1. ແກ້ໄຂບັນຫາເຄັ່ງຮ້ອນທາງດ້ານເສດຖະກິດ ຕ້ອງສະແດງໃຫ້ເຫັນເຖິງຄວາມເຂັ້ມງວດ ເດັດຂາດ ໂປ່ງໃສ ແລະ ເປັນມືອາຊີບ ໃນການຈັດຕັ້ງປະຕິບັດ 5 ແຜນວຽກຈຸດສຸມທີ່ໄດ້ກຳນົດໄວ້ໃນມະຕິ 03/ສພຊ ວ່າດ້ວຍການແກ້ໄຂບັນ ຫາເສດຖະກິດການເງິນ ເປັນຕົ້ນແມ່ນການສົ່ງເສີມການຜະລິດເພື່ອຄໍ້າປະກັນສະບຽງອາຫານ-ທົດແທນການນຳເຂົ້າ ແລະ ເປັນສິນຄ້າສົ່ງອອກ ເຊິ່ງນອນໃນເປົ້າໝາຍທີ 1 ຂອງແຜນພັດທະນາ, ສະເໜີໃຫ້ຈິງຈັງກັບແຜນວຽກຈຸດສຸມນີ້ ໃຫ້ເກີດເປັນຮູບປະທຳອີ່ຫຼີ; ຢາກເຮັດໃຫ້ການຜະລິດທົດແທນການນໍາເຂົ້າເກີດຜົນເປັນຈິງນັ້ນ ຂ້າພະເຈົ້າສະໜັບສະໜູນຢ່າງຈິງຈັງຕໍ່ມາດຕະການດ້ານຈິດຕະສາດສັງຄົມ ເຊິ່ງກ່ອນອື່ນໝົດຕ້ອງເອົາໃຈໃສ່ເຮັດວຽກການເມືອງແນວຄິດໃຫ້ທົ່ວສັງຄົມ ເພື່ອພ້ອມກັນປັບປ່ຽນທັດສະນະຄະຕິທີ່ມັກງ່າຍ ມັກຊົມໃຊ້ແຕ່ຜະລິດຕະພັນນຳເຂົ້າ ໃຫ້ຫັນມາມັກຮັກໃນການຊົມໃຊ້ຜະລິດຕະພັນພາຍໃນ ຜະລິດຕະພັນທີ່ສ້າງຂຶ້ນຈາກສະຖາບັນຄອບຄົວທີ່ແທ້ຈິງ ແລະ ເຮັດໃຫ້ສາມາດຫັນປ່ຽນທັດສະນະຄະຕິຂອງສັງຄົມ ຈາກສັງຄົມຊົມໃຊ້ ໃຫ້ກາຍມາເປັນສັງຄົມການຜະລິດຢ່າງເປັນຮູບປະທຳ, ຖ້າເຮັດໄດ້ແນວນີ້ ພວກເຮົາກໍຈະຢູ່ລອດກັບສະພາບການຄືທຸກມື້ນີ້ໄດ້; ພ້ອມດຽວກັນນີ້ ກໍຕ້ອງຈິງຈັງໃນການຈັດຕັ້ງປະຕິບັດມາດຕະ ການທາງດ້ານການເງິນ ແລະ ເງິນຕາ ດ້ວຍການນຳໃຊ້ບັນດາກົນໄກ ແລະ ມາດຕະການຕ່າງໆໃຫ້ມີໝາກມີຜົນອີ່ຫຼີ ບົນພື້ນຖານການບັງຄັບໃຊ້ກົດໝາຍ ກໍຄືລະບຽບການຕ່າງໆທີ່ວາງອອກແຕ່ລະໄລຍະຢ່າງເຂັ້ມງວດ, ຫຼີກລ່ຽງ ຫຼື ປາສະຈາກຢ່າງສິ້ນເຊີງການແກ້ໄຂບັນຫາທາງດ້ານບໍລິຫານເຊັ່ນ: ພົບເຫັນມີການລະເມີດ ເຮັດບົດບັນທຶກສຶກສາອົບຮົມ ທັງໆທີ່ການລະເມີດນັ້ນໆມັນເປັນບັນຫາທາງດ້ານອາຍາ ໂດຍສະເພາະແມ່ນການລະເມີດຂອງພະນັກງານ-ລັດຖະກອນ ທີ່ຕິດພັນກັບ 12 ພຶດຕິກຳທີ່ເປັນການສໍ້ລາດບັງຫຼວງ.

