ກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ເເຂວງອັດຕະປື ໄດ້ຈັດຂຶ້ນໃນວັນທີ 29 ກໍລະກົດ 2024 ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ລາວປ່າວຊົ່ງ ນະວົງໄຊ ກໍາມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ມີທ່ານປະທານສະພາປະຊາຊົນແຂວງ, ບັນດາທ່ານຮອງເຈົ້າແຂວງ, ຄະນະປະຈໍາພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ອາດີດການນຳພັກລັດຂອງແຂວງ, ອົງການ, ພະແນກການ, ບັນດາທ່ານເຈົ້າເມືອງ, ຮອງເຈົ້າເມືອງ ແລະ ແຂກຖືກເຊີນ ເຂົ້າຮ່ວມຫຼາຍກວ່າ 140 ທ່ານ.

ທ່ານ ມະນີໂສ ຊາມຸນຕີ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ  ສະພາແຫ່ງຊາດ ໄດ້ລາຍງານການຈັດຕັ້ງປະຕິບັດການປະເມີນຜົນລັດຖະທໍາມະນູນ ສະບັບປີ 2015 ມາຮອດປັດຈຸບັນແມ່ນໄດ້ມີການປັບປຸງຄັ້ງທີ 2 ເຊິ່ງນັບວ່າເປັນເວລາ 9 ປີມານີ້ລັດຖະທໍາມະນູນ ສະບັບປີ 2015 ໄດ້ເປັນກົດໝາຍແມ່ພື້ນຖານສໍາຄັນ ຂອງປະເທດຊາດ, ເປັນບ່ອນອີງແກ່ການສຶກສາ ແລະ  ປັບປຸງບັນດາກົດໝາຍ ເພື່ອເປັນເຄື່ອງມືໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ເຊິ່ງຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສະຫຼຸບຕີລາຄາການຈັດຕັ້ງປະຕິບັດລັດຖະທໍາມະນູນໃນໄລຍະເກືອບ 10 ປີທີ່ຜ່ານມາ ໃຫ້ແຕ່ລະອົງການຈັດຕັ້ງ ພັກ-ລັດ ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງ ພ້ອມທັງສາເຫດ, ບົດບັນ ຍັດທີ່ສອດຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາຕັ້ງຂຶ້ນ ເພື່ອເປັນຂໍ້ມູນໃຫ້ແກ່ຄະນະກຳມະການຄົ້ນຄວ້າ, ປັບປຸງເນື້ອໃນຂອງລັດຖະທຳມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດປາກົດຜົນເປັນຈິງໄດ້.

ໃນກອງປະຊຸມ ບັນດາຜູ້ຕາງໜ້າອົງການປົກຄອງແຂວງ, ຂະແໜງການກ່ຽວຂ້ອງແຕ່ລະອົງການຈັດຕັ້ງຂອງແຂວງ ໄດ້ພັດປ່ຽນກັນປະກອບຄໍາເຫັນ ແລະ ໄດ້ສຸມໃສ່ຄົ້ນຄວ້າຕໍ່ແຕ່ລະເນື້ອຂອງລັດຖະທຳມະນູນຢ່າງມີຈຸດສຸມ ເຊິ່ງເຊື່ອໝັ້ນວ່າຈະເປັນຂໍ້ມູນສຳຄັນໃຫ້ແກ່ຄະນະຮັບຜິດຊອບ ນຳໄປຄົ້ນຄວ້າ, ວິເຄາະວິໄຈ ປັບປຸງຄືນ ເພື່ອເຮັດໃຫ້ລັດຖະທຳ ມະນູນດັ່ງກ່າວ ມີເນື້ອໃນຄົບຖ້ວນ, ສາມາດຈັດຕັ້ງປະຕິບັດດ້ວຍຄຸນນະພາບ, ມີຄວາມສັກສິດສູງຂຶ້ນ, ສັງຄົມມີຄວາມສະຫງົບ, ປະຊາທິປະໄຕ, ຍຸຕິທຳ, ສີວິໄລ ແລະ ນໍາໃຊ້ໄດ້ຢ່າງສອດຄ່ອງ ກັບສະພາບການພັດທະນາໃນໄລຍະປ່ຽນແປງໃໝ່.

