນຂົງເຂດຄວາມຮັບຜິດຊອບຂອງຕົນ.

2. ສ້າງແຂວງເປັນຫົວໜ່ວຍຍຸດທະສາດ ຕາມ 7 ດ້ານ ແລະ 66 ຕົວຊີ້ບອກ ບັນລຸໄດ້ 1 ນະຄອນຫຼວງ ແລະ 2 ແຂວງຄື: ນະຄອນຫຼວງວຽງຈັນ, ແຂວງສະຫວັນນະເຂດ ແລະ ແຂວງຈຳປາສັກ.

3. ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ຕາມ 5 ດ້ານ ແລະ 47 ຕົວຊີ້ບອກ ບັນລຸໄດ້ 3 ນະຄອນ ແລະ 21 ເມືອງ.

4. ສ້າງບ້ານເປັນຫົວໜ່ວຍພັດທະນາ ຕາມ 4 ດ້ານ ແລະ 30 ຕົວຊີ້ບອກ ບັນລຸໄດ້ 3,618 ບ້ານ.

ເຖິງຢ່າງໃດກໍຕາມ, ຄຽງຄູ່ກັບຜົນງານທີ່ກ່າວມາຂ້າງເທິງ ກອງປະຊຸມເຫັນວ່າຍັງມີດ້ານອ່ອນ-ຄົງຄ້າງຈຳນວນໜຶ່ງ ຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ ເປັນຕົ້ນແມ່ນ:

1. ນິຕິກຳ, ຄໍາແນະນໍາໃນການຈັດຕັ້ງປະຕິບັດຂອງບາງກະຊວງ, ອົງການຂັ້ນສູນກາງ ໃນການແບ່ງຂັ້ນຄຸ້ມຄອງ ກໍານົດຍັງມີລັກສະນະກວມລວມ, ບໍ່ລະອຽດຈະແຈ້ງ.

2. ການແບ່ງຂັ້ນຄຸ້ມຄອງດ້ານວຽກງານ, ດ້ານງົບປະມານ, ດ້ານພະນັກງານ ແລະ ເຕັກນິກວິຊາການ ໄດ້ກໍານົດຢູ່ໃນນິຕິກໍາຂ້ອນຂ້າງຈະແຈ້ງ, ແຕ່ຂອດຈັດຕັ້ງປະຕິບັດຍັງບໍ່ຂາດຕົວ.

3. ການແບ່ງຜົນປະໂຫຍດຂອງຂະແໜງການຂັ້ນສູນກາງໃຫ້ທ້ອງຖິ່ນ ຍັງບໍ່ທັນສອດຄ່ອງກັບສະພາບຄວາມເປັນຈິງ.

4. ບາງກະຊວງ, ອົງການຂັ້ນສູນກາງ ຍັງບໍ່ທັນເປັນເຈົ້າການໃນການນໍາພາ-ຊີ້ນໍາ, ບໍ່ໃກ້ຊິດຕິດແທດຂະແໜງການສາຍຕັ້ງຂອງຕົນຢູ່ຂັ້ນທ້ອງຖິ່ນເທົ່າທີ່ຄວນ ຈຶ່ງເຮັດໃຫ້ການເຄື່ອນໄຫວວຽກງານຂອງບາງຂະແໜງການຢູ່ຂັ້ນທ້ອງຖິ່ນ ເກີນໜ້າທີ່ ແລະ ສິດ ທີ່ກົດໝາຍກໍານົດ.

5. ການເຜີຍແຜ່, ເຊື່ອມຊຶມ ແລະ ການຜັນຂະຫຍາຍມະຕິ, ຄໍາສັ່ງ ກ່ຽວກັບວຽກງານ 3 ສ້າງ ຍັງບໍ່ທັນເລິກເຊິ່ງ, ກວ້າງຂວາງ ແລະ ທົ່ວເຖິງ ເທົ່າທີ່ຄວນ.

