(ສພຊ) – ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເມື່ອວັນອັງຄານທີ 19 ພະຈິກຜ່ານມາ, ທ່ານ ນາງ ບຸນມີ ຈຸນລະຈັກ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ແຂວງຈຳປາສັກ ໄດ້ມີຄຳເຫັນແລກປ່ຽນຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2024 ດັ່ງນີ້:

1. ການອອກໃບຕາດິນໃຫ້ແກ່ປະຊາຊົນ: ຜ່ານການລົງພົບປະພໍ່ແມ່ປະຊາຊົນ ເຫັນວ່າຂໍ້ສະເໜີຫຼາຍທີ່ສຸດແມ່ນການອອກໃບຕາດິນ, ແຕ່ໃນບົດລາຍງານບອກວ່າ ບໍ່ສາມາດຈະປະຕິບັດໄດ້ຕາມແຜນທີ່ກຳນົດໄວ້; ເຖິງຢ່າງໃດກໍຕາມ, ສະເໜີພາກສ່ວນກ່ຽວຂ້ອງເບິ່ງຄືນຕື່ມການອອກໃບຕາດິນໃຫ້ແກ່ເປົ້າໝາຍທີ່ໄດ້ເສຍຄ່າທຳນຽມ ຫຼື ການວັດແທກສຳເລັດແລ້ວ, ຢາກໃຫ້ເບິ່ງເປົ້າໝາຍນີ້ສາກ່ອນ ເພາະຜ່ານມາເຂົາເຈົ້າໄດ້ເສຍຄ່າທຳນຽມ 5-6 ປີແລ້ວ ແຕ່ຍັງບໍ່ໄດ້ຮັບໃບຕາດິນ.

2. ການຫັນເປັນທັນສະໄໝໃນການເກັບລາຍຮັບ ໂດຍສະເພາະລາຍຮັບຈາກທີ່ດິນ ກໍຄືລາຍຮັບຈາກການເສຍຄ່າທຳນຽມທາງ: ຜ່ານມາເຫັນວ່າສັງຄົມໃຫ້ການສະໜັບສະໜູນ, ເຫັນດີເຫັນພ້ອມໃນການຈັດຕັ້ງປະຕິບັດການຫັນເປັນທັນສະໄໝ ເຮັດໃຫ້ມີລາຍຮັບເພີ່ມຂຶ້ນຫຼາຍຈາກການເກັບຜ່ານແອັບ ຫຼື ຜ່ານລະບົບທະນາຄານ; ແຕ່ພໍຈັດຕັ້ງປະຕິບັດມາຮອດປີ 2024 ເຫັນວ່າພວກເຮົາໄດ້ຢຸດ ຫຼືວ່າໂຈະການເກັບຜ່ານລະບົບທັນສະໄໝ, ເຮັດໃຫ້ມີຫາງສຽງຈາກສັງຄົມຫຼາຍຢ່າງຕໍ່ກັບການຫັນເປັນທັນສະໄໝ ແລະໄລຍະໜຶ່ງ ກໍໄດ້ກັບມາສູ່ໄລຍະເດີມ (ບົດລາຍງານໄດ້ເວົ້າແຈ້ງແລ້ວ) ສະນັ້ນ, ສະເໜີລັດ ຖະບານສືບຕໍ່ເຮັດແນວໃດຢາກໃຫ້ຫັນເປັນທັນສະໄໝຕື່ມອີກ ແລ້ວກໍບໍ່ຢາກໃຫ້ກັບໄປກັບມາ; ຂ້າພະເຈົ້າສະໜັບສະໜູນຄວນຫັນເປັນທັນສະໄໝ ອັນດີແມ່ນມີຫຼາຍ ສາມາດເກັບລາຍຮັບໄດ້ຢ່າງຄົບຖ້ວນ ແລະ ກໍບໍ່ມີສິ່ງຮົ່ວໄຫຼໃນສິ່ງທີ່ເຮົາເກັບໄດ້, ເປັນຕົວເລກທີ່ຊັດເຈນຢູ່ໃນລະບົບທັນສະໄໝ ແລະ ເຮັດໃຫ້ຜູ້ໄປຈ່າຍໄປເສຍເງິນ ມີຄວາມເຊື່ອໝັ້ນສູງ.