ກອງປະຊຸມປະເມີນການຈັດຕັ້ງປະຕິບັດລັດຖະ ທຳມະນູນ ສະບັບປີ 2015 ແມ່ນສຶບຕໍ່ເພື່ອເປັນການປັບປຸງລະບົບອຳນາດແຫ່ງລັດ ໃຫ້ມີປະສິດທິພາບສູງ, ສ້າງບາດລ້ຽວໃໝ່ ໃຫ້ແກ່ການປົກປັກ ຮັກສາ ແລະ ສ້າງສາປະເທດຊາດ, ການເຊື່ອມໂຍງເສດຖະກິດກັບພາກພື້ນ ແລະ ສາກົນໃນໄລຍະໃໝ່ ຈິ່ງໄດ້ປັບປຸງ ລັດຖະທຳມະນູນ ສະບັບປີ 2003 , ສະບັບປັບປຸງໃນປີ 2015 ຊຶ່ງເປັນການປັບປຸງຄັ້ງທີ່ 2 ແລະ ໄດ້ຖືກຮັບຮອງຈາກກອງປະຊຸມ ສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII, ຊຶ່ງປະກອບມີ 14 ໝວດ ແລະ 119 ມາດຕາ. ເພີ່ມ ຂຶ້ນ 3 ໝວດ ຄື: ໝວດທີ 8 ສະພາປະຊາຊົນທ້ອງຖິ່ນ, ໝວດທີ 11 ການກວດສອບແຫ່ງລັດ ແລະ ໝວດທີ 12 ຄະນະກຳມະການເລືອກຕັ້ງ ແລະ 21 ມາດຕາ.

ໃນໂອກາດນີ້ ທ່ານ ລາວປ່າວຊົ່ງ ນະວົງໄຊ ປະທານກອງປະຊຸມຍັງໄດ້ຮຽກຮ້ອງ ໃຫ້ບັນດາທ່ານນໍາເອົາຜົນຂອງກອງປະຊຸມຄັ້ງນີ້ ລາຍງານຫລືແຈ້ງໃຫ້ຄະນະນໍາ ແລະ ພະນັກງານວິຊາການຂອງຕົນໄດ້ຮັບຊາບ ພ້ອມທັງສືບຕໍ່ນໍາພາ ສະມາຊິກພັກ, ພະນັກງານ, ລັດຖະກອນໃນອົງການ ຂອງຕົນ ຄົ້ນຄວ້າສະເໜີຄໍາ ເຫັນຕໍ່ການປັບປຸງລັດຖະທຳມະນູນ ຕາມຄໍາຖາມເຈາະຈີ້ມ ແລ້ວລາຍງານໃຫ້ສະພາປະຊາຊົນແຂວງ ເພື່ອຈະໄດ້ສັງລວມສົ່ງມາຍັງກອງເລຂາ ກໍ່ຄືຄະນະຮັບຜິດຊອບປັບປຸງ ລັດຖະ ທຳມະນູນລະດັບຊາດໄດ້ເປັນຂໍ້ມູນເພື່ອນໍາມາຄົ້ນຄວ້າ, ປະກອບຄໍາເຫັນຕໍ່ຮ່າງລັດຖະທຳມະນູນ ສະບັບປັບປຸງ ເພື່ອສືບຕໍ່ກະກຽມໃຫ້ແກ່ການນຳອອກທາບທາມຄວາມເຫັນປັບປຸງຄືນໃນຕົ້ນປີ 2025 ແລະ ສໍາເລັດຕາມແຜນທຸກປະການ.

(ວິນັດ)