6. ການປະເມີນຜົນວຽກງານ 3 ສ້າງ ຂອງບາງຂະແໜງການຂັ້ນແຂວງ, ເມືອງ, ນະຄອນ ບໍ່ໄປຕາມຕົວຊີ້ບອກ ແລະ ຕົວຊີ້ບອກທີ່ກ່ຽວຂ້ອງກັບຫຼາຍຂະແໜງການ ມີຄວາມຫຍຸ້ງຍາກໃນການຈັດຕັ້ງປະຕິບັດ; ຄຽງຄູ່ກັນນັ້ນ, ວຽກງານ 3 ສ້າງ ບໍ່ໄດ້ຮັບການຈັດສັນງົບປະມານເປັນອັນສະເພາະ.

ສຳລັບທິດທາງໃນຕໍ່ໜ້າ, ກອງປະຊຸມສະເໜີລັດຖະບານຄົ້ນຄວ້າຕື່ມ ແລະ ເອົາໃຈໃສ່ຈັດຕັ້ງປະຕິບັດບາງບັນຫາດັ່ງນີ້:

ທິດທາງ, ແຜນການ ແລະ ຄາດໝາຍສູ້ຊົນ ໃນປີ 2025:

1. ສະຫຼຸບຕີລາຄາ, ຖອດຖອນບົດຮຽນວຽກງານ 3 ສ້າງ, ວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກ ຕິດພັນກັບການປັບປຸງລະບົບການປົກຄອງທ້ອງຖິ່ນ ຕາມມະຕິ 05/ຄບສພ, ລົງວັນທີ 05 ກັນຍາ 2023.

2. ຄົ້ນຄວ້າປັບປຸງຄໍາແນະນໍາກ່ຽວກັບການປະເມີນຜົນ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຕາມມາດຕະຖານ ແລະ ຕົວຊີ້ບອກ ທີ່ໄດ້ກໍານົດໄວ້.

3. ຊຸກຍູ້ສ້າງແຂວງເປັນຫົວໜ່ວຍຍຸດທະສາດ ໃຫ້ໄດ້ 02 ແຂວງ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ໃຫ້ໄດ້ 04 ເມືອງ ແລະ ສ້າງບ້ານເປັນຫົວໜ່ວຍພັດທະນາ ໃຫ້ໄດ້ 1,086 ບ້ານ.

ທິດທາງແຜນການ 5 ປີ (2026-2030):

1. ສູ້ຊົນສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຕາມທິດທາງແຜນການທີ່ວາງໄວ້.

2. ສ້າງໃໝ່ ຫຼື ປັບປຸງນິຕິກໍາກ່ຽວຂ້ອງກັບວຽກງານ 3 ສ້າງ ຕາມທິດຜັນຂະຫຍາຍມະຕິ ເລກທີ 05/ຄບສພ, ລົງວັນທີ 05 ກັນຍາ 2023 ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ເຂົ້າສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ.

3. ບັນດາກະຊວງ, ຂະແໜງຂັ້ນສູນກາງ ເພີ່ມທະວີການລົງຕິດຕາມ, ຊຸກຍູ້-ຊີ້ນໍາຂັ້ນທ້ອງຖິ່ນ ໃນການຈັດຕັ້ງປະຕິບັດບາງມາດຕະຖານທີ່ມີຄວາມຫຍຸ້ງຍາກ ແລະ ມີຄວາມສ່ຽງຈະບໍ່ບັນລຸ.

4. ບັນດາກະຊວງ, ຂະແໜງການຂັ້ນສູນກາງ ຍົກສູງຄວາມຮັບຜິດຊອບໃນການສ້າງ ແລະ ປັບປຸງນິຕິກຳກ່ຽວກັບການແບ່ງຂັ້ນຄຸ້ມຄອງດ້ານຕ່າງໆ ໃຫ້ເປັນລະບົບຄົບຊຸດ, ຕິດພັນກັບການປັບປຸງກົນໄກການປະສານງານລະຫວ່າງຂັ້ນສູນກາງດ້ວຍກັນ ແລະ ສູນກາງກັບທ້ອງຖິ່ນ.

5. ປັບປຸງຄືນລະບົບການນໍາພາ-ຊີ້ນໍາວຽກງານກໍ່ສ້າງຮາກຖານການເມືອງ, ວຽກ ງານພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກ ແລະ ວຽກງານ 3 ສ້າງ ໃຫ້ກົມກຽວກັນ.