3. ການພັດທະນາຊົນນະບົດ ແລະ ແກ້ໄຂຄວາມທຸກຍາກ: ຜ່ານມາລັດຖະບານໄດ້ເອົາໃຈໃສ່ສູງຕໍ່ກັບການປະຕິ ບັດວຽກງານດັ່ງກ່າວ ມີຄອບຄົວ, ບ້ານ, ເມືອງ ທີ່ພົ້ນທຸກ ເປັນຕົວຊີ້ບອກຫຼາຍສົມຄວນ ລວມທັງສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດ ກໍໄດ້ຫຼາຍຈຸດ; ເຖິງຢ່າງໃດກໍຕາມ, ໃນການປະຕິບັດ ໃຫ້ເອົາໃຈໃສ່ກຳນົດມາດຕະຖານໃຫ້ຊັດເຈນ ແລະ ມີຄວາມຍືນຍົງ ເພາະມີຫຼາຍຄອບຄົວ, ບ້ານ, ເມືອງຕ່າງໆ ພາຍຫຼັງທີ່ປະກາດໄປແລ້ວກໍກັບຄືນສູ່ຄວາມທຸກຍາກຄືເກົ່າແມ່ນຍັງມີຫຼາຍ, ອັນນີ້ຍ້ອນຫຍັງ? ຍ້ອນການກຳນົດມາດຕະຖານບໍ່ຊັດເຈນ, ຕອນດຳລັດ 309 ກໍແນວໜຶ່ງ ບາດມາຮອດ 348 ເຫັນວ່າທຸກຍາກຄືນອີກ, ອັນນີ້ພວກເຮົາບໍ່ໄດ້ວິເຄາະວິໄຈຢ່າງຊັດເຈນວ່າມັນມີຫຍັງແດ່ ແລະ ໃຫ້ມີຄວາມຍືນຍົງ; ກ່ອນຈະປະກາດ ກໍອີງໃສ່ມາດຕະຖານຢ່າງຊັດເຈນ, ບໍ່ໃຫ້ຖືແຕ່ປະລິມານສຳຄັນ ໃຫ້ເອົາຄຸນນະພາບເປັນຕົ້ນຕໍ, ສົມມຸດວ່າບ້ານໃດພົ້ນທຸກກໍພົ້ນທຸກອີ່ຫຼີ, ສາມາດເປັນຕົ້ນແບບຕົວແບບໃຫ້ແກ່ບ້ານອື່ນໆທີ່ບໍ່ທັນໄດ້ປະກາດ.

4. ການປະຕິບັດນະໂຍບາຍຕໍ່ພະນັກງານ-ລັດຖະກອນຂັ້ນວິຊາການ ທີ່ມີນະໂຍບາຍນ້ຳມັນລົດໃຫ້ເຂົາເຈົ້າ 50 ພັນກີບ/ເດືອນ ເຊິ່ງມາຮອດປັດຈຸບັນ ເຫັນວ່າບໍ່ສອດຄ່ອງບໍ່ເໝາະສົມກັບຄ່າຄອງຊີບຕ່າງໆ, ຖ້າເປັນໄປໄດ້ໃຫ້ກຳນົດເປັນລິດ ສົມມຸດວ່າຈະໃຫ້ 10 ລິດ ຫຼືວ່າເທົ່າໃດ? ເພາະມູນຄ່າລາຄານ້ຳມັນຕໍ່ລິດ ກໍຈະຄູນຕາມນັ້ນ, ຖ້າກຳນົດເປັນເງິນ 50 ພັນກີບ ປັດຈຸບັນກໍຈະໄດ້ພຽງ 2 ລິດກວ່າ ເຫັນວ່າມີຄວາມຫຍຸ້ງຍາກຕໍ່ພະນັກງານ-ລັດຖະກອນຫຼາຍ; ສະເໜີລັດຖະບານພະຍາຍາມຄົ້ນຄວ້າພິຈາລະນາຕື່ມ, ເຮັດແນວໃດໃຫ້ມັນສອດຄ່ອງກັບສະພາບເສດຖະກິດໃນປັດຈຸບັນ.