2. ການແກ້ໄຂບັນຫາເຄັ່ງຮ້ອນທາງດ້ານວັດທະນະທຳ-ສັງຄົມ ກໍຍັງມີຫຼາຍແຜນວຽກທີ່ຍັງທ້າທາຍຕໍ່ການຈັດຕັ້ງປະຕິບັດຄາດໝາຍ ແລະ ຍັງທ້າທາຍຕໍ່ອະນາຄົດຂອງບຸກຄະລາກອນໃນປະເທດຊາດ ເຊັ່ນ:

1) ຄຸນນະພາບການຮຽນ-ການສອນ, ສະພາບການປະລະການຮຽນ ແລະ ສະພາບແວດລ້ອມເງື່ອນໄຂສິ່ງອຳນວຍຄວາມສະດວກ ສັງຄົມວ່າສາເຫດຍ້ອນຫຍັງແທ້ ເຊິ່ງເພື່ອນ ສສຊ ຫຼາຍທ່ານກໍຍົກມາວ່າ ເປັນຍ້ອນສະພາບຄວາມຫຍຸ້ງ ຍາກທາງດ້ານເສດຖະກິດ-ການເງິນ, ບາງພ່ອງກໍວ່າ ຍ້ອນບັນຫານະໂຍບາຍລວມທີ່ບໍ່ໄດ້ຮັບການປັບປຸງປ່ຽນແປງໄປຕາມສະພາບການຂະຫຍາຍຕົວຂອງເສດຖະກິດ-ສັງຄົມ ເປັນຕົ້ນນະໂຍບາຍຂອງການສອບເສັງເລື່ອນຊັ້ນທີ່ມີການອະນຸ ໂລມຄະແນນ ແລະ ອື່ນໆ ທີ່ຍັງບໍ່ສອດຄ່ອງ; ຕໍ່ບັນຫານີ້ ລັດຖະບານຕ້ອງໄດ້ຄົ້ນຄວ້າ ແລະ ກຳນົດນະໂຍບາຍໃຫ້ເໝາະສົມກວ່າເກົ່າ ຫຼື ຍົກບັນຫາການສຶກສາເປັນບັນຫາວາລະແຫ່ງຊາດຄືເພື່ອນ ສສຊ ໄດ້ຍົກຂື້ນໃນມື້ວານນີ້ ກໍຍິ່ງເປັນການດີ ຫຼື ປະຕິບັດນະໂຍບາຍສົ່ງເສີມນັກຮຽນເກັ່ງຮອບດ້ານໄດ້ໃບປະກາດແດງ ໃຫ້ບຸລິມະສິດໂກຕາລັດຖະກອນ ໂດຍບໍ່ມີເງື່ອນໄຂ ຫຼືອື່ນໆ ທີ່ເຫັນວ່າເໝາະສົມກັບການດຶງດູດໃຫ້ມີການປະກອບສ່ວນພັດທະນາການສຶກສາໃຫ້ມີຄຸນນະພາບສູງຂຶ້ນ.

2) ສຳລັບຂະແໜງສາທາລະນະສຸກ ບັນຫາທີ່ເປັນສິ່ງທ້າທາຍ ແລະ ເຮັດໃຫ້ໂຮງໝໍມີການເສື່ອມຖອຍສັດທາຈາກປະຊາຊົນຜູ້ຮັບບໍລິການສາທາລະນະສຸກ ນັບມື້ນັບຫຼາຍຂຶ້ນ ສິ່ງດັ່ງກ່າວກໍແມ່ນການບໍລິການປິ່ນປົວໂດຍຜ່ານກອງທຶນປະກັນສຸຂະພາບ ເຊິ່ງມະຕິກອງປະຊຸມຄັ້ງຜ່ານມາ ກໍຄືມະຕິ 97/ສພຊ ກໍໄດ້ກຳນົດຈະແຈ້ງແລ້ວ ແຕ່ມາຮອດປັດຈຸບັນກໍຍັງບໍ່ທັນມີຄວາມຄືບໜ້າ ແລະ ໃນບົດລາຍງານກໍບໍ່ໄດ້ກ່າວເຖິງ ເຊິ່ງເຫດຜົນທີ່ໂຮງໝໍເສື່ອມສັດທາກໍຍ້ອນວ່ານະໂຍ ບາຍປິ່ນປົວທີ່ໄດ້ກຳນົດໄວ້ໃນກົດໝາຍ ກໍຄືລະບຽບການທີ່ກ່ຽວຂ້ອງ; ສອງປີຜ່ານມາ ໂຮງໝໍຄູ່ສັນຍາຂອງກອງທຶນດັ່ງ ກ່າວ ບໍ່ສາມາດຈັດຕັ້ງປະຕິບັດໄດ້ ເຮັດໃຫ້ກອງທຶນບໍ່ເປັນກອງທຶນ, ປະຊາຊົນເຂົ້າຮັບບໍລິການເກືອບທຸກຢ່າງຕ້ອງເສຍເງິນ ສົມທົບກັບທັດສະນະຮັບໃຊ້ຂອງແພດໝໍກໍບໍ່ເໝາະສົມນຳອີກ. ສະນັ້ນ, ສະເໜີໃຫ້ລັດຖະບານຮີບຮ້ອນຈັດຕັ້ງປະ ຕິບັດຕາມມະຕິ 118/ສພຊ ແລະ ມະຕິ 97/ສພຊ ພ້ອມທັງຂຸ້ນຂ້ຽວຈັດຕັ້ງປະຕິບັດຕາມມາດຕະການຂອງຄະນະປະຈຳສະພາແຫ່ງຊາດ ໄດ້ສະເໜີໃນມະຕິກອງປະຊຸມສະໄໝສາມັນແຕ່ລະເທື່ອ ລວມທັງເທື່ອທີ 7 ນີ້.