ວັນທີ 28 ພຶດສະພາ 2024, ທ່ານ ນາງ ພິດສະໄໝ ຕົ້ນສະຫວັນ, ຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນວ ພ້ອມດ້ວຍຄະນະ ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 06 ເດືອນຕົ້ນປີ 2024 ຢູ່ພະແນກແຜນການ ແລະ ການລົງທຶນ ນວ ໂດຍການຕ້ອນຮັບຂອງ ທ່ານ ທະນົງສິນ ແສງພະວົງ, ຮອງຫົວໜ້າພະແນກແຜນການ ແລະ ການລົງທຶນ ນວ, ມີບັນດາຫົວໜ້າ, ຮອງຫົວໜ້າຂະແໜງການຂອງພະແນກ ແລະ ວິຊາການຈຳນວນໜຶ່ງ ເຂົ້າຮ່ວມໃນກອງປະຊຸມຄັ້ງນີ້.
ໃນການລົງເຮັດວຽກຄັ້ງນີ້ ເພື່ອຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກງານຂອງພະແນກແຜນການ ແລະ ການລົງທຶນ; ເຊິ່ງໄລຍະ 4 ເດືອນຜ່ານມາ ການປະຕິບັດບັນດາຄາດໝາຍ ໃນມະຕິກອງປະຊຸມ ສະພາປະຊາຊົນ ນວ ໄດ້ຮັບຮອງ ເປັນຕົ້ນ: ດ້ານເສດຖະກິດໂດຍທຽບໃສ່ໄລຍະດຽວກັນຂອງປີ ການຜະລິດເຂົ້ານາແຊງ ຫຼຸດລົງ 22,76%, ການປູກພືດຜັກໃນລະດູແລ້ງ ເພີ່ມຂຶ້ນ 12%, ປູກພືດຜັກອິນຊີ (OA) ເພີ່ມຂຶ້ນ 50%, ການປູກໄມ້ໃຫ້ໝາກ ແມ່ນໄດ້ສືບຕໍ່ບົວລະບັດເນື້ອທີ່ເກົ່າທີ່ປູກໃນລະດູຜ່ານມາ, ການສະໜອງທາດຊີ້ນ ເປັນຕົ້ນ ຊີ້ນສັດປີກ ທຽບໃສ່ມະຕິສະພາ ເທົ່າກັບ 31,59% ແລະ ສາມາດຜະລິດໄຂ່ ເທົ່າກັບ 40,96%; ດ້ານງົບປະມານ ຈັດເກັບລາຍຮັບເຂົ້າງົບປະມານ ເທົ່າກັບ 48,06% ແລະ ດ້ານລາຍຈ່າຍ ສາມາດປະຕິບັດໄດ້ 33,09%; ດ້ານການລົງທຶນລັດ: ໃນປີ 2024 ໄດ້ຮັບງົບປະມານໂຄງການລົງທຶນຂອງລັດ ທັງໝົດ 545 ໂຄງການ, ເປັນມູນຄ່າ 190,93 ຕື້ກີບ ແລະ ໄດ້ແຈ້ງແຜນລົງທຶນຂອງລັດ ໃຫ້ແຕ່ລະພາກສ່ວນ ເພື່ອຈັດຕັ້ງປະຕິບັດ ໃນວັນທີ 7 ພຶດສະພາ 2024, ປັດຈຸບັດແມ່ນຢູ່ໃນຂັ້ນຕອນການຄົ້ນຄວ້າສັງລວມ ການຈັດຕັ້ງປະຕິບັດ; ນອກຈາກນີ້, ຍັງມີເຂດວຽກງານອື່ນໆ ເຊິ່ງຈະສືບຕໍ່ຈັດຕັ້ງປະຕິບັດໃຫ້ບັນລຸຕາມຄາດໝາຍ ທີ່ໄດ້ກຳນົດໄວ້ໃນມະຕິກອງປະຊຸມສະພາ ປະຊາຊົນ ນວ ທີ່ໄດ້ຮັບຮອງໃນໄລຍະຜ່ານມາ. ຄຽງຄູ່ກັບຜົນສຳເລັດດັ່ງກ່າວ, ຄະນະລົງເຮັດວຽກ ຍັງໄດ້ຮັບຟັງການລາຍງານ ກ່ຽວກັບຂໍ້ຫຍຸ້ງຍາກໃນການປະຕິບັດວຽກງານຂອງພະແນກ ເປັນຕົ້ນ: ການນໍາໃຊ້ອຸປະກອນ, ເຕັກໂນໂລຊີ ທີ່ທັນສະໄໝເຂົ້າໃນການຜະລິດ, ການຫັນເປັນອຸດສະຫະກໍາ ຍັງເຮັດໄດ້ໜ້ອຍ, ຕົວແບບການຜະລິດເປັນສິນຄ້າ, ກຸ່ມການຜະລິດ, ສະຫະກອນແບບໃໝ່ ຂະຫຍາຍຕົວຊ້າ; ນະໂຍບາຍເຂົ້າເຖິງສິນເຊື່ອຍັງມີຂໍ້ຫຍຸ້ງຍາກ ໃຫ້ແກ່ຊາວກະສິກອນໂດຍສະເພາະແມ່ນສິ່ງຄ້ຳປະກັນ; ກົນໄກການຄຸ້ມຄອງການພັດທະນາສີມືແຮງງານ ຍັງບໍ່ທັນເປັນລະບົບ, ການພັດທະນາສີມືແຮງງານໄລຍະສັ້ນ ແລະ ໄລຍະຍາວ ຍັງບໍ່ທັນສາມາດຕອບສະໜອງໄດ້ ຕາມຄວາມຕ້ອງການຂອງຕະຫຼາດແຮງງານ ແລະ ອື່ນໆ.
ໃນໂອກາດດັ່ງກ່າວ, ຄະນະລົງເຮັດວຽກ ກໍໄດ້ມີຄຳເຫັນແລກປ່ຽນຕໍ່ການລາຍງານ ແລະ ເຈາະຈິ້ມຕໍ່ບາງບັນຫາທີ່ເປັນຫາງສຽງສັງຄົມ ພ້ອມທັງໄດ້ນຳເອົາຄຳສະເໜີຂອງປະຊາຊົນ ໄປຊັກຖາມແລກປ່ຽນກັບພະແນກການ, ເຊິ່ງກໍໄດ້ຮັບການຊີ້ແຈງຕໍ່ບັນຫາຕ່າງທີ່ທາງຄະນະຜູ້ແທນໄດ້ຊັກຖາມ ແລະ ພະແນກການ ກໍໄດ້ຮັບເອົາຄຳຄິດ-ຄຳເຫັນຂອງຄະນະຜູ້ແທນ ນຳໄປຄົ້ນຄວ້າພິຈາລະນາ ແລະ ຫາທິດທາງແກ້ໄຂໃນຕໍ່ໜ້